The Definitive Guide to Living in the Capital , Cairo , Egypt

اتغير التوقيت ثاني وبدأت الدنيا تضلم من بدري، وبدأ ينسم علينا الهواء، ويتغير حبة صيف وحبة شتاء، بس يعني عادي تعودنا، ولأننا مش بـ نشجعك خالص أنك تقعد في البيت في الجو التحفة ده، جيبنا لك مجموعة أحداث هـ تعجبك وتخليك تتنطط الثلاث أيام اللي جايين.

نبدأ بيوم الخميس والعرض المسرحي “المحاكمة” على مسرح ميامي، واللي مستوحى من نص “ميراث الريح”، والمسرحية دي بـ تعرض الأحداث السياسية والثورية اللي مررنا بها الفترة اللي فاتت، بأسلوب مميز وممتع، والعرض مستمر ليوم الاثنين 27 أكتوبر.

أما لو عاوز تسمع موسيقى شرقية بألحان عالمية، فيه “حفلة لفرقة مكتوب” في مكان، هـ تستمتع أكيد، وسعر التذكرة 30 جنيه للفرد و20 جنيه للفرد في الأسر والعائلات. لكن لو عاوز تتفرج على الفن البورسعيدي، روح “حفلة فرقة السمسمية” بمركز طلعت حرب الثقافي، والدعوة عامة. وطبعًا ما نقدرش نستغنى عن جمال الفن النوبي، اللي بـ تعرضه “فرقة نوبانور” على مسرح الضمة، وسعر التذكرة عند الباب 30 جنيه، و20 جنيه عند الحجز المسبق. ولعشاق “حفلة المولوية المصرية” ما زالت بـ تقام كل خميس في ساقية الصاوي، وسعر التذكرة 30 جنيه.

ننتقل ليوم الجمعة لو بـ تحب تسمع شعر، هـ تتمزج في “الأمسية الشعرية على الربابة” في ساقية الصاوي، وسعر التذكرة 10 جنيه. لكن لو ما لكش في الشعر فيه حفلة في الساقية برضه عاملاها “فرقة عشرة غربي“، وسعر التذكرة 20 جنيه.

المفاجأة بقى يوم الجمعة أن ذا ووك في بيفرلي هيلز عامل “مهرجان الطعام والفواكهة”، علشان تتذوق كل الأكل اللي عنده، كمان عنده أنشطة ثانية كثير هـ يعملها في اليوم ده، والدعوة عامة.

ولعشاق الفن “معرض النواة” بمتحف محمود مختار للفنان محمود حمدي، هـ يعجبكم جدًا، خاصة أن بعد الافتتاح في 6 مساءً حفل لفرقة Machine Eat Man، بعده المعرض على طول الساعة 8 مساءً. وأخيرًا، عرض لمحبي الفنون غير التقليدية “الأراجوز وخيال الظل” في بيت السحيمي، والدعوة عامة.

نختم بيوم السبت، لمحبي السيرك هـ يعجبكم قوي “مهرجان سيركايرو” اللي على مسرح الفلكي، وده عرض من ضمن عروض مهرجان القاهرة الدولي للسيرك، ويضم العرض فرقة Gandini Juggling من المملكة المتحدة وLumen من سويسرا والدعوة عامة. لكن لو مش بـ تحب السيرك، آرت رووم سبيس عامل أسبوع لعرض الأفلام الكلاسيكية العالمية والمصرية. “وبـ يعرض الفيلم المصري: ثرثرة فوق النيل” المأخوذ عن رواية بنفس الاسم للكاتب الكبير نجيب محفوظ، والفيلم من بطولة عماد حمدي، ميرفت أمين، أحمد رمزي وماجدة الخطيب، ومن إخراج حسين كمال. والفيلم مترجم للإنجليزية. ولمحبي الحفلات غير التقليدية عندنا حفلتين: “حفلة الصامتين” بمركز طلعت حرب، واللي كل أعضاءه من الصم والبكم، والدعوة عامة. “وحفلة أوركسترا النور والأمل” بساقية الصاوي، واللي أعضائها من فاقدي البصر، وسعر التذكرة 30 جنيه، ونختم كعادتنا “بحفلة التنورة” في مركز إبداع وكالة الغوري، وسعر التذكرة 5 جنيه.

أما لو عاوز تعرف أكثر عن أحداثنا اللي بـ ننشرها كل يوم على مدار الشهر، شوف الأجندة بتاعتنا من هنا.