The Definitive Guide to Living in the Capital , Cairo , Egypt

عارفين أن موضوع أجازة 6 أكتوبر اللي جاية يوم سبت دي عكننت على ناس كثير من اللي ما عرفوش يأخذوا يوم الأحد بدالها زي ما الحكومة قالت، أصلنا بـ نقعد نخطط ونرتب إزاي نوصل يوم 6 أكتوبر ده بالويك إند حتى لو كان جاي يوم ثلاثاء! ونطلع على أي حتة فيها بحر، لكن السنة مش نافع معاها أي حسبة، بس ده من حسن حظنا علشان تفضلوا قاعدين معانا في القاهرة ونقول لكم على حاجات تعملوها في الويك إند.

التنوع هو السمة الغالبة على الأحداث الثقافية والفنية الأسبوع ده، هـ نذكر تقريبًا 10 أحداث مش شبه بعض ولا لهم علاقة ببعض. نبدأ بالنهارده الخميس بحفلة ظريفة كده للموسيقار فتحي سلامة ومجموعة شرقيات اللي هـ يقدموا حفل موسيقي على المسرح المكشوف بدار الأوبرا المصرية. الحفل يتضمن أشهر مؤلفات فتحي سلامة الغنائية والموسيقية وأعماله الخاصة اللي حصلت على جوائز عالمية.

في مركز “مدرار” الثقافي الموجود في جاردن سيتي هـ يكون فيه معرض بعنوان “شهادات محتملة” اللي بـ يضم أعمال لفنانين كثير وهو نتاج ورشة عمل جمعتهم ببعضهم. المعرض بدأ يوم 26 سبتمبر ومستمر حتى يوم 11 أكتوبر.

مؤسسة المورد الثقافي هـ تقدم الدورة الثانية من مهرجان القاهرة الدولي للسيرك “سيركايرو” اللي هـ يبدأ النهارده وهـ يستمر من 4 إلى 20 أكتوبر، برنامج المهرجان هـ يضم عروض لأكثر من 13 فرقة سيرك من أماكن مختلفة من العالم وهـ تقام العروض في أماكن وميادين عامة في مصر، أول فعاليات المهرجان هـ تبقى في ميدان عابدين في القاهرة والفرق المشاركة هي: مدرسة الدرب الأحمر من مصر، رضوان شو من تونس، أم سيركس من بلجيكا، ريبيل أكت من هولندا، فريق الكوشة للعرائس من مصر والسيرك المصري. الحضور مجاني طبعًا.

في ساحة روابط للفنون هـ يكون فيه عرض الليلة دي وبكره بعنوان العجلة والقمر وهو عرض مسرحي درامي من إخراج ريم حجاب وكتبه عصام اللباد. فيه راحة يوم السبت وهـ يكون فيه عرض أخير يوم الأحد 7 أكتوبر. الدخول الساعة 8 مساءً.

يوم الاثنين اللي فات تم افتتاح معرض بعنوان “الفيروس ينتشر” في جاليري سفرخان بـ يعرض فيه أعمال الفنان جنزير المعروف بنشاطه الفني في 2011 والمشهور بخطوطه الجريئة والجرافيتي اللي بـ يرسمه، والمعرض مستمر لمدة شهر.

وبمناسبة ذكرى حرب أكتوبر المجيدة هـ يعقد لقاء مفتوح مع أبطال حرب أكتوبر بعنوان «حكاية النصر» بقاعة النهر بساقية الصاوي النهاردة الساعة 6 مساءً، والدعوة عامة.

النهارده ينطلق مهرجان شنيت للفيلم القصير في مركز درب 17 18  بمشاركة أكثر من 200 فيلم في المسابقة الرسمية و8 أفلام في المسابقة المحلية. يكون العرض ما بين 3 و7 أكتوبر في 10 مدن في العالم، ودلوقتي انضمت القاهرة في السنة العاشرة للمهرجان علشان تكون محطة شنيت في الشرق الأوسط للمرة الأولى، كل يوم هـ يتم عرض ما لا يقل عن أربعين فيلم تم اختيارهم من وسط أفضل ما تقدمه صناعة الفيلم القصير في العالم. سعر التذكرة 30 جنيه.

يوم الجمعة فيه حفلة عجيبة وفريدة في أوتيم في الزمالك، الحفلة بعنوان Glow وهـ تبقى مليانة أضواء نيون علشان كل الموجودين هـ يبقوا منورين وعينهم بـ تزغلل في نفس الوقت، والرقص هـ يبقى على تراكات دي جي ريتشارد آر ودي جي مايكول. الحجز ضروري والدخول الساعة 10 مساءً.

وعلى المسرح المكشوف بكره كمان هـ نشوف فرقة عمدان النور في حفل على المسرح المكشوف بدار أوبرا القاهرة. فرقة عمدان النور بـ تقدم إبداعات غنائية حديثة مبنية على موروثاتنا المصرية القديمة بطعم موسيقى القرن الـ 21، تأسست الفرقة فى أغسطس 2011  بقيادة “يحيى نديم”. التذاكر على الأبواب والدخول الساعة 8 مساءً.

يوم السبت فيه حفل أوركسترا القاهرة السيمفوني على المسرح الكبير بدار أوبرا القاهرة بقيادة هشام جابر وبمصاحبة مشيرة عيسى على البيانو وهـ يقدموا مقطوعات كلاسيكية لبيتهوفن وشوبان. الحفل يبدأ الساعة 8 مساءً والدخول بالملابس الرسمية.

حاولنا نرضي جميع الأذواق في اختيارنا للأحداث الثقافية الأسبوع ده، فيه موسيقى وأفلام ومعارض وندوات، وفيه الأكثر من ده كله كمان على أجندة الموقع لو حابين تأخذوا فكرة. أجازة سعيدة ومفيدة إن شاء الله.