The Definitive Guide to Living in the Capital , Cairo , Egypt

حياتنا كلها عبارة عن مراحل، كل مرحلة بـ تجهزنا للمرحلة اللي بعدها، مننا اللي بـ يبقى مستعد أنه يأخد المرحلة الجديدة، ومنا اللي بـ يقرر يفضل زي ما هو، ومننا اللي بـ يسابق كل مرحلة علشان يوصل أسرع. ما تستعجلش نفسك، بأنك تعمل حاجة أنت متأكد من أنك لسه مش جاهز لها، بس في نفس الوقت ما تخليش خوفك يحبسك في قوقعة مقفولة مافيهاش إلا الحاجات اللي بـ تحسسك بالأمان، وترفض كل جديد ممكن يغير حياتك للأحسن.

النهارده كايرو 360 محضرة لك دليل شامل لو عاوز تكمل دراساتك العليا (ماجستير أو دكتوراه) في القاهرة.

بس قبل ما نبدأ في الجامعات لازم تأخد بالك أن بـ يبقى فيه ورق معين مطلوب لا غنى عنه، إلا في حالات نادرة جدًا، زي شهادة التخرج، وشهادة الميلاد، وشهادة التويفل TOEFL أو الأيلتس IELTS، والتقدير طبعًا فيه منح ما بـ تقبلش أقل من جيد جدًا، وفيه منح بـ تقبل جيد، وفي أماكن بـ تطلب شهادة ترشيح من أستاذين من أساتذتك في الجامعة.

كمان خلي بالك وأنت بـ تدور على أفضل مكان تكمل فيه دراستك، أنك تحدد عدد جامعات كبير ومختلف، علشان يبقى عندك أكثر من مكان بديل.

افتكر آخر ميعاد لتقديم المنحة وإلا هـ تغني راح راح وانقضى وتستنى 6 شهور على الأقل لحد ما ميعاد المنحة اللي بعدها تيجي وفي الأغلب مواعيد المنح بـ تبقى في أول شهر سبتمبر ويناير، وفيه منح في يونيو كمان.

خلي بالك أن تنظيمك لأفكارك في الورق اللي بـ تقدمه هـ يفرق كثير جدًا في اختيارهم لك، يعنى ركز كده وحط جنبك كوباية النسكافيه أو الشاي واكتب ملف محترم كامل مرتب ومنسق، لأن ده اللي هـ يحدد هـ تتقبل ولا لأ، أنت بـ تعرض عليهم نفسك وقدراتك وأحلامك في المنحة دي من خلال كتابتك وتنظيمك لإجابة أسئلتهم اللي في الاستمارة.

كمان خلى دائمًا السيرة الذاتية بتاعتك معمولة بشكل حرفي وتوضح فيه مهاراتك وشهاداتك وخبراتك، وأهم حاجة وسائل التواصل معاك، سواء تليفون أو بريد إلكتروني.

أما بالنسبة للأماكن اللي ممكن تدرس فيها، فكما هو  معروف في القاهرة، أن أفضل مكان ممكن تدرس فيه هو الجامعة الأمريكية، سواء عن طريق ميزانيتك الشخصية وتعطي لهم تحويشة العمر وتقدم فيها، أو ببساطة تقدم على منحة أو زمالة، واللي بـ يرعاها كثير من المؤسسات حاليًا، بس بـ يبقى لها شروط معينة لازم تعملها.

أما الأماكن الأساسية المعروفة لتكملة الدراسات العليا فهي الجامعات المصرية الرسمية، وبرضه بـ يبقى لها شروط خاصة، فمثلًا كلية اقتصاد وعلوم سياسية عندها برامج دبلومات وماجيستير في أكثر من مجال مختلف، بس طبعًا كل مجال وله شروطه.

كمان فيه مركز القاهرة للتعليم المفتوح، اللي بـ يساعد ناس كثير أنهم يكملوا تعليمهم العالي، ويعملوا دراساتهم في المجالات اللي بـ يحبوها بدون قيود التعليم في الجامعات العادية، وده على المستويين المحلي والعالمي.

