The Definitive Guide to Living in the Capital , Cairo , Egypt

يوم السبت اللي فات وإحنا بـ نستعد لآخر خروجة في الويك إند لقينا أسراب الجراد مغطية سماء التجمع الخامس والطريق الدائري وأول حاجة جاءت في بالنا ساعتها أننا كان المفروض نكون متوقعين حاجة زي كده ونفتكر نقول لقراءنا عليها، مش للتحذير أو التخويف، ولكن من باب العلم بالشيء لأن ردود الأفعال اختلفت مع وجود الجراد، فيه اللي خاف وقعد في البيت وقفل الأبواب والشبابيك، وفيه اللي خرج بالكاميرات وقعد يصورها ويرصد حركتها، في النهاية الموضوع بالنسبة لنا كان مش أكثر من حاجة جديدة بـ تحصل في القاهرة، وكان لازم نرصدها ونعرفكم بها، عمومًا تتعوض في أي ظاهرة طبيعية جاية.

الأسبوع ده فيه عدد من الحفلات والمعارض الفنية ومهرجانات التسوق، وبـ نفكركم بأسبوع أفلام سينما جواتيمالا في المركز الثقافي الأسباني “ثربانتيس” اللي لسه مستمر الأسبوع ده كمان.

الليلة دي في كايرو جاز كلوب اسمع أغاني ألبوم فريق مسار إجباري الجديد “اقرأ الخبر”، ده عنوان الألبوم اللي هـ يغنوا منه أغاني حصريًا لجمهور كايرو جاز كلوب وقبلهم مي وليد هـ تكون على المسرح بـ تقدم أغاني إندي بوب، الحجز ضروري.

من المعارض الفنية اللي بـ نرشحها للزيارة الأسبوع ده معرض الفنان خافيير بويجمارتي بـ يقدم مجموعة من أحدث أعماله في جاليري المشربية تحت عنوان سحب للبيع. المعرض بدأ في منتصف شهر فبراير اللي خلص ومستمر لحد يوم 14 مارس.

بكره الجمعة هـ يبقى اليوم العالمي للمرأة، توجهوا مع أطفالكم وكل اللي بـ تحبوهم إلى بازار إكسيليجانت في قطامية جاردنز كلوب على بُعد 5 دقائق من كارفور المعادي، البازار هـ يضم مجموعة من معارض الملابس الحريمي والإكسسوارات والشنط والديكورات وحاجات ثانية كثيرة، كمان يوم مميز منتظر أطفالكم هـ يستمتعوا فيه  بعروض الساحر والأراجوز والدي جي ومسابقات ومفاجآت أخرى، يوم ما يتفوتش.

الجمعة يعني سهر الإلكترو في كايرو جاز كلوب، علشان كده مسرح كايرو جاز مش هـ يكون عليه أي حد في السهرة دي اللي هـ تبدأ مع دي جي مارس بتراكات التكنو والهاوس وبعده الدي جي الخطير عمرو حسني، اتصل واحجز مكانك قبل ما تروح.

مشروع المريخ في ميعاده الجمعة الثانية من كل شهر في قاعة الأنكس في درب 17 18 في منطقة الفسطاط. المشروع يحتوي على عدد من المبادرات لدعم حرية التعبير عن النفس بين المصريين في كافة ثقافاتهم، وعروض فنية للموهوبين في كل المجالات. الحضور مجانًا.

يوم السبت يقدم الفنان والموسيقار الرائع عمر خيرت حفلًا موسيقيًا يتضمن مجموعة من مؤلفاته الموسيقية في قاعة النهر بساقية الصاوي، سعر التذاكر 100 جنيه أول وثاني صف، 80 جنيه ثالث ورابع صف، 60 جنيه جلوس و40 جنيه وقوف. احجز مكانك من دلوقت.

مركز نَن بـ ينظم سوق لعرض منتجات المزارعين والحرفيين لتحفيزهم على الإنتاج بصورة جيدة، المركز بـ يضمن لكم جودة جيدة وبضائع طازجة. مركز نَن موجود في شارع شفيق منصور في الزمالك لو ماحدش سمع عنه قبل كده.

حديقة الأزهر تعتبر من أنسب الأماكن اللي ممكن تمارس فيها التأمل اللي بـ يعتمد على أسلوب التنفس والطاقة الروحية بداخل الإنسان زي اليوجا وما شابه، الحصص مجانية ولكن هـ تدفعوا 7 جنيه ثمن التذكرة. تأكدوا أنكم لابسين ملابس مريحة وهاتوا معاكم حاجة تقعدوا عليها، لمزيد من المعلومات اتصلوا بـ 01093548720 أو 01061425610.

ما تنسوش تلقوا نظرة على أجندة كايرو360 وهـ تلاقي أكيد أحداث تانية مهمة بالنسبة لك، وما تنسوش كمان ترسلوا لنا الأحداث الثقافية والفنية الخاصة بكم علشان ننشرها على أجندة الموقع ونعرف كل الناس بها. الشكل الجديد للموقع بـ يتيح الموضوع ده وعاوزين نحقق به أكبر قدر من التفاعل مع أصدقاء كايرو 360..
أجازة سعيدة..