The Definitive Guide to Living in the Capital , Cairo , Egypt

فيه فئة في مصر ناس كتير ماتعرفش عنهم أي حاجة، دول نقدر نقول عليهم “المعذبون في صمت”، مع إن مشكلتهم بسيطة والعالم المتقدم بيتعامل معاها بمنتهى السلاسة، لكن حالة الجهل بـ “حساسية الطعام” بيخلي الوضع مأساوي جدًا للأطفال والكبار المصابين بنوع واحد أو أكتر.

الحساسية اللي بنتكلم عنها مش مجرد هرش زي ما بيحصل لناس كتير لما ياكلوا موز أو مانجة أو فراولة، الموضوع أكبر وأصعب، بيظهر في صورة إكزيما في الجسم كله وخصوصًا الوش، ضيق في التنفس، تسارع في دقات القلب، ترجيع، إسهال، كحة ورشح وأحيانًا بيوصل لتورم في العنينين والوش وممكن في بعض الحالات يوصل لاختناق وموت.

في الولايات المتحدة وأوروبا وحتى بعض الدول العربية زي الإمارات فيه اهتمام بالقصة دي، وتشديد على مصنعي الأغذية أنه يكون في دقة ووضوح في ذكر المكونات وإن خطوط الإنتاج تكون منفصلة يعني ماينفعش بسكويت عادي فيه لبن وزبدة يعدي على خط إنتاج بسكويت خالي من المكونات دي ويتقال أنه خالي لأنه بالشكل ده مش خالي… أيوة للدرجة دي الموضوع صعب، ولأنه مافيش أي إحصاءات في مصر تقول عندنا كام مريض ولا في اهتمام من الجهات الرقابية بالتأكد من مدى خلو المكونات من المكونات الشهيرة المثيرة للحساسية زي القمح واللبن والبيض والصويا والمكسرات بيضطر كتير من العائلات أنهم يتجنبوا أي حاجة مصنعة في الخارج وبيعملوا كل حاجة في البيت، لذلك لما يعرفوا أن فيه مكان بيبيع حاجة مخصوصة لمريض الحساسية بيبقى يوم عيد حرفيا، في الموضوع ده بنحاول نلفت النظر لمجموعة من الأماكن اللي عارفة يعني إيه حساسية وبتبيع منتجات موثوق فيها خلوها من مسسبات الحساسية ومكتوب عليها بوضوح المكونات سواء كان محلية أو مستوردة.

 رويال هاوس

سوبر ماركت رويال هاوس عبارة عن مكان بيجمع كل المنتجات الصحية، مستوردة ومحلية ويعتبر مقصد لعدد كبير جدًا من مرضى الحساسية رغم بعد مكانه، لكن لأنه بيعمل معادلة صعبة وبيجمع تقريبًا كل المنتجات المخصوصة سواء خالية تمامًا أو قد تحتوي بنسب ضئيلة وعاملهم قسم مخصوص، وردود الفعل عنه طيبة ويعتبر المكان رقم واحد اللي مرضى الحساسية بيشتروا منه مكانه 4 ش الأثرى بن نافع روكسى، مصر الجديدة، القاهرةالتليفون: 02-24514447, 02-24514448, 02-24514445.

كينج إم

كينج إم شركة مصرية وهي واحدة من الشركات النادرة اللي بتوفر دقيق رز، ودقيق ذرة أصفر وأبيض، وكمان منتجات مصنعة زي رقائق ذرة التاكو، وتوست الأرز، غير بسكوتات وكوكيز ومنتجات لطيفة ممكن تناسب أنواع مختلفة من الحساسية الشركة بتأكد سلامة البيانات الخاصة بالخلو من عدمه.

كريستال

دي واحدة من ماركات الدقيق النادرة جدًا اللي بتعمل دقيق خالي من الجلوتين لمرضى حساسية القمح، طبعًا هم مالهمش منفذ بيع لكن منتجاتهم في السوبر ماركتات والهايبرات الكبيرة.

شركة طيبة للمخبوزات

 Tiba Academy المكان ده في العجوزة، صاحبه دكتور في مستشفى أبو الريش عامل قسم خاص لحساسية الجلوتين بشكل أساسي، وكمان بيعمل مخبوزات لأنواع الحساسية التانية، طبعًا بنتكلم عن جنة لمرضى الحساسية، مخبوزات خالية من الجلوتين واللبن وصويا والمكسرات، تورت ودنش وبقسماط وفينو، وحاجات تانية كتير وكمان المحل بيوفر خدمة التوصيل لأماكن كتير زي مدينة نصر وحدائق القبة، ومصر الجديدة، والمنيل ودار السلام ومصر القديمة والجيزة والمعادي وفيصل والهرم وحدائق الاهرام وغيرها أماكن كتير جدًا غير إمكانية التفاهم بالنسبة للناس اللي من محافظات، ده غير أنهم بيوفروا امكانية الاستشارات الطبية من خلال الدكتور محمد عباس ورقمه 01119992346، غير طلبات التوصيل والرقم 01119992346، أما العنوان فهو 66 شارع أبو المحاسن الشاذلي. العجوزة. الجيزة.

