The Definitive Guide to Living in the Capital , Cairo , Egypt

شهدت مصر ملبقترة الأخيرة افتتاح برج مأخذ سور مجرى العيون واللي معروف باسم “قناطر المياه”، وده بعد تطويره وترميمه، وهو من الآثار الإسلامية المسجلة من سنة 1951، وبيمتد من فم الخليج لحد باب القرافة في السيