The Definitive Guide to Living in the Capital , Cairo , Egypt

العيد خروجات وفسح مش قعدة في البيت، لكن كتير مننا مش بيبقى عارف هيروح فين وييجي منين، وخاصة لو أسرة أو شلة أصدقاء وكل واحد له رأي وفكر مختلف، ولكن القاهرة عامرة بالخروجات المميزة واللي ممكن تختاروا منها كتير وهتلاقوا في موقع كايرو 360 حاجات كتير تختاروا منها، وفي المقال ده هنقولكم على 5 حدائق الخروجة فيهم ممتعة وسعر التذاكر بيبدأ من 5 جنيه.

حديقة الطاهرة

بالقرب من منطقة سراي القبة وقصر الطاهرة هتلاقوا المكان اللي مهتمين فيه بالمساحات الخضراء ولكن للأسف ممنوع دخول الأكل عندهم ولكن فيه كافيهات ومطاعم مميزة هناك، وكمان عندهم منطقة ألعاب بسعر معقول.

 

حديقة عابدين

مكان مميز موجود في وسط البلد قدام قصرعابدين، والدخول لها بـ5 جنيه، ومسموح بدخول المأكولات، وهتقعدوا ببلاش في الأماكن المحددة أو تقعدوا على كافيه من الكافيهات المنتشرة فيها، وعندهم كيدز إيريا كمان.

 

الحديقة اليابانية

على الطراز الياباني هتلقوا برجولات وأشجار عتيقة وقعدة حلوة داخل الحديقة اليابانية في حلوان، وعندهم منطقة ألعاب للأطفال وكمان فيه أماكن للقعدة وكافيهات مختلفة، وسعر التذكرة 10 جنيه ومسموح بدخول المأكولات والمشروبات.

حديقة الطفل

داخل منطقة مدينة نصر تقدروا تزوروا حديقة الطفل وتلعبوا وتتنططوا بتذكرة سعرها 20 جنيه، ومسموح فيها بدخول المأكولات وهي مناسبة جدًا للأسر والمجموعات اللي عاوزين ياخدوا راحتهم وسط الخضرة والمساحة الكبيرة بدون قيود.

 

حديقة أم كلثوم

عندهم منطقة ألعاب للأطفال تبدأ من 15 جنيه، وسعر تذكرة الدخول للفرد 20 جنيه والأطفال 10 جنيه، ومسموح دخول المأكولات والمشروبات معاكم وهي على النيل في المنيل، وده الأفضل في ظل غلاء أسعار الكافيهات هناك.