دليل كايرو 360 لأحسن 10 أفلام أمريكاني في 2017
Mohammed Sabry
خلاص 2017 بتخلص، وبنودع معاها أحداث ومناسبات كتيرة. وطبعًا على مدار السنة، هوليووود أبهرتنا بعدد لا نهائي من الأفلام. منها اللي عجبنا واللي معجبناش. لكن في النص كان في أفلام علمت معانا، وعجبت عدد كبير من الجمهور. وبالتالي إحنا قولنا نجمع لكم أحسن 10 أفلام في 2017، واللي حازت على تقييمات عالية على موقع IMDB. يلا نبدأ:
Logan
طبعًا كلنا بنحب سلسلة أفلام x-men. ولما يبقى فيه فيلم خاص بشخصية وولفرين لوحدها، ده كفيل إنه يحببنا فيه أكتر. خصوصًا إنه آخر مرة النجم “هيو جاكمان” هيلعب الدور ده.
الفيلم بتدور أحداثه في المستقبل. وفيه وولفرين بيرعى البروفيسور إكس بعد ما كبر في السن. لكن بيظهر متحول جديد، بيحط وولفرين في مواجهة مع قوى غامضة. وبيكتشف أسرار كانت مخفية عن ماضيه.
تقييم الفيلم: 8.2
Dunkirk
في الفيلم ده المخرج “كريستوفر نولان” بيعرض جزء من أحداث الحرب العالمية الثانية. لما القوات الألمانية حاصرت جنود التحالف، في منطقة دنكيرك. وإزاي تم إخلاء القوات بأقل خسائر.
تقييم الفيلم: 8.2
John Wick: Chapter 2
في الجزء التاني بنعيش الإثارة أكتر، ونشوف أحداث أقوى وكلها أكشن. لما “جون ويك” بيعرف إن في مكافأة اتحطت علشان يتقتل. فبيضطر يفتح أبواب الجحيم على كل أعدائه.
تقييم الفيلم: 7.5
IT
لو ليك في الرعب الفيلم ده هيجمد الدم في عروقك. بتدور أحداثه عن مجموعة من الأطفال بيتحدوا علشان يواجهوا وحش مرعب على شكل مهرج. بيخطف الأطفال في المدينة وبيتغذى على أرواحهم. الفيلم ده مأخوذ عن رواية بنفس الاسم للكاتب “ستيفين كينج”.
تقييم الفيلم: 7.6
Spider-man: Homecoming
في الفيلم ده بنشوف المراهق بيتر باركر “سبايدر مان” وهو بيحاول يوازن بين حياته كطالب في المدرسة، ودوره كبطل خارق. لحد ما يلاقي نفسه بيواجه تهديد خطير بيهدد مدينة نيو يورك.
تقييم الفيلم: 7.6
Get Out
شاب بيروح لأول مرة يقابل أهل صديقته. وبعد الاستقبال الجميل والأجواء العائلية، بيكتشف إنه وقع في فخ خطير. ولازم يعمل المستحيل علشان ينقذ حياته بأي تمن.
تقييم الفيلم: 7.7
Baby Driver
لو أنت من عشاق مطاردات العربيات والسرعة، يبقى لازم تشوف الفيلم ده. شاب بيضطر يشتغل مع زعيم عصابة كبير. وبيشارك معاه في عملية سرقة بتعرض حياته للخطر. ولازم ياخد قرار في تحديد مصيره.
تقييم الفيلم: 7.7
Split
الفيلم ده هيحبس أنفاسك من أول كام دقيقة. 3 بنات بيخطفهم شخص مصاب بانفصام في الشخصية. وعايش بـ 23 شخصية مختلفة. بيحاولوا يهربوا من المكان اللي هم فيه. لكن مش دايمًا كل النهايات سعيدة.
تقييم الفيلم: 7.3
The Hitman’s Bodyguard
حارس خاص بيتم تكليفه بحماية أخطر قاتل مأجور في العالم. علشان لازم يشهد في محكمة العدل الدولية ضد مجرم حرب خطير. بس على قد الأكشن والإثارة، الكوميديا طول الوقت بتعلب دور كبير.
تقييم الفيلم: 7
Jumanji: Welcome to the Jungle
أربع أصحاب بيلاقوا لعبة جومانجي، ولما بيلعبوها بيلاقوا نفسهم جوة اللعبة بنفس الشخصيات اللي اختاروها. وعلشان يخرجوا منها تاني لازم يكملوا اللعبة للآخر.
تقييم الفيلم: 7.2
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
