The Definitive Guide to Living in the Capital , Cairo , Egypt

لسنين طويلة، مصريين كتير بالخارج كانوا بيعانوا من صعوبة إدخال سيارتهم الشخصية اللي اشتروها في البلد اللي هم مقيمين وشغالين فيها لمصر بطريقة سهلة، وكانت أبرز مشكلة بتواجههم هي دفع رسوم جمارك مبالغ فيها. المشكلة دي اتحلت تقريبًا مؤخرًا، بعد ما أعلنت مصر عن مبادرة “تيسير استيراد سيارات الاستعمال الشخصي للمصريين المقيمين بالخارج”، واللي هيقدر من خلالها المصريين بالخارج يدخلوا سياراتهم لمصر بالتيسيرات الجديدة وعبر خطوات بسيطة. مش بس كدة، دول كمان هيقدروا يحصلوا على مبلغ الجمارك اللي دفعوه بالكامل بعد مرور 5 سنين.

و المبادرة اللي بدأت من 15 نوفمبر، هتستمر لمدة 4 أشهر، وهتنتهي في 14 مارس 2023.

وعلشان تفهم نقطة الحصول على مبلغ الجمارك، خلينا نوضح لك إنه في البداية بيتم إيداع المبلغ المقابل للرسوم الجمركية المعفاة بالعملة الأجنبية في حسابات وزارة المالية بمصر، لكنك هتقدر تسترد المبلغ اللي دفعته للجمارك كامل بعد مرور 5 سنوات، وهتستلمه بالجنيه المصري بسعر الصرف المعلن من البنك المركزي المصري وقت الاستحقاق.

 

فريق كايرو 360 هيعرفكم خطوة بخطوة إزاي تستفيدوا من مبادرة “سيارات المصريين بالخارج”:

في البداية وعلشان تستفيد من مبادرة “سيارات المصريين بالخارج”، هتحتاج لتحميل التطبيق الإلكتروني الرسمي “سيارات المصريين بالخارج” على تليفونك الذكي سواء من متجر جوجل بلاي، أو آب ستور.، واللي بيتيح للمصريين المقيمين بالخارج التقدم للاستفادة من مبادرة “تيسير استيراد سيارات الاستعمال الشخصي للمصريين المقيمين بالخارج”.

بعد تحميل التطبيق هتقوم بالخطوات دي:

1- إنشاء حساب ببريدك الإلكتروني ورقم الهاتف المحمول.

2- هتسجل البيانات الشخصية الخاصة بك زي تاريخ الميلاد، الرقم القومي، رقم جواز السفر، وبلد الإقامة الموجود به.

3- هتختار السيارة المراد استيرادها من حاسبة الرسوم.، ويمكن بخطوات بسيطة حساب تكلفة سيارتك عن طريق إدخال بيانات سيارتك.

4- قم بالضغط على أيقونة الموافقة على الشروط والأحكام.

5- هيكون مطلوب منك بعدة كدة متابعة تعليمات التحويل البنكي على الحساب الخاص بوزارة المالية المصرية، ويمكن تحويل الرسوم عن طريق حسابك البنكي الخاص بك أو الخاص بواحد من أقارب الدرجة الأولى في مدة لا تتعدى الأربعة أشهر بحد أقصى.

6- هتتابع حالة الطلب الخاص بك بعد التحويل للحصول على الموافقة الاستيرادية، وبعدها هتقدر تستلم سيارتك من الجمارك.

رابط تحميل تطبيق “سيارات المصريين بالخارج”:

تقدر تحمل التطبيق من جوجل بلاي من هنا، ومن آب ستور من هنا.

 

شروط الاستفادة من مبادرة “سيارات المصريين بالخارج”:

حددت الحكومة المصرية شروط لازم تتوفر في الشخص علشان يقدر يستفيد من مبادرة استيراد سيارات المصريين في الخارج المعفاة من الجمارك، وبتشمل أن يكون المستورد مصري الجنسية، وعمره فوق 16 سنة، بالإضافة إلى تمتعه بإقامة قانونية سارية في الخارج، حتى لو ماكنتش مقيم بالفعل بالخارج.

كمان لازم يكون عند المصري شخصيًا، أو عند (زوجك/زوجتك أو والدك/ والدتك)، حساب بنكي في بلد الإقامة مضى على فتحه ثلاثة أشهر على الأقل.

ومهم تعرف إنه بيحق لأكثر من فرد بالأسرة الواحدة الاستفادة من التيسيرات الجديدة لاستيراد السيارات، طالما توفرت الشروط المقررة.

 

هتستلم عربيتك منين في مصر؟

بتسري التيسيرات الجديدة المقررة للمصريين المقيمين بالخارج على الاستيراد من المناطق الحرة داخل مصر، وبتخضع لنفس الإجراءات المقررة لاستيراد سيارة من دولة الإقامة، وبتوفر المنصة الإلكترونية إمكانية اختيار واحدة من المناطق الحرة داخل مصر كجهة وارد.

 

طيب تعمل إيه لو ملقتش نوع السيارة اللي حابب تدخلها مصر على المنصة؟

ببساطة شديدة، في حالة طلب موديلات غير مدرجة بالمنصة بيتم إضافة نوع السيارة، وتقديم طلب استعلام لتحديد المبلغ النقدي المستحق، وبيتم الرد عليه خلال 3 أيام عمل من تسجيل ماركة وطراز السيارة.