الحياة في كايرو
دليل أحداث نهاية الأسبوع: ستاند آب كوميدي ومشروع ليلى ودي سلطة ومعرض القاهرة الدولي
بواسطة
Cairo 360
شهر التراب والعواصف الرملية والرمد الربيعي خلص! شهر عيد الأم وعيد الربيع وذكرى تحرير طابا خلص، ربع سنة 2013 خلص! فيه أحداث كثير عدت الشهر ده عجبتنا وفيه أحداث أكثر أزعجتنا، لكن بما أنه خلص فخلينا نختمه بشوية حاجات تفرفش وتغير الموود للأفضل، دائمًا للأفضل؛ خاصة لما تعرف أن الأسبوع ده عندنا عرض ستاند آب كوميدي ومهرجانات تسوق. ثبت علميًا أن السعادة مرتبطة بالقدرة على الشراء أو العكس، يعني الناس بـ تشتري أكثر لما تكون في حالة مزاجية كويسة. فإحنا هـ نقول لكم إزاي تضبطوا الموود وبعدين نقول لكم على أماكن التسوق والشراء.
عرض الستاند آب كوميدي اللي قولنا عليه هـ يكون في قاعة النهر في ساقية الصاوي، وبـ يشارك فيه عدد من الفنانين الكوميديين وهم: علي قنديل ونهى كاطو وأدهم عبد السلام ووليد أبو المجد وصلاح الالي ومحمد مرجان، سعر التذكرة 25 جنيه لأعضاء ولغير أعضاء ساقية الصاوي. روح بدري علشان تلاقي مكان.
بـ نرشح لكم كمان النهارده حفل توقيع ومناقشة كتاب “اشتري مني” للكاتبة والإعلامية دعاء فاروق في مكتبة “أ” فرع الميرغني بمصر الجديدة، الحفل من تنظيم دار دوّن للنشر والتوزيع.
فاضل يومين بس على نهاية معرض القاهرة الدولي للتسوق والتجارة، النهارده وبكرة. المعرض من تنظيم الهيئة المصرية العامة للمعارض والمؤتمرات في أرض المعارض بمدينة نصر “الدورة الـ 46 للمعرض” تحت عنوان “مصر: مدخل إلى التجارة”، يضم المعرض مجموعة من المنتجات المصرية والمستوردة ومستلزمات المنازل وغيرها، وضيف شرف المعرض دولة اليابان.
مشروع ليلى للمرة الثالثة في القاهرة، المرة دي في الجامعة الأمريكية في مقرها الجديد بالقاهرة الجديدة مجهزة لكم حفلة مع مشروع ليلى اللي يعتبر واحد من أهم الفرق في الشرق الأوسط في الوقت الحالي، الفريق اللبناني هـ يقدم مجموعة من أغانيه على موسيقى الإندي بوب المحبوبة. سعر التذكرة 150 جنيه والدخول من الساعة 6 مساءً.
شوية ثقافة بقى، معهد الموسيقى العربية التابع لدار ألأوبرا المصرية هـ يستضيف حفلات برعاية السفارة الفنلندية في القاهرة ووزارة الثقافة على مدي يومين بعنوان “الجسر الموسيقي الفنلندي المصري” الأولى هـ تبقى الليلة دي الساعة 8 مساءً بعنوان حفل موسيقى الحجرة تضم مجموعة من كلاسيكيات الأوبرا لبوتشيريني وموتزارت ودفوراك، أما الحفلة الثانية في نفس الميعاد بكرة الجمعة بعنوان أشهر آريات الأوبرا، والآرية هي أغنية طويلة بصوت منفرد، الحضور مجانًا.
يستضيف مبنى الجراج (الفاكتوري) التابع لتاون هاوس جاليري في وسط البلد فعاليات مهرجان “حل بديل” اللي بـ يهدف إلى خلق مساحات عرض مستقلة جديدة خاصة مع حالة الركود على الساحة الفنية والثقافية المصرية، المعرض مستمر لحد يوم 17 أبريل.
على مسرح الجمهورية الليلة دي فيه حفل غنائي لفرقة عمدان النور، الفرقة بـ تقدم موسيقى عربية بشكل مختلف بـ يفكرنا بنوعية الأغاني اللي كانت بـ تُقدم في الثمانينيات. لهم اسم ثاني وهو Gazaga ومش عارفين معناه إيه! سعر التذكرة 15 جنيه بلكون و25 جنيه صالة ومتاحة لدى شباك الحجز.
فاكرين أغنية “هوبا إيجبشان ستايل” والكليب الشهير بتاعها؟ وحاجات غيرها كثير مطرقعة ومرحة على قناة Disalata على اليوتيوب، جاء الوقت علشان تقابلوا أعضاء Disalata في عيد ميلادهم الأول اللي هـ يقيموه في درب 17 18 بكرة الجمعة. الحفل فيه فقرات ومفاجآت كثير، وهـ يبدأ من الساعة 5 مساءً.
وبكرة كمان فيه حفلة لمجموعة سويت باند. حفل غنائي موسيقي على المسرح المكشوف بدار أوبرا القاهرة هـ يضم مجموعة من مؤلفاتهم بقيادة الفنان منير نصر الدين، سعر التذكرة 15 جنيه و10 جنيه للطلبة.
يوم السبت يقيم الفنان بلال الشيخ وفرقته “سحر الشرق” حفل غنائي على المسرح المكشوف بدار أوبرا القاهرة، هـ يقدم من خلاله مجموعة من أغاني سيد درويش والشيخ إمام وسيد مكاوي ومحمد فوزي بالإضافة إلى الألحان الخاصة بالفرقة، سعر التذكرة 25 جنيه.
الجو جميل ويشجع على الخروج، نصيحة.. ما تضيعش الويك إند ده من غير خروجتين ثلاثة جامدين. لو مش عاجبك حاجة من اللي كتبناه فوق شوف حاجة ثانية تعجبك من أجندة الموقع، المهم تنطلق..
مقترح
معالم وسياحة
موضوع مميز
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
موضوع مميز
