دليل أحداث نهاية الأسبوع: عمر خيرت ورمزي يسى وبلاك تيما وأكشن سيارات وميكروفون مفتوح
Cairo 360
مساء الخير على أهل كايرو، أخبار عيد الأم إيه؟ والهدية عجبت ست الحبايب ولا
إيه؟ طيب فيه حد لسه ما جابش هدية أو اللمة في بيت العائلة تأجلت للويك إند؟ إحنا
بس حابين نفكرك أنك ممكن تلقي نظرة على الموضوع اللي نشرناه في بداية الأسبوع عن أماكن الخروج والهدايا المناسبة لعيد الأم.
ثاني مناسبة كويسة الأسبوع ده هي أننا دخلنا رسميًا في
فصل الربيع، صحيح لسه الجو متقلب يوم برد ويوم حر ويوم تراب لكن ما حدش ينكر أن ده
وقت مثالي للخروج إلا إذا كنت من اللي بـ يحبوا يقعدوا في البيت يتفرجوا على
استعراض (آدي الربيع عاد من ثاني) لفريد الأطرش المقدس في أعياد الربيع.
حفلات موسيقية كثير قوي النهاردة، أولًا في ساقية الصاوي
النهاردة فيه حفل لفريق “صحرا”
اللي بـ يقدم موسيقى الراي الممزوجة بالروك والنغمات الشرقية، توليفة عجيبة مش هـ
تلاقيها إلا مع “صحرا” في قاعة الحكمة الساعة 8 بالليل.
وفي الزمالك برضه وفي مركز صوفي الثقافي عندك فرصة تعبر
عن مواهبك المدفونة أمام الميكروفون، اطلع غني أو قول نكت أو العب مزيكا في ليلة المايك المفتوح في صوفى اللي هـ تبدأ الساعة 8
النهاردة، والدعوة عامة.
وزي ما تعودنا عندنا في قاعة الطنبورة في وسط البلد فرقة الطنبورة البورسعيدية، اللي لها تراث وخاصية فريدة وهي (عبور الزمن) وده لسبب بسيط جدًا وهو
تراوح تاريخ ميلاد فنهم الشعبي ما بين 80 إلى 200 سنة ويمكن أكثر، خاصة أغاني
الضمة الصوفية. استمتعوا معهم يوم الخميس في قاعة الطنبورة مع باقة مميزة من
أغانيهم الشعبية الرائعة.
وعلى مسرح روابط في وسط البلد فيه حفل للفنان جوني وفرقته هـ يبدأ الساعة 7، وفي كايرو جاز كلوب في المهندسين فيه حفل أغاني أكوستك للفنانة ياسمين طيبي، وبعدها فريق ديجا فو، الحفلات
بـ تبدأ الساعة 8، والحجز مطلوب.
وفي ملوك بار في الدقي ولهواة موسيقى الهاوس فيه حفل
بعنوان بيوتي آند ذا بيتس Beauty & The Beats هـ يلعب فيها مجموعة من أحسن الدي جي في مصر، Mof & B وTimour’O و Vander G.
ممكن تحجز تذكرتك من خلال موقع تذكرتي.
حفل الفنان عمر خيرت في
الجامعة الأمريكية بالقاهرة الجديدة يوم الجمعة 23 مارس، سعر التذكرة
130 جنيه، جرب تتصل وتعرف لسه فيه تذاكر ولا خلصت، لكن الأمل ضعيف.
يوم الجمعة عندنا حفل لفرقة تاكسي ودي جي زيزو في
“أوبيم” الموجود في مركب بلو نايل، بوفيه مفتوح والحفل هـ يبدأ من الساعة
2 ظهرًا، وحد أدنى للدخول 175 جنيه.
ليلة من تراكات الفانك والهاوس مع دي جي Master at Funk في كايروجاز كلوب يوم الجمعة، الحفل هـ يبدأ 10 مساءً.
وكل عشاق فرقة بلاك تيما،
ميعادكم مع حفل الفريق في ساقية الصاوي يوم الجمعة الساعة 6 مساءً، وسعر التذكرة
30 جنيه في قاعة النهر.
يوم السبت يوم قوي جدًا، ريد بول عاملة يوم أكشن
بالسيارات في ساحة ستاد القاهرة بمدينة نصر، أقوى عروض
ومهارات القيادة برعاية Red Bull من الساعة 12 ظهرًا لآخر اليوم. الحق احجز تذكرتك من موقع تذكرتي.
بالنسبة للحفلات ممكن تحضر عرض
التنورة والإنشاد الصوفي والآلات الموسيقية الشعبية (الربابة – السلامية – المزمار – الصاجات
– الطبلة) في وكالة
الغوري الساعة 7:30 مساءً، والعرض بـ يتكرر أيام الاثنين والأربعاء.
وعلى المسرح الكبير في دار الأوبرا المصرية يقدم عازف
البيانو المصري العالمي رمزي يسى بمصاحبة أوركسترا
القاهرة السيمفوني حفل في تمام الساعة 8 مساءً، التذاكر متوفرة بدار
الأوبرا.
أغاني شرقي بمذاق الجاز المختلف في حفل الفنان توني قلدس في كايرو جاز كلوب يوم السبت،
اتصل واحجز مكانك.
لهواة الشعر هـ يكون أمسية
شعرية في ساقية الصاوي النهاردة في قاعة الكلمة مع الدكتور أحمد تيمور.
وبالنسبة للسينما: في مركز صوفي هـ يتم عرض فيلم عربي بعنوان «منفصل متصل» الساعة 5:30 مساءً وبعدها عرض فيلم «لاسترادا»
بطولة أنتوني كوين الساعة 7 مساءً، الكلام ده يوم الجمعة والدعوة عامة.
ولو عاوز معارض فنية ممكن تروح معرض “بسمة الأمل” المقام في قصر الأمير طاز
والمستمر حتى يوم 31 مارس أو معرض “كناسة الدكان”
للفنان مصطفى الرزاز في قاعة بيكاسو للفنون أو معرض “شرق..غرب”
للفنان المصري المعاصر طه حسين، المعرض في جاليري المسار للفن المعاصر، ومفتوح كل
يوم ماعدا الجمعة.
نتمنى لكم أجازة جميلة ومختلفة، وتابعوا أجندة موقعنا ممكن تلاقوا حدث جديد ظهر فجأة في
الويك إند وإحنا مش كاتبين عنه في المقال ده.
مقترح
معالم وسياحة
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