مخبوزات الخير

أهو ده فيه انقسام حوله، يعني في ناس شكرت وناس قالت أنها رمت الحاجة زي ما هي رغم الأسعار الغالية، على كل حال زي ما بيقولوا العينة بينة وما على الرسول إلا البلاغ، مخبوزات الخير بيعمل مخبوزات متنوعة زي البيتزا والكيزر والفينو والبيتي فور والكحك والبسكويت، والقطايف والكنافة والزلابيا وغيرها، منتجاته خالية من الجلوتين واللاكتوز وبدقيق خالي الجلوتين.

امتنان

المفاجأة اللي أذهلتنا غن امتنان بتعمل منتجات خالية من الألبان زي بسكويت الشيكولاتة وده منتج من دقيق الحبوب الكاملة القمح والشعير، غني بالألياف، خالي من الألبان وبيدي شعور بالشبع، كمان منتجات تانية زي بسكويت الزنجبيل، ورقائق الطماطم والتوابل، والأرز البني وغيرها من المنتجات المهمة واللطيفة واللي ناس كتير عندهم حساسية ارتاحوا عليها وطبعا فروع إمتنان منتشرة في كل الجمهورية ممكن تعرفوا أقرب فرع ليكم من خلال رقمهم المختصر 16246.

طباخين متخصصين

بما أنه الموضوع صعب حبتين في طباخين خصصوا جهدهم وشغلهم بالكامل لمرضى الحساسية، زي الشيف حمدي اللي بيشتغل في محيط مصر الجديدة ومدينة نصر وبيعمل أوردرات لكل مكان غير أن له منفذ بيع في مصر الجديدة بيفتحه بمواعيد معينة، الشيف شغال في مستشفى عين شمس بيعد وجبات للأطفال في قسم الحساسية، يعني متخصص بالمعنى الحرفي وفاهم هو بيعمل إيه رقم تليفونه   0111 226 8158–0110 054 5316 وصفحته على فيس بوكالشيف حمدى محمد‎ .

آية حور نموذج تاني للطباخين البريمو عاملة صفحتين على فيس بوك، صفحة لوصفات الحساسية مجانًا من طبخ وسندوتشات وطبيخ وخلافه، وصفحة للتورت والحلويات اللي بتبيعها وبتكون واثقة 100% إنها خالية من الممنوعات لأن أولادها كمان عندهم حساسية يعني الموضوع في بيته صفحتها وعليها شغلها هي Hori flowery cupcakes .

عندك بقى واحدة من أشهر الناس في قصة حساسية الجلوتين وهي مدام إنجي اللي معظم مرضى الحساسية جربوها واتبسطوا منها وهي عندها عناية خاصة جدًا بالنسبة للموضوع ده ومش بتثق في حد تاني يعمل الشغل بإيده غيرها، ولذلك لو تعبت أو حصل ظروف عندها الأوردرات بتقف  صفحتها  Healthy Tasty & Zero Gluten.

وطبعًا الموضوع بدأ يكون فيه شغل احترافي زي Baking for allergic واللي بدأ كصفحة فيس بوك وبيوصل الأوردرات لكن الشغل والناتج والتعامل والتصميمات بتوضح أنه هايكون له شأن كبير كواحد من أشهر سلاسل المحلات اللي بتعمل أكل صحي وخاص لمرضى الحساسية.

الهايبرات وسلاسل السوبر ماركت الكبيرة

في الهايبرات وسلاسل السوبر ماركتات الكبيرة فيه دايمًا ركن خاص بالحساسية، خصوصًا في سعودي وألفا ماركت ومترو ورويال هاوس، بتبيع منتجات مستوردة خاصة بالحساسية زي منتجات دكتور شار وغيرها وبيكون غالبًا في ركزن البسكوتات المستوردة، الموضوع بيحتاج شوية تدقيق وقراءة طويلة للمحتويات علشان مايحصلش أي خطأ بس الأكيد أنه مادام منتج مستورد دولة متقدمة فالبيانات غالبًا حقيقية.

مجهود ذاتي

سيرش مستمر ومتواصل على جوجل وفيس بوك ويوتيوب عن وصفات للحساسية والنتيجة هتكون مرضية، كل يوم أمهات جديدة بتكتشف الحساسية اللي عند ولادها أو أفراد أسرتها، الست المصرية طيبة وذكية، مش بتكتفي بالحصول على وصفات حساسية لنفسها، بتكتبها على مجموعات وجروبات ومواقع وأي ماكن يتيح لها توصيل صوتها والنتيجة كم لا بأس به من الوصفات المحترمة، نذكر من بين الأماكن اللي بتوفر وصفات كويسة خصوصًا على فيس بوك صفحات محترمة جدًا بتنزل وصفات هنذكر لكم شوية منها وتقدروا تدوروا ولو تعرفوا أكتر شاركونا بيها في التعليقات، الصفحات  زي ” Aya’s kitchen، صفحة لكل ما يخص حساسية الطعام ، Teflynabaty ، حملة التوعية بمرض السلياك (حساسية القمح) لا للقمح لا للجلوتين” دا غير الجروبات المقفولة الخاصة بحساسية الألبان وغيرها واللي يدور ياما هيلاقي أهم حاجة الصبر والمثابرة.