The Definitive Guide to Living in the Capital , Cairo , Egypt

الحياة في كايرو

دليل الستات عن العربيات

دليل الستات عن العربيات
بواسطة
Meriam Wagdy

رجالة كتير لما حد يكسر عليهم وهم سايقين أو
يجي يركن قدامهم وياخد وقت كتير نلاقيهم بـ يقولوا “طبعاً ما اللي سايق
ست!” ده غير ان الستات عالمياً سمعتهم وحشة في التعامل مع العريبات – مع اننا
أكيد فينا من أحسن السواقين في العالم. لكن ده ما يمنعش اننا في حاجات كتير قوي
مابـ نبقاش عارفينها ولا فاهمينها عن العربية. فقررنا اننا نقتحم عالم العربية
اللي الرجالة مسيطرين عليه وعندهم قناعة ان الستات عمرهم ما هـ يفهموا فيه. فهـ نتكلم
عن الأسماء العجيبة لبعض أجزاء العربية، والمشاكل الشائعة اللي بـ تواجه العربية،
وبـ نصلح ايه فين، وشوية إرشادات أساسية.

أجزاء العربية بأسماءها الدارجة:

الشاسيه : وده الجزء من العربية اللي بـ يمثل الهيكل السفلي ليها،
والجزء ده بـ يصلحه سمكري كبير (أو ورش إستعدال شاسيه).
العفشة: هي عبارة عن علبة الدريكسيون والمساعدين السوست والمقص (الحديد
اللي ماسك العجل)…فهي بـ تتحكم في إتجاه العربية، ودي بـ يصلحها «عفشجي».
الموتور: وده بـ يصلحه ميكانيكي.
داخل العربية: وده بـ يصلحه السروجي أو الكهربائي.

أسماء عجيبة ومعانيها:

الأسماء العجيبة اللي غالباً ما بـ تكون
أسامي فرنساوي أو إنجليزي بس متعربة، كتيرة جداً، بوجيهات، كتاوت ( cut outs )، بوبينا، فتيس ( Vitesse )   حتي مارشيدير أصلها « marche arrière » ومن معاني المصطلحات الغربية دي:

الكتاوت: أصلها « cut
out » وهي قاطع تيار كهربي.
البوجيهات: دي وظيفتهم إشعال الشرارة التي تقوم بإشعال الوقود.
البوبينا: محول كهربي.
التنبورة: جزء من الفرامل يساعد على إيقاف العربية.

والباقي كتير جداً ويصعب علينا حصره.

مشاكل شائعة:

في مصر ان العربية تـ تخبط دي مش حاجة عادية
وبس، دي كمان متوقعة، وبقينا مستنينها في أي وقت، فلما يحصل ما فيش داعي للزعل كله
صاج بـ يودينا من مكان للتاني في الآخر. في حالة انك مش مأمنة على العربية، مع ان
دي حاجة في شدة الأهمية في القاهرة، لما العربية تتخبط والصاج يتطبق، لو الخبطة
خفيفة يعني مش مأثرة على الشاسيه أو عضم العربية بـ تصلحيها عند السمكري وده سعره
(لو كانت الخبطة في جزء واحد رفرف – باب..إلخ) بـ يكون حوالي 150 جنيه للسمكرة،
و150 للرش.

لما العجلة تنام في الغالب هـ تحسي ان
الدريكسيون بـ يحود لوحده (أو هـ تلاقي حد عمال يشوح ويزعق ويقولك “العجلة يا
آنسة” في إحتمال 10 في المية ان بـ يتكلم بجد ومش بـ يعاكس) في الحالة دي في
هدوء تام حَضني على اليمين وإركني على جنب. طلعي المثلث وحطيه على بعد 2-3 متر قبل
العربية وطلعي الكوريك والإستبن. خطوات التغيير بعد كده كالآتي: 1. فُكي المسامير
شوية (ريحيها). 2. ثبتي الكوريك قبل العجلة الورانية من تحت بحوالي 20 سنتيمتر (أو
بعد القدمانية بنفس المسافة حسب انهي عجلة)، الكوريك ليه مكان مخصوص وبـ يكون على
الشاسيه وأحياناً بـ يكون مجوف شويه عشان تعرفيه. 3. إرفعي العربية وبعد ما
ترفعيها كملي فك المسامير وخلي بالك منهم، خلي بالك العجلة تقيلة شوية وانت بـ
تشيليها وبـ تبدليها الإستبن. 4. أربطي المسامير بس ما تربطيهمش جامد. 5. نزلي
العربية وشيلي الكوريك وبعد كده أربطي المسامير جامد جداً، لازم تقفي على المفتاح
الصليبة لأن ربط المسامير بإحكام أمر جوهري.

