The Definitive Guide to Living in the Capital , Cairo , Egypt

الحياة في كايرو

خريطة الأكل.. مطاعم لازم تجربها في حي الزمالك

أفضل مطاعم الزمالك الزمالك خروجات الزمالك دليل الأكيلة دليل المطاعم مطاعم الزمالك
خريطة الأكل.. مطاعم لازم تجربها في حي الزمالك
بواسطة
Mohamed Talaat

كل منطقة في القاهرة فيها اللي بيميزها، وفيها القديم والجديد، وفي كل منطقة في العاصمة المصرية هتلاقوا مجموعة من المطاعم المختلفة واللي ليها شهرة تخلي الناس تروح لها مخصوص من مناطق وبلاد تانية، وإحنا في كايرو 360 قررنا نعمل دليل للأكيلة في كل مناطق القاهرة، علشان نقول لكم إيه أشهر المطاعم في كل منطقة، والبداية هتكون مع حي الزمالك العريق.

Vinny’s Pizza

طعم البيتزا في الزمالك وقعدة Vinny’s بتكون مختلفة، علشان الأجواء كلها هتخليك تحس إنك في إيطاليا بجد، حتى ديكوراتهم بسيطة زي تنسيق مدينة روما الإيطالية، والطعم مالوش حل بالتأكيد.

العنوان: ٢ شارع طه حسين تقاطع اسماعيل محمد – بجوار كلية تربية فنية.

O’s Pasta

مش عاوزين نبالغ ونقول إن المكان ده من أفضل أماكن الباستا اللي بتتعمل زي ما قال الكتاب، جودة وطعم وحلاوة، وفوق ده كله الخدمة ممتازة.

العنوان: 126 شارع 26 يوليو.

Maison Thomas

ميزون توماس ده بقى حكاية لما بتجربه مرة مش هتنساه طول العمر، سواء في الباستا أو البيتزا اللي جايين من إيطاليا مش معمولين في مصر، حقيقي من أفضل المطاعم اللي بنرشحها بقوة لأي محب للبيتزا والأكل.

العنوان: 157 شارع 26 يوليو.

أبو السيد

رغم أن تجربتنا آخر مرة في أبو السيد ماكنتش أحسن حاجة إلا أنه يظل علامة بارزة ضمن قائمة أشهر مطاعم الزمالك، وهو بيقدم أكل مصري أصيل.

العنوان: 157 شارع محمد مظهر.

Meaet Studio

لو عاوزين لحمة روحوا لـMeaet، علشان اللحمة هناك ليها طعم تاني مع فيو عظيم هيخليكم تستمتعوا بجد.

العنوان: 53 شارع أبو الفدا تقاطع محمد مظهر.

Wok and Walk

بيقدموا أكل أسيوي من أفخر النواع، وكمان عندهم اختيارات كتير، وحقيقي تجربتنا فيه عظيمة سواء في فرع الزمالك أو المعادي.

العنوان: شارع 26 يوليو بجوار ستاربكس.

The Batter Half & Co

ريحة المخبوزات هتوصلكم لمكانه بدون تعب، وهو الأفضل لو حابين تفطروا مخبوزات ومعجنات وحلويات بجودة عالية ومزاج في الأكل.

العنوان: 17 شارع محمد مظهر.

Roof Top

من أجمل وأقدم وأرقى الأماكن في الزمالك اللي تقدروا تاكلوا وتشربوا فيها بحب وسط أجواء من الطبيعة المميزة وخدمة منفردة.

العنوان: 21 المعهد السويسري ميدان صدقي أعلى فندق النيل.

River Bank

مطعم مميز بفيو على النيل مباشرة بيقدم أشهى أنواع الأكل وسط ديكورات تليق بالنيل والجو الجميل والخدمة الهادئة.

العنوان: 15 شارع أبو الفدا.

Zooba

هو أشهر وأغلى مطعم فول في الزمالك، ويمكن في القاهرة كلها ولكن جودة الأكل أفضل حاجة هتلاقيها، وهتستمتعوا بكل لقمة من عندهم.

العنوان: 16 شارع 26 يوليو.

وأخيرًا..

غير الأكل، ماتنسوش لو نزلتوا الزمالك تزوروا قصر عائشة فهمي وتستمتعوا بجمال القصر، وكمان ممكن تحضروا فعاليات ثقافية في ساقية الصاوي، وحديقة الأسماك للاستمتاع بالمناظر الخلابة، ولو أنتم من هواة الكتب فأشهر مكان في الزمالك هو صوفي بوك ستور.

مقترح