The Definitive Guide to Living in the Capital , Cairo , Egypt

في أسبوع أهم ما يميزه الجو المشمس وبعض الدفء، أحلوت الخروجات بالليل مع شوية الهواء البارد اللي بـ ينعشك بس مش بـ يخليك تتكتك، لاقينا نفسنا عاوزين نرشح أماكن مفتوحة كثير للخروج والسهر، خاصة وأجازة نصف السنة شكلها هـ تلحم في آخر السنة، والشباب ما هـ يصدق ينطلق بعد ما ضاعت أجازات كثير في أوقات الحظر والقلق في الشوارع. لكن المشكلة أننا ما لاقيناش حفلات في الهواء الطلق زي ما كنا متوقعين، لكن كلها حاجات مقفولة وقاعات، حتى الأوبرا ما كانش فيها أي عروض على المسرح المكشوف.

نبدأ بالنهارده على المسرح الصغير الموسيقار وعازف الدرامز يحيى خليل هـ يقدم حفل بدار الأوبرا المصرية، هـ يلعب فيها مع فرقته أشهر مقطوعاته ومؤلفاته الموسيقية وأكيد بعض صولوهات الدرامز، لمزيد من المعلومات اتصل بـ 0227390144 والدخول بالملابس الكاجوال العادية. 

مركز المصطبة للموسيقى الشعبية المصرية هـ يقدم الليلة دي الحفل الموسيقى لفرقة  “الطنبورة” اللي بـ تقدم مزيكا محافظات القناة وأغاني السمسمية، وهي من الفرق الأطول عمرًا بين فرق المركز. سعر تذكرة حضور الحفل 30 جنيه عند الباب وعند الحجز المسبق20 جنيه. 

نشاط مكثف لجاليري المشربية الأسبوع ده، عجبنا 3 معارض فنية متنوعة وحبينا نقول لكم عليها، الأول بعنوان Sheer Strength لـ 4 فنانات: هالة أبو شادي، دينا الغريب، سعاد عبد الرسول، فدوى رمضان ويضم المعرض لوح من الرسم والكولاج والتصوير الفوتوغرافي، الدعوة عامة والمعرض مفتوح يوميًا عدا الجمعة، ومواعيده بـ تبقى من 11 صباحًا حتى 8 مساءً. 

ثاني معرض بعنوان “حكايات سندريلا” للفنانة شيماء كامل وتتناول فيه أفكار كان المجتمع ولا يزال يحكيها للأطفال الصغار عن العالم الخيالي وعادة ما يكون هدف الحاكي هو عظة مستفادة من الحكاية مش الحكاية فى حد ذاتها، الدخول مجانًا طبعًا.

والمعرض الأخير هو معرض للفنانة منى أباظة تحت عنوان “في البدء كان القطن” اللي بـ يضم أعمال لرصد عصر بائد بعاداته وتقاليده وبين قرى اليوم بتحولاتها وانهياراتها. المعرض مستمر لحد يوم 10 أبريل اللي جاي، واللي مش عارف فين جاليري المشربية هـ نقول أنه في شارع شمبليون في وسط البلد، ولمزيد من المعلومات عن المكان والمعارض اتصل بـ 01001704554.

يوم الجمعة هـ يقام مهرجان الشارع اللي بـ تقدمه ساقية الصاوي كل سنة من فترة طويلة، هـ يبقى في قاعة النهر وهـ يتقدم فيه مختلف فنون الشارع، والهدف من المهرجان هو تذكير الناس بها بعد ما قربت تختفي تمامًا من شارعنا المصري. 

مسرح الفلكي في الجامعة الأمريكية بـ يقدم حفلة لفرقة الثورجية وهي من أقدم فرق الراب المصري، وتقدم الفرقة عروض مميزة لكل من أحمد روك، محمد تمراز، روني هودستار، محمد فوزي، بالإضافة لمفاجئتين للجمهور، سعر التذكرة 30 جنيه.

فرقة بيت الرصيف المسرحية هـ تقدم بكرة مسرحية بعنوان “لحظات ويبدأ العرض” وهي نتاج ورشة بيت الرصيف للتمثيل في المعادي. تدريب وإخراج أُسامة عبد الماجد، الدعوة عامة. 

المركز مشكاة الثقافي بـ يقدم كرنفال لمدة يومين، بكرة وبعده، يتضمن سوق للمنتجات اليدوية، حفلات توقيع كتب بحضور مؤلفيها، حفلات موسيقية غنائية، ندوات ومحاضرات، لمزيد من المعلومات اتصل بـ 01282234566.

دار الأوبرا المصرية هـ تقدم حفل موسيقى الحجرة على المسرح الصغير للعازفين محمود عثمان وإيمان أمين مع برنامج من أعمال بيتهوفن وجريج، سعر التذاكر 10-5 جنيهات. 

يوم السبت مش هـ يبقى أحلى من ليلة مع الستاند آب كوميدي مع علي قنديل والليلة بعنوان “إحنا بنصدق إيه ومش بنصدق إيه” وبـ يستضيف علي كمان الساحر jago وأعماله السحرية. سعرالتذكرة 25 جنيه. 

على أجندة كايرو 360 فيه أحداث في أماكن ثانية كثير زي درب 17 18 ومسرح روابط، وفيه سهرات في تاماراي وكايرو جاز كلوب، تابعونا أول بأول علشان لو غيرتم خططكم في آخر لحظة، وعاوزين تعلموا حاجة مختلفة.. نشوفكم كمان أسبوع.