The Definitive Guide to Living in the Capital , Cairo , Egypt

الحياة في كايرو

دليل أحداث نهاية الأسبوع: سهرات الهالوين والمغنى خانة وفرقة الكفافة ومعارض فنية

دليل أحداث نهاية الأسبوع: سهرات الهالوين والمغنى خانة وفرقة الكفافة ومعارض فنية
بواسطة
Cairo 360

بسرعة بـ يخلص شهر أكتوبر، شهر العظماء زي بـ يقولوا عليه، علشان وُلد فيه مشاهير كثير زي ألفريد نوبل وبيكاسو والمهاتما غاندي وبيل جيتس وطه حسين وأحمد شوقي وغيرهم من مشاهير الفن والرياضة، ورغم أنه مرتبط بالخريف والرومانسية اللي بـ توصل لحد الكآبة أحيانًا، إلا أنه له طابع مميز في الخروجات والجو البارد اللذيذ، وبقى لنا كام سنة بـ نشوف فيه برامج تليفزيونية ظريفة بـ تبدأ مع منتصف الشهر لأن الدراسة بـ تخلي الناس تقعد في البيت أكثر وشركات الإنتاج والقنوات الفضائية مش بـ تضيع وقت، بس مهمتنا نخلي الناس تنزل مهما كانت الإغراءات أنهم يقعدوا في البيت، والأسبوع ده فيه شوية حفلات ومعارض جامدة هـ نقول لكم عليها حالًا. 

لو حد عنده خطط للاحتفال بالهالوين والملابس التنكرية والمقالب المرعبة واللي بـ يصادف أنه الليلة دي، هـ نقول لكم على شوية أماكن عاملة احتفالات خاصة في أماكن مختلفة في القاهرة، زي وينجز أند فلافورز في الزمالك اللي عامل حفلة هالوين كاريوكي نايت وتتسلى معاها بأجمد أجنحة دجاج بمذاقات مختلفة.. للحجز اتصل بـ 01141501310

وممكن تقضي حفل الهالوين السنة دي على النيل في بي بي 2 كلوب في مركب تريانون في الجيزة، مع دي جي موروفيتش، بيدرو ومارتن اللي هـ يلعبوا أجمد تراكات الآر أند بي والهيب هوب والهاوس، التذاكر بـ 200 جنيه.

فريق سكرو درايفر هـ يلعب أجمد أغاني الروك أند رول والفانك في حفل خاص بمناسبة الهالوين في كايرو جاز كلوب والحفل بعنوان Trick Or Treat والحفل هـ يبقى تنكري وفيه جائزة لأحسن ملابس تنكرية. الحجز ضروري طبعًا.

وبعيد عن أجواء الهالوين الليلة دي آخر ليلة عرض لمسرحية “الغرب الحقيقي” للمخرج جهاد الشيخ واللي كتبها سام شيبرد وتحكي عن أخوين التقيا بعد فراق دام 5 سنوات. المسرحية تعرض على مسرح الفلكي في قاعة جيرهارت وتذكرة الدخول بـ 5 جنيه.

فرقة الكفافة التراثية هـ تلعب النهارده في مسرح الضمة، اسم الفريق مشتق من فكرة صوت التصفيق اللي بـ يتسبب فيه اهتزاز النخل في صعيد مصر، وهم بـ يقدموا الموسيقى التراثية والرقصات الفلولكلورية. التذاكر بـ 20 جنيه عند الحجز وبـ 30 جنيه على الباب.

والليلة فرقة المزيكاتي هـ تقدم حفل موسيقي في قاعة الحكمة بساقية الصاوي، سعر التذكرة 20 جنيه.

وفي نفس التوقيت في قاعة النهر حفل أغنيات مصرية معاصرة لفرقة المغنى خانة، وسعر التذكرة 15 جنيه.

يقدم مغني الراب المصري “أبيوسف” حفل على مسرح الجنينة، يقدم من خلاله أهم أغانيه اللي جاي مضمونها من الشارع وألعاب الفيديو والرياضة والأفلام المصرية، أبيوسف كسب شهرته من أغنية “سباجتي”، سعر التذكرة 10 جنيه بخلاف تذكرة دخول الحديقة.

أيام الجمعة والسبت ممكن تزور معارض زي معرض الفنان المصري النرويجي بريت بطرس غالي اللي بـ يقدم فيه أعماله المعاصرة اللي حازت على شهرة عالمية في معرض بعنوان “تحرك إلى الأمام” في بيكاسو آرت جاليري. المعرض مفتوح لحد يوم 10 نوفمبر اللي جاي.

معرض ثاني بعنوان “مشاعر قبيحة” مستلهم من مقالة للكاتبة آنيا سزريمسكي اللي بـ تلقي الضوء على المشاعر السلبية وآثارها على الراحة النفسية للإنسان وقدرته على الإنتاج في عمله وحياته. وفكرة المعرض مرتبطة بظروف صعبة مرت بالتاون هاوس نفسه في الفترة من 2011 وحتى وقت قريب. يتم عرض فيلم بنفس العنوان ويليه حلقات نقاشية. المعرض مستمر لحد يوم 20 نوفمبر.

انتظرونا ببرنامج قوي جدًا لحفلات شهر نوفمبر وفعاليات عدد من المهرجانات اللي هـ نكتب تفاصيلها أول بأول على أجندة الموقع، ونشوفكم على خير يوم الخميس اللي جاي.

مقترح