The Definitive Guide to Living in the Capital , Cairo , Egypt

الحياة في كايرو -
مقترح

سقارة كانترى كلوب: رحلة بالدراجات الرباعية حول صحراء القاهرة

سقارة كانترى كلوب: رحلة بالدراجات الرباعية حول صحراء القاهرة
بواسطة
Jessica Noble

صعب تتخيل وسط الزحمة والدوشة الفظيعة فى وسط البلد، إن من مئات السنين، الأبراج العالية والزحمة اللى ما بـ تنتهيش كانت مالهاش وجود؛ مصر فى يوم من الأيام كانت مجرد صحراء واسعة. من أيام الفراعنة، والأهرامات العظيمة اللى بناها المصريين القدماء واقفة بكل عظمة وفخر كمصدر لجذب السياح. لو كنت مع فوج سياحى أو مع نفسك، أكيد الهروب من ضغط القاهرة عشان تستكشف روعة أثار القاهرة يعتبر عرض لا يقاوم.

أهرامات الجيزة هى أكثر الأماكن شهرة وبـ يزورها ناس كثير، وفى نفس الوقت الأثار الأصغر حجماً المخفية وسط أماكن بعيدة فى الصحراء عادة بـ تبقى مهملة وصعب توصلها. كثير من المهتمين بالموضوع ده بـ يأخذوا جمل أو حصان علشان يقربوا للمنشآت القديمة، والاثنين ممكن يبقوا وسيلة تنقل مش مريحة وممكن كمان تتقرص من الناموس.

علشان نجرب طريقة تنقل أسرع وممتعة أكثر، زرنا سقارة كانترى كلوب علشان نشارك فى واحدة من جولاتهم بالدراجات الرباعية. البيتش باجى الصغير بأربع عجلات مناسب للطرق الرملية وبـ يساعد السواق أنه يتجول بحرية وبسرعة وسط الصحراء، وكمان نسيم الهواء كان لطيف وساعدنا نستحمل درجة حرارة الصحراء الشديدة.

سقاره كانترى كلوب موجود فى طريق سقاره السياحى، وهو بالضبط نفس الصورة اللى وعد بيها موقعهم الرسمى؛ فيلا ضخمة على الطريقة الشرقية بـ تطل على مساحة نظيفة وجذابة.

بعد ما ركنا فى الجراج الخاص بالمكان، طلعنا على اللوبى الواسع المريح بتصميمه المعاصر، وهناك رحب بينا عدد من الموظفين المهذبين، رغم أننا حجزنا متأخر، قدروا أنهم يجهزوا لنا مكان فى وقت مناسب. المرشد الخاص بينا طلب مننا نمشى على ثلاث قواعد : نفضل قاعدين، ونفضل قريبين منه وبلاش السرعة على التلال الرملية. المفاجأة كانت إن مافيش خوذ واقية، وبكده كان لازم نمشى على القواعد دى.

زى ما توقعنا، كنا الوحيدين فى المجموعة، وده كان لطيف علشان الشعور بالألفة، وتعتبر جولة خاصة كلفت كل واحد فينا 175جنيه للساعة. مكان النادى يطل مباشرةً على المسار الصحراوى، وبكده ضاع وقت قليل فى الوصول للطريق وبداية الرحلة.

بعد شرح طريقة استخدام الدراجات، المرشد السياحى كان فى المقدمة، وكان سابقنا بحاجة بسيطة معظم الوقت، واحتاجنا حوالى خمس دقائق علشان نشوف مجموعة من الأهرامات بسبب الضباب؛ وللأسف، مقدرناش نشوف أهرامات الجيزة وقت رحلتنا.

منطقة سقارة بـ تحتل مساحة كيلومترات، وهى منطقة مشهورة بأنها مدافن للفراعنة والنبلاء، وهو ده سبب وجود عدد من الأهرامات والمقابر هناك، زى الهرم المدفون اللى بناءه ما خلصش، واللى بدأ فى عهد الملك سخم-خت فى عصر الأسرة الثالثة.

هرم ثانى يعتبر من أشهر الأهرامات اللى عدينا عليها، هو هرم زوسر المعروف بالهرم المدرج، وده واحد من أقدم المبانى حتى من قبل بناء أهرامات الجيزة. الهدف من الهرم هو بناء مقبرة للفرعون زوسر فى زمن الأسرة الثالثة، ما بين سنة 2667 قبل الميلاد و2648 قبل الميلاد، وزى ما بـ يوضح اسمه، الشكل الخارجى للهرم عبارة عن ست مصاطب تميزه عن أهرامات الجيزة المستوية.

بـ يقولوا أن مقبرة زوسر منخفضة عن سطح الأرض الصحراوية بحوالى 95 قدم، ولما اكتشفوا الموقع سنة 1934 مع رسومات معقدة، أبواب مضللة وخزائن غريبة، كل اللى وجدوه فى المقبرة كان رجل شمال لمومياء محنطة، لو ماكناش فى رحلة على الدراجات وسط الصحراء، كنا قدرنا نستكشف المجمع الأثرى على رجلينا “بـ نهزر طبعاً”.

لفينا حوالين أهرامات كثيرة أحجامها أصغر وكانت باعتراف الكل إبهارها أقل خالص من هرم زوسر وأهرامات الجيزة، ورغم كده، الجو العام وسحر أسرار الفراعنة المجهولة كانت كافية لتسحرنا.

ركوب الدراجات الرباعية “البيتش باجي” مع سقارة كانترى كلوب لها طعم تانى، وتجربة لازم تعيشها عشان تشوف أهرامات رائعة بـ تتنسى كل ما تيجى سيرة المعالم الأثرية. ساعة كاملة كانت كافية وزيادة، وعموماً الدراجات ممكن تتأجر لأى مدة.

خلى بالك أن مفيش خوذ واقية عندهم أو أى نوع من الحماية، بـ ننصح إنك تجيب خوذتك معاك، وعلى مهلك خاااالص، ورحلة سعيدة.

مقترح