ولو محتاج تعمل ماجيستير إدارة أعمال MBA، ومش عارف تعمله فين هـ تلاقي أكثر من مكان هنا و هنا.

ومن الأماكن اللي نشأت قريب “كامبس الجونة“، واللي متخصصة في ثلاثة تخصصات حاليًا: هندسة الطاقة وهندسة المياه، والتنمية الحضرية. ومكانه في الجونة على ساحل البحر الأحمر، والكامبس له فرع في ألمانيا وواحد ثانى في مصر بس.

أما لو عاوز تدرس عبر الإنترنت ففيه أكثر من جامعة بـ تقدم ده منها:

جامعة والدن Walden University واللي بـ تقدم ماجيستير في العمل الاجتماعي بجانب تخصصاتها الرئيسية، وده كتخصص جديد يستاهل أننا نذكره خاصة لحاجة المؤسسات الخدمية أو المؤسسات غير الحكومية له حاليًا.

وأي جامعة كبيرة هـ تلاقي في الموقع بتاعها مكان للدراسة عن بُعد، والمحاضرات بـ تبقى أونلاين أو فيديو، بس خلى بالك أن الجامعة تكون معتمدة، ولها مرتبة على جامعات العالم.

لكن لو حبيت أو قررت في يوم من الأيام أنك تكمل دراستك خارج البلاد الشقيقة، اللي هـ تبقى قد الدنيا، فعليك بالمواقع دي هـ تفيدك كثير:

الموقع الإلكتروني “منحة” اللي فيه منح وزمالات لدول كثير جدًا.

موقع “هوت كورسيز Hotcourses” اللي بـ يقدم لك كل التخصصات اللي أنت محتاج دراستها وبـ يوصلك بمكان الدراسة سواء من خلال موقع الجامعة نفسه أو من خلال التواصل معاهم.

موقع “دراسات الماجستير Master studies“، واللي بـ يوفر كورسات مختلفة ووسائل الدراسة عن بعد، غير أماكن الدراسة خارج مصر.

وأخيرًا موقع “تارجت بوست جراد.Graduate post grad“، وأجمل حاجة فيه أنه بـ يخليك تختار البلد اللي عاوز تدرس فيها، ويطلع لك الجامعات اللي تناسب تخصصك، وكمان لو محتاج منحة بـ يوفرها لك عن طريق جهات مانحة، وأماكن معارض الجامعات ومواعيدها لما بـ تعمل معرض.

كل إنسان بـ يختار الطريقة اللي يعيش بها حياته، وكل فترة القدر بـ يحطنا في مفترق طرق، يا نختار اللي يفيدنا وبـ نحب نعمله، ونكمل به باقي حياتنا، يا نختار أننا نضيع وقتنا في الجري وراء السراب ومحاربة طواحين الهواء. لو ما حاربتش وراء اللي أنت عاوزه تبقى ما تستهلوش، ولو لسه مش عارف أنت عاوز إيه؟ اصبر واعرف أكثر عن نفسك وعن اللي بـ تحبه، وعن العالم اللي حولك، بس الأكيد أنك ماتفضلش مكانك “محلك سر”.. اسعى بكل قوتك وربنا بـ ييسر الخير ويدبر لك أجمل مما تتخيل.

خلى كل لحظة في حياتك مغامرة، عود عينيك تشوف تدبير ربنا في كل حاجة بـ تحصل حولك، صلى من قلبك مع الكون، يمكن تفهم اللي الكون كله فهمه، فاختار أنه يعبد ربنا طوعًا بدون مقاومة أو تفكير. أول طريقك أنك تفهم نفسك.. ساعتها بس هـ تعرف أنت عاوز إيه!

استمتع بتجربة الحياة سواء عملت دراسات عليا أو لأ، حاول بس تختار لأنفاسك جو مناسب تفرح به بعد كده.