The Definitive Guide to Living in the Capital , Cairo , Egypt

كل يوم جديد فرصة جديدة أننا نكتشف بُعد جديد في العالم لسه مانعرفهوش، حاجة كده زي أنك بـ تحس بميلادك من أول وجديد، في كل حاجة مختلفة بـ تكتشفها. جرب تروح حاجة جديدة عمرك ماروحتها قبل كده مع دليل أحداث نهاية الأسبوع:

النهارده الخميس فيه أحداث متعددة ومختلفة، نبدأ “بأمسية شعرية مغربية” للشاعرة ابتسام حوسني رئيس الاتحاد المغربي للمبدعين، في مكتبة البلد والدعوة عامة. وبعد كده حفلة “لفرقة نوبانور” بمسرح الضمة واللي بـ تقدم مجموعة من الأغاني الشعبية النوبية، سعر التذكرة 30 جنيه و20 جنيه لو حجزت من بدري.

أما لعشاق فن التسعينيات، فالمهرجان الثالث والعشرون للموسيقى والغناء، اللي بـ ترعاه دار الأوبرا المصرية يستضيف “حفل الفنانةنادية مصطفى” يعني أغنية “سلامات سلامات”،”والصلح خير”، “وبكل لغات العالم”، المهرجان اليوم ده في قلعة صلاح الدين في مسرح المحكى، والتذكرة بـ 5 جنيه.وفي نفس المسرح بعد حفلة الفنانة “نادية مصطفى” المهرجان هـ يستضيف “حفلة عازفة الماريمبا نسمة عبد العزيز مع فرقتها“، والتذكرة بـ 5 جنيه.أما لو عاوز تسمع أغاني هادفة وموسيقى ريجي، فمركز الربع مستضيف النهارده “حفلة مشوار“، وسعر التذكرة 25 جنيه.ولعشاق الفن الجميل مكتبة الإسكندرية عاملة “حفلة للفنان محمد محسن” في المسرح المكشوف، والتذكرة بـ 40 جنيه.

آخر حاجة النهارده لمحبي الفن التشكيلي معرض الفنان عمرو هيبة “أحلام سعيدة” في Giz، واللي هـ يستمر ليوم الأحد 31 أغسطس، من الساعة 8 صباحًا للساعة 4 عصرًا كل يوم ما عدا الجمعة والسبت.

ننتقل ليوم الجمعة، لو أنت بـ تحب تقرأ كتب تخطفك من أول لآخر صفحة، تبقى أكيد قرأت أو متحمس تقرأ رواية 1919، عندك توقيع “كتاب 1919” للكاتب أحمد مراد، بمكتبة ألف في مول العرب، وممكن تقرأ مقالنا النقدي عن الكتاب من هنا، والدعوة عامة طبعًا. تعالوا نخرج شوية عن سماع الحاجات التقليدية، وجربوا تسمعوا صوت جميل جدًا في “حفلة المنشد الصوفي الشيخ زين محمود وفرقته” والمعروف بأغنية “يبكي ويضحك” في فيلم باب الشمس للمخرج يسري نصر الله، هـ يكون في مركز الربع الثقافي والتذكرة بـ 20 جنيه. أما لو عاوز تسمع أغاني عالمية بتأثيرات أفريقية عليك “بحفلة فريق هاويدرو“، في مسرح الجنينة بحديقة الأزهر، وسعر التذكرة 10 جنيه غير شاملة تذكرة دخول حديقة الأزهر.

ونختم بيوم السبت، المهرجان الثالث والعشرون للموسيقى والغناءيكمل حفلاته، واللي هـ يستضيف فيها “حفلة الفنان إيمان البحر درويش” في مسرح المحكى 2، وسعر التذكرة 5 جنيه. وبعده هـ يستضيفوا في نفس المكان حفلة “أوركسترا النور والأمل“، اللي مكون من 43 فتاة كفيفة بهروا العالم بإتقانهم وبراعتهم في عزف المقطوعات الموسيقية العالمية، والتذكرة بنفس السعر.

 وفيه كمان “حفل توقيع لرواية هيبتا” للكاتب محمد صادق، اللي عملت ضجة كبيرة أول ما نزلت لرقة المشاعر والوصف الدقيق اللي بـ يشرح فيهمواقف كثير بـ نمر بها في حياتنا، وهـ يوقع كمان رواية “بضع ساعات في يوم ما”، الدعوة عامة في مكتبة “أ” فرع مول العرب. أما لو عندك أفكار عاوز تفيد بها البلد في الوقت ده، يبقى لازم تروح “ندوة أفكار جديدة لإعادة بناء مصر” في ساقية الصاوي، والدعوة عامة. ولو ما جربتش تروح حفلة تنورة قبل كده، يبقى لازم تجرب “حفلة التنورة” بمركز إبداع وكالة الغوري، والتذكرة بـ 5 جنيه.

إحنا اختارنا لك حاجات متنوعة ومختلفة تقدر تعملها في آخر الأسبوع، بس لو عاوز تعرف أكثر عن الأنشطة اللي ممكن تروحها، إحنا بـ ننزل كل يوم طوال الشهر أحداث مختلفة ممكن تستمتع بها، لو دخلت تشوفها على الأجندة هنا.