Mohamed Talaat
مؤخرًا بقينا نشوف بنات كتير مؤمنة بثقافة ركوب العجل والاسكوتر للهروب من زحام المواصلات في شوارع القاهرة، ومن هنا ظهر مشروع “دوسي” اللي بيساعد البنات على تعلم ركوب العجل والاسكوتر. تعالوا نتعرف أكتر على المشروع.
برغم بدء انتشار ركوب العجل والاسكوتر وسط المجتمع الأنثوي إلا أن دايمًا بيكون فيه صعوبة لهن في التعلم، وعلشان كده الفكرة جت للصحفية منى فاروق وأختها نوران، اللي كانوا عاوزين يتعلموا سواقة الاسكوتر ومالقوش مكان يتعلموا فيه، ولما طلبوا ده من خلال مواقع التواصل الاجتماعي جالهم 5 مدربات عندهم خبرة، وعلشان كده أطلقوا موقع Dosy علشان يسهلوا فكرة تعليم السواقة للبنات.
وقالت منى فاروق إن مشروعهم بيساهم في تعليم البنات السواقة كخطوة يواجهوا بيها زحمة الطرق وزيادة أسعار المواصلات ومواجهة التحرش في المواصلات العامة.
المبادرة هدفها إثبات ثقافة أن البنات قادرات على سواقة العجل والاسكوتر علشان يروحوا بيه الشغل أو أي مكان، باعتباره وسيلة مواصلات سريعة وسهلة وأقل تكلفة من المواصلات العامة، وده اللي لقى إقبال من فنانات كتير في مصر زي “نشوى مصطفى، وساندي، ونجلاء بدر” وغيرهن.
المشروع بدأ كصفحة على موقع فيسبوك، وبعدين عملوا موقع لتسهيل التعامل مع المتدربات، وقريب هيطلقوا تطبيق متخصص في تعليم سواقة العجل والاسكوتر، والأسعار عندهم معقولة.
وكمان هما بيقدموا خدمة توصيل الطلبات من خلال البنات وبيوصلوا الأكل والشرب والكتب وغيرها، من خلال خدمة “دوسي دليفري” وشغالين في مناطق مصر الجديدة، الشيخ زايد، المعادي، ولسه ناويين يتوسعوا في مناطق تانية كتير.
وعلشان تعرفوا أكتر عن Dosy زوروا صفحتهم على الفيسبوك من هنا.
أو زوروا الموقع الإلكتروني من هنا.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
