The Definitive Guide to Living in the Capital , Cairo , Egypt

الحياة في كايرو

دليل كايرو 360 لطرق استخراج وإنهاء الأوراق الحكومية في القاهرة

دليل كايرو 360 لطرق استخراج وإنهاء الأوراق الحكومية في القاهرة
بواسطة
Muhammad Nasr
السلام على أهل المحروسة، الكابوس اللي بـ نعاني منه هو الروتين والحكومة واليوم اللي بـ نبقى رايحين فيه علشان نخلص ورق بـ يكون مش لطيف وبـ نكون في قمة السعادة لما نخلص الورق بدري وبسهولة، من خلال حياتنا في القاهرة لاحظنا شيء غريب أن قليل قوي اللي يعرف إيه الأوراق المطلوبة منه علشان مثلاً يطلع باسبور أو يقدم في الجيش… إلخ، واللي بـ يعرف يا إما بـ ينسى أو بـ يتبع طريقة الباب الخلفي لتخليص مصلحته، ونتمنى في مصر بعد الثورة أن الباب الخلفي يتنسف وكل الورق يخلص بمنتهى الشفافية.
حاولنا نجمع لكم مجموعة من الورق المهم اللي بـ نحتاجه في حياتنا بعد الجامعة واعتمدنا على تجربتنا الشخصية ومعلومات موثوق منها.

أوراق التجنيد

من أهم المراحل في حياة أي شاب مصري هي مرحلة الجيش واللي بـ يبدأ إدراكنا لها في مرحلة الطفولة من خلال السؤال الغريب: أنت عندك أخ؟.. يبقى هـ تدخل الجيش.

الموضوع في الحقيقة أن كل الشعب المصري مطلوب للتجنيد في القوات المسلحة (ليه يا عم؟!) إلا أن فيه حالات إعفاء مؤقت ونهائي من التجنيد زي الابن الوحيد لوالده الحي أو الابن الوحيد لوالده المتوفي أو الابن الأكبر لوالده الحي غير القادر على الكسب (تعدى 60 سنة) أو أكبر المناسبين للتجنيد من أخوة أو أبناء أحد الشهداء أو المصاب أثناء الخدمة العسكرية أو العائل الوحيد لأبيه غير القادر على الكسب، الحقيقة سألنا مجموعة كبيرة من أصحابنا اللي دخلوا الجيش “لبسوا على حد تعبيرهم” واللي أخذوا إعفاء “الحمد لله يا سيدي” (على حد تعبيرهم برضه) وفجأة نلاقي الموقع التحفة ده وهو موقع تابع للقوات المسلحة المصرية وهيئة التنظيم والإدارة وهو موقع إدارة التجنيد والتعبئة اللي بـ يعرفكم على كل الأوراق اللي أنتم محتاجينها علشان تخلصوا ورق الجيش سواء كان الإعفاء أو تأدية الخدمة العسكرية.

جواز السفر (الباسبور)

جواز السفر أو الباسبور يعتبر البطاقة الدولية بتاعة المواطن المصري، تقدروا تطلعوا الباسبور من أقرب قسم شرطة تابع لمنطقة الإقامة وهـ تحتاجوا عدد من الأوراق لاستخراج جواز السفر أو الباسبور وهي: بطاقة رقم قومي سارية المفعول أو في فترة السماح (3 شهور من تاريخ الانتهاء)، و3 صور ملونة مقاس4×6  خلفية بيضاء، وشهادة المؤهل الدراسي في حالة عدم ثبوته ببطاقة الرقم القومي، وشهادة التجنيد بالنسبة للذكور، وشهادة قيد دراسي معتمد بالنسبة للطلبة، وشهادة إثبات الحالة الاجتماعية (للأناث).
سعر الاستمارة 135 جنيه، وتقدروا تستلموا جواز السفر بعد ثلاثة أيام من تقديم الطلب.