بعد كده لازم تصلحي العجلة النايمة في أقرب
وقت ممكن لأن السواقة من غير إستبن ممكن تحطك في موقف سيء. في البنزينة أو عند
بتاع الكاوتش لو العجلة اتخرمت في طريقتين ممكن تعالجي الخرم بيهم إما بخابور أو
بلحام. الخابور ما بـ ينفعش غير مع العجل الـ«تيوبليس». فلو عربيتك قديمة شويتين
الحل الوحيد هو اللحام. في جميع الأحوال اللحام محبذ عن الخابور لأنه بـ يحافظ على
العجلة. مهم جداً انك تراقبي الميكانيكي وهو بـ يصلح العجلة. الخابور سعره ما بين
6 و10 جنيه واللحام ما بين 8 و15 جنيه.

عربيتك بـ تتكلم؟

كتير قوي العربية بـ تعمل أصوات غريبة
وعجيبة، من حشرجة، لزنة، لطقطقة، لصفارة…إلخ. الأصوات دي في مننا اللي بـ يتجاهلها
أو مابـ يسمعهاش أصلاً من المزيكا العالية طول الوقت. لكن الأصوات دي في غاية
الأهمية، ولو سمعناها واتعاملنا مع المشاكل اللي مسببها ممكن نتفادى مشاكل كبيرة
في العربية بعدين.

            الصفارة: ممكن تسمعي صفارة في حالتين وانت بـ تحودي العربية أو وانت بـ تفرملي. في
الحالة الأولى المشكلة غالباً ما بـ تكون في كوتش العربية، فلازم تكشفي عليه وممكن
يكون محتاج يترصص (ودي عملية بـ تساعد العجل انه يمسك على الأسفلت كويس وده ضروري
عشان العربية ما تتزحلقش وانت بـ تفرملي). وعادةً الكاوتش المفروض يتغير كل 40 أو
50 ألف كيلو. لو بـ تسمعي الصفارة دي وانت بـ تفرملي ده معناه إما ان تيل الفرامل
خلص أو النوع المستخدم رديء، في الحالة دي هـ تحتاجي تغيري التيل.

            طقطقة: لو الدريكسيون بـ يعمل صوت طقطقة، يبقى محتاجة تكشفي على علبة الدريكسيون عند
العفشجي.

إهتزاز: لو العربية بـ تتهز جامد طول الوقت، ده في
الغالب معناه ان في مشكلة في قواعد الموتور وممكن يبقى بسبب بنزين مش نضيف أو
مشكلة في كهرباء العربية أو فلاتر الهواء. ولو الإهتزاز ده في الدريكسيون على
السرعات العالية ده معناه ان العربية محتاجة ظبط زوايا أو الـ ﭽنط معوج.

وانت مسافرة وانت مسافرة لازم تتأكدي ان العربية في حالة
كويسة بالخطوات دي: لازم يكون معاكي إستبن شغال. لازم تكشفي على المية وعلى زيت
الموتور، وزيت الفرامل (وعلى فكرة العربية فيها أربع أنواع زيوت: موتور، فرامل،
فتيس، علبة باور). وضعط الهوا بتاع العجل. (الضغط المظبوط للهوا بـ يكون مكتوب على
باب العربية من جوه بس بوحدة « psi » فلازم تحوليه لبار
وبكده تعرفي الضغط المثالي لعربيتك).

وأخيراً العربية أساسية جداً للحياة اليومية
في القاهرة وعشان كده، خلي بالك منها إعملي لها صيانة كل 10 آلاف كيلو، وماتسيبيش
البنزين يخلص للآخر قبل ما تفولي وزودي العجل كل شوية. وكل ما هـ تهتمي بالعربية
كل ماهـ تعيش معاكي وما تـ تعبكيش.

مقترح