رمضان قرب يخلص.. يا ترى هتفتقد إيه في الشهر الكريم؟
Mohammed Sabry
في آخر أسبوع من رمضان، فريق كايرو 360 عمل استطلاع رأي، عن الحاجات اللي الناس هتفتقدها في رمضان لما يخلص. الإجابات كانت مختلفة بين صلاة التراويح، واللعب، ولمة العائلة، وغيرهم كتير. تعالوا نشوف الناس ردت وقالت إيه:
أحمد أبو زهرة قال لنا أنه هيفتقد “صلاة الجماعة والتراويح”.
أما عبد الرحمن ناصر فقال: “لعب الكوره بعد السحور. حجرين المعسل القص برج الأصلى بعد الفطار”.
وأكد جون بنيامين أن أكتر حاجة هيفتقده هي إنه ممكن من أول ما أنزل الصبح لغاية ما أرجع الضهر، مش بشم دخان سيجارة واحدة”
بالنسبة لمحمد أشرف فأجمل حاجة في رمضان هي: “اللمه على الفطار لها طعم جميل، عكس الأيام العادية”
مالك حمودة أكد أنه بصفته كمصور شارع بيحاول يهتم بأدق التفاصيل فهيفتقد بصمة رمضان في كل حاجة حوالينا، وأجواءه في الشوارع. من أول عربيات الفول اللي بتبقى موجودة في كل مكان، وصفوف علب الزبادي اللي عند اللبانين، الزينة والفوانيس، صلاة التراويح في مسجد عمرو، هدوء وفضى البلد وقت الفطار. وإنه بيستغل الوقت ده في اللف في الشوارع. وطبعًا لمة الأصحاب اللي مابتحلوش غير في رمضان. وأضاف “رمضان له روح كده تحسها لوحدك، من غير ما حد يقولك إن دي روح رمضان. بشوفها في وشوش الناس وشكل الشوارع اللي بتستفزني إني أصورها”.
مصطفى متولي قال لكايرو 360 أنه هيفتقد “الخير اللي الناس بتعمله، مبتحسش إن في حد غلبان أو جعان أو محتاج”
أما أحمد دهمان فاتكلم عن “معايير الناس الأخلاقية، تحس أن الأمر سهل خالص، يعني رمضان ييجي، يروح يدور المفتاح يبقى إنسان جميل، ويدعوا للحب والأخلاق. يخلص رمضان يرجع كائن غريب الأطوار مرة أخرى. الناس دي غريبة، بحس أنها عايزة توصل رسالة للجميع خلال شهر رمضان. عايزين يقولوا إحنا ممكن نبقى محترمين، بس مش هنعمل كده. هما يومين رمضان بس آخركم معانا، لكن إحنا بنحب نبقى كده على طول”
والشناوي محمد اسماعيل قال لنا أنه هيفتقد “قرآن قبل المغرب. الزينة والفوانيس وتوزيع التمر قبل المغرب. والروح الواحدة الي بتسود بين الناس”
وبضحكة حلوة قال يوسف حنا انه هيفتقد “الرذالة على أصحابي المسلمين، وأفطر معاهم بالعافية”
أما أحمد باسط فقال “هفتقد مواعيد العمل في رمضان 6 ساعات بس”
أما Mo Him فقال:
“هفتقد أوي قمر الدين، أصلي بحبه جدًا. وأكتر حاجه بحبها في رمضان، أنتخة بعد الفطار قدام التلفزيون”.
نها رضوان أكدت: “أنا هفتقد الراحة النفسية والجسدية. رغم إننا طول العام في معية الله، إلا إن في شهر رمضان المبارك باشعر باحتواء ربنا لعباده قوي. في الشهر ده باشعر بطبطبة ربنا علينا.. هو شهر رسالة رحمة وجبران خاطر وراحة وطمأنينة من الله”
ماريانا بطروس قالت بسخرية:
“هيوحشني دعا الناس عليا في الشارع وأنا ماشية. هيوحشني كسل وعصبية الناس في شغلها بحجة الصيام. وهيوحشني سرقة البياعين والأسعار اللي بيزودوها علي حس رمضان”
شيماء محمد قالت: “هفتقد هدوء الشوارع وقت الفطار. سكون تام بيحسسك إنك فجأة اتنقلت لجزيرة مفيش حد فيها غيرك”
أما محمود علاء محمد فقال أنه هيفتقد “أدب الناس، وكلمة اللهم إني صايم وصلاة الفجر، وفرحة الأطفال بالفانوس. حاجات كتير برغم تفاهتها بس مبتحصلش إلا في رمضان”
وقال مصطفى فتحي انه بيحب في رمضان أن معدل الجريمة بيقل.
دي كانت أراء الناس عن الحاجات اللي هيفتقدوها في رمضان.. يا ترى، انتوا هتفتقدوا إيه؟
مقترح
الحياة في كايرو
سكن بالإيجار من الحكومة بدل التمليك؟ مشروع جديد قيد الدراسة يفتح باب الأمل لغير القادرين
الإسكان في مصر الإيجار القديم +5
الحياة في كايرو