بطاقة الرقم القومي

بطاقة الرقم القومي من أهم المستندات للمواطن والدولة، المواطن من غير البطاقة ما يقدرش يستخرج أي ورقة رسمية وأهميتها للدولة في أنها تعرف المعدلات الحيوية للمواطنين علشان يبقى عندها بيانات تقدر من خلالها تحدد مستوى المعيشة ومشاريع البنية التحتية وعدد المتقدمين للتجنيد وكل ده في سبيل تطور الدولة وضمان حياة كريمة لمواطنيها (إيه الكلام الكبير ده؟)

علشان تطلع بطاقة الرقم القومي محتاج تشتري استمارة طلب بطاقة الرقم القومي بـ 15 جنيه من أي مكتب سجل مدني على مستوى مصر وتحتاج عدد من المستندات زي أصل شهادة الميلاد ومستندات أخرى تفيد المهنة والحالة الاجتماعية وإثبات محل الإقامة (وصل كهرباء، عقد كهرباء، إيصال تليفون أو مياه)، البطاقة القديمة أو صورة منها في حالة التجديد أو تغيير البيانات أو بدل تالف أو بدل فاقد، مدة بطاقة الرقم القومي سبع سنوات وفترة مهلة 3 شهور من تاريخ الانتهاء. 

رخصة القيادة

زي ما الموت علينا حق، مشوار المرور برضه علينا حق، ونتمنى في مصرنا بعد الثورة أن يتم نسف كل قواعد الروتين والبيروقراطية ونبقى دولة فيها معدل شفافية محترم، 18 سنة يعني نقول لك مبروك وتروح تأخذ بعضك وعلى قسم المرور التابع لمحل الإقامة ومعاك 4 صور شمسية حديثة مع شهادة تثبت إتمام مرحلة دراسية وشهادتين طبيتين (باطنة ونظر) ولابد من النجاح في اختبار القيادة النظري والعملي وفي اختبار قواعد وأداب المرور، الرسوم أسعارها بـ تتغير كل فترة على حسب القانون واللائحة التنفيذية بس خلوا معاكم فلوس احتياطي، ربنا معاكم.

أوراق العمل

تخرجنا من الجامعة وجاء وقت تخليص الورق والذي منه علشان نشتغل ونستقر في شغل ثابت وله مستقبل، المطلوب كذا حاجة:

-كعب العمل:

من الأوراق اللي بـ تطلبها أي شركة من موظفيها علشان التثبيت والذي منه، وكعب العمل سهل وبسيط في استخراجه هـ تتوجه لمكتب العمل التابع لمنطقتك ومعاك شهادة التخرج وصورة منها والبطاقة الشخصية وصورة منها.

-الرقم التأميني:
وده سهل تجيبه عن طريق الاتصال بـ 16217 وتعطي لممثل الخدمة رقم بطاقتك واسم الوالدة وبـ يعطيك الرقم التأميني.
-الفيش (صحيفة الحالة الجنائية):

بعيد عننا وعن السامعين لو عند حد من حضراتكم سوابق بـ يقدروا يجيبوها عن طريق بيان البصمات والفيش تقدر تطلعه من أي قسم شرطة، بـ يكون معاك صورة من البطاقة واحتياطي خلوا معاكم شهادة الميلاد وصورة منها، الفيش تقدروا تستخرجوه في فترة ما بين 2: 21 يوم وصراحة مش عارفين ليه فيه أقسام بـ يطلع منها في يومين وأقسام ثانية في 3 أسابيع.

بدأنا نلاحظ نشاط للحكومة على شبكة الإنترنت من خلال موقع الحكومة الإلكترونية، ووجود نوافذ أكثر للتفاعل مع المواطنين وتوجيههم للأماكن المناسبة للإجراءات أو الورق اللي عاوزين يستخرجوه وده شئ لطيف.

في نهاية موضوعنا نتمنى نكون أفادناكم ببعض الإجراءات، وربنا يهون علينا وعليكم جدال الورق المطلوب والفتِي اللي بـ نسمعه من كل حد نقابله في الشارع، وعلى الأقل نحاول نقلل شوية من ظاهرة الباب الخلفي اللي في الحد الأدنى للظروف الطبيعية للمواطن والموظف هـ تختفي لوحدها.

مقترح