The Definitive Guide to Living in the Capital , Cairo , Egypt

مساء الخير! إيه الأخبار؟ يمكن يكون عندكم أخبار غير اللي عندنا! أخبار كويسة مثلًا! طيب إحنا كالعادة بـ نحاول نسبح ضد التيار وبـ نحاول نهدي أعصابنا وندعو الناس كمان أنها تهدي أعصابها وتخرج على قد ما تقدر من البيوت وتروح تحضر حفلة ولا معرض ولا حتى ندوة، ده طبعًا لو الطريق مش مقفول أو مقطوع، ومافيش محاولات اقتحام لمبنى أو مؤسسة في الطريق، أو مافيش تبادل إطلاق نار في خناقة.

جدول الأحداث الثقافية والفنية مليان حاجات تتعمل الأسبوع ده، ومافيش أي تأجيلات أو إلغاءات إلا في دار الأوبرا اللي داخل بؤرة الأحداث وده حفاظًا على سلامة الزوار، لكن الأنشطة الثقافية مستمرة وبقوة.

في مكتبة ديوان فرع الزمالك ممكن تحضر حفل توقيع كتاب «أنا من أرض كلكامش» من تأليف الكاتب العراقي خالد معالي والدعوة مفتوحة للجميع طبعًا.

معرض من طراز خاص تم افتتاحه من كام يوم، تحت رعاية قطاع التنمية الثقافية وفي قصر الأمير طاز، معرض تصوير وتوثيق لفن الجرافيتي بعنوان “الحيطة دي بتاعتي” للفنان د. نبيل بهجت، يحتوي على 50 لوحة تصوير فوتوغرافي لأعمال جرافيتي رسمها الشباب على جميع جدران مصر، ويعتبر المعرض خطوة ضمن مشروع ضخم يعده الفنان نبيل بهجت لتقديم كل ما يخص الثورة المصرية.

كاديلاكس فريق روك أند رول مميز تقريبًا هم نفس أعضاء فريق جوكرز اللي لهم معجبين كثير في كايرو جاز كلوب. كاديلاكس بـ يوعدوكم بسهرة مختلفة وأغاني جامدة، بعدها بـ تبدأ فرقة كراش بوم بانج بموسيقى وأغاني الروك والبوب والفانك، والحجز ضروري.

الليلة دي كمان فيه حفل للفنان محمد محسن على مسرح الجمهورية التابع لدار أوبرا القاهرة. محمد هـ يقدم مجموعة من الأغاني اللي بـ تعبر عن الواقع في الشارع المصري زي “قوم يا مصري”، و”أهو ده اللي صار” بالإضافة إلى أغانيه الخاصة، التذاكر متاحة في شباك الحجز والحفل هـ يبدأ الساعة 8 مساءً.

نروح لساقية الصاوي وحفل غنائي للفنان سامر أبو طالب أحد المتنافسين السابقين في برنامج The Voice  في قاعة الحكمة بساقية الصاوي، سعر التذكرة 20 جنيه لأعضاء ولغيرأعضاء الساقية.

آخر حاجة النهارده حفل المغني أسامة الهادي في مكتبة صوفي بالزمالك. أسامة مطرب في فرقة زيرو خمسين بالمنصورة لموسيقى الروك وحقق شهرة بظهوره في بداية أغنية “علشان لازم نكون مع بعض” في رمضان اللي فات علشان يثبت أنه فنان بكل معنى الكلمة.

يوم الجمعة أسماء عزوز وشروق الزمر هـ يعرضوا مهاراتهم في موسيقى الإلكترو في مركز 100 كوبيس ميوزيك سبيس الثقافي في وسط البلد، لمزيد من المعلومات ممكن تتواصلوا مع المركز بالتليفون.

وفرقة تالتة تالت بـ تقدم حفلتها الأسبوعية في أفتر 8 بوسط البلد في سهرة متنوعة من الموسيقى المصرية المعاصرة، وهناك الحد الأدنى للطلبات 100 جنيه، والحجز مهم بالتليفون.

ويوم السبت الفنان النوبي محمد بشير هـ يغني مجموعة من أحلى الأغاني النوبية والفلكلورية بستايل الجاز الشرقي الخاص به وبفرقته في سهرة ما تتعوضش في كايرو جاز كلوب، والحجز ضروري في كايرو جاز كلوب.

فعاليات معرض القاهرة الدولي للكتاب مستمرة، وبكرة وبعده هـ يكون عدد كبير من حفلات التوقيع للكتب هـ يحضرها عدد من المفكرين والمثقفين، اعرف مواعيد وأماكن الندوات وحفلات التوقيع من أجندة الموقع، بالإضافة لعدد من المعارض اللي لسه مستمرة معانا من الأسابيع اللي فاتت، وادعوا معانا ربنا يعدي الأيام دي فى مصر على خير.