The Definitive Guide to Living in the Capital , Cairo , Egypt

الجو مش عاوز قعدة في البيت، بالعكس، ده عاوز خروجات مميزة تساعدنا على التغلب على حالات الاكتئاب اللي ممكن تصيبنا مع قرب دخول الشتاء، لكن مهم قبل أي خروجة في الموسم ده نعرف درجات الحرارة ونصائح الأرصاد.

وعلشان خروجة مميزة ماتتنسيش، هنقول لكم في السطور الجاية على 3 أماكن داخل القاهرة تقدروا تخرجوا فيهم في جو عائلي مميز وتستمتعوا بالخضرة والجو الجميل اللي نسمات الهواء فيه بتكون منعشة.

 

فاميلي بارك الرحاب

لو عاوزين أفضل مكان مفتوح في القاهرة، بنرشح لكم المكان ده، عالم مدهش وسط مساحة خضراء شاسعة. هناك تقدروا تجروا وتلعبوا بكل حرية وكمان تعملوا أكتر من نشاط ترفيهي زي النهر السحري وحديقة الحيوان والسفاري، وده غير الملاعب والمراكز الثقافية والمطاعم، وكل ده بسعر تذكرة 60 جنيه بس، والجمعة والسبت بيكون سعر التذكرة 70 جنيه، وبتكون شاملة الدخول و3 ألعاب وحديقة الحيوان.

زوروا صفحتهم على الفيسبوك من هنا.

العنوان: طريق السويس، بالقرب من مدخل الرحاب 2.

رقم التليفون: 01159655590.

 

فاميلي لاند المعادي

لو عاوزين ألعاب بجد ومتعة ما بعدها متعة، فننصحكم بزيارة فاميلي لاند المعادي، وهناك هتلعبوا ألعاب ترفيهية كتير زي الملاهي اللي سعرها من 15 حتى 40 جنيه، والبولينج سعره 35 جنيه لـ20 رمية، والتزحلق على الجليد 30 دقيقة وسعره 50 جنيه، ده غير ألعاب الأسكواش والفيديو جيم وغيرها وبدون رسم دخول.

وتقدروا تزوروا صفحتهم على فيسبوك من هنا.

العنوان: 11 أبراج عثمان، كورنيش المعادي.

رقم التليفون: 01002584606 – 0225243400.

 

الكامبو بارك

هي مساحة كبيرة في قلب النيل متقسمة لقعدات كتير مختلفة، وكل قعدة فيها شواية لكل أسرة لوحدها، يعني تقدروا تجيبوا أكلكم وتشوا وتعملوا اللي عاوزينه وسط مساحة خضراء وفي قلب النيل، وتقدروا تأجروا زوديك في مكان مخصص للأطفال علشان تستمتعوا بيوم جميل ومميز، ومواعيدهم من 10 صباحًا حتى 10 مساءً، ما عدا الجمعة من 1 ظهرًا.

وهما عندهم 4 أنواع من تذاكر الدخول تبدأ من 182 جنيه للكبار و125 جنيه للأطفال، وهي التذكرة البلو، وبتشمل حجز قعدة بالشواية والأنيميشن والباركينج والكيدز إيريا، ويوم الجمعة بيكون فيه معلمة رسم وتلوين للأطفال، وتذكرة بسعر 205 جنيه للكبار و148 للأطفال وبتشمل كل اللي فات مع مشروب ولعبة، وكمان تذكرة بسعر 228 جنيه للكبار و171 للأطفال بتشمل كل اللي بتعملوه في التذاكر البلو مع مشروبين أو لعبة مع مشروب، وكمان عندهم تذكرة بـ600 جنيه للكبار و500 جنيه للأطفال وتشمل داي يوز ووجبة وبوت في النيل ومشروبين أو مشروب ولعبة في النيل.

وكل التفاصيل ممكن تعرفوها من خلال صفحة الفيسبوك من هنا.

العنوان: الجيزة – بعد نزلة الدائري – إتجاه المنيب أبو النمرس، بالقرب من مترو المنيب.

رقم التليفون: 37493173 02-  أو 01093455959.