دليل العيد 2024 (3): خروجات “مجنونة” للعائلة والأصحاب
أماكن خروجات للعيد أماكن مناسبة للأطفال خروجة عيد الفطر فسح في العيد
Mohamed Talaat
الصورة الرئيسية: Karen Maes
خروجات العيد مش بتكمل غير لما تكون مع الأسرة أو الأصدقاء ولازم الخروجة تكون مرضية لكل الأعمار وتنفع للكل، خاصةً أن كل فرد في العائلة أو الشلة بيكون له حاجات بيحبها وحاجات نفسه يجربها، ولكن الأساس في الخروجة هو الانبساط، ولأن العيد فرحة فهنقول لكم على 5 خروجات مجنونة في عيد الفطر 2024 سواء كنتم خارجين مع الأسرة أو الأصدقاء.
فجنون
شعارهم “للفن والجنون”، وهي قرية مناسبة للكبار والصغار وهتطلع منكم الطاقة السلبية، وعندهم لعب جوا حمامات طين وحرب ألوان ورسم على الحيطان وأعمال فخار وتسلق حبال واللعب بالبالونات الملونة وعجن وخبز وزراعة وركوب حيوانات مختلفة ورسم على الزجاج وتلوين وغيرها من الألعاب المبهرة، وسعر الدخول 150 جنيه للفرد شاملة دخول المزرعة ونشاط من اختياركم.
العنوان: طريق سقارة السياحي – البدرشين – الجيزة.
تقدروا تعرفوا أكتر عنهم من خلال صفحة الفيسبوك من هنا.
متحف الأوهام
الأول من نوعه في مصر وده بيستخدم خدع بصرية هتخليكم تنبهروا بأحلى صور ليكم لأنه بيعتمد على خداع حواسكم وبيدخلكم لعالم مختلف زي أنكم تمشوا في بيسين من غير ما تتبلوا أو تمشوا جوا نفق أو تقفوا على راسكم في غرفة دوارة، وده كله معمول باحترافية على أسس علمية، وسعر الفرد 300 جنيه.
العنوان: طريق القاهرة الإسكندرية الصحراوي الكيلو 38 – الشيخ زايد.
تقدروا تعرفوا أكتر عنهم من خلال صفحة الفيسبوك من هنا.
أدرينالين
هتعلّوا الأدرينالين بعد ما تدخلوا تلعبوا ألعابهم المميزة واللي منها كرة الطلاء بالرصاص الجلاتيني الملون، وعاصفة الليزر وبنادق المياه والبازوكا وصيد الكنز والصابون وغيرها من ألعاب المغامرة والتحدي لكل الأعمار واللي هتنافسوا بعضكم فيها بدون ملل، وسعر التذكرة للفرد تبدأ من 300 جنيه وأقل جروب 8 أفراد.
العنوان: حوض 3 – منطقة الحزام الأخضر، الشيخ زايد.
تقدروا تعرفوا أكتر عنهم من خلال صفحة الفيسبوك من هنا.
سكاي بارك
من الأماكن المميزة ومحتاجة شجاعة وتجمع بحب للأسرة والأصدقاء علشان تقدروا تتخطوا العوائق في ألعابهم واللي موجودة بـ3 مستويات، ومناسبة للأطفال والكبار بتذكرة سعرها 450 جنيه.
العنوان: سوديك ويست بيستتاون هب – بيفرلي هيلز – الشيخ زايد.
وتقدروا تعرفوا أكتر عنهم من خلال صفحة الفيسبوك من هنا.
سكي إيجيبت
مكان للتزلج في درجات حرارة تحت الصفر، وهتستمتعوا بتجرية مميزة داخل منحدر التزلج وبطول 21 متر وتقدروا تقابلوا البطاريق وتتصوروا وتستمتعوا بوقتكم بأسعار تبدأ من 500 جنيه.
العنوان: مول مصر- طريق الواحات.
تقدروا تعرفوا أكتر عنهم من خلال صفحة الفيسبوك من هنا.
مقترح
الحياة في كايرو
شارع الألفي.. باريس في قلب القاهرة
أهم مباني شارع الألفي تاريخ شارع الألفي +3
الحياة في كايرو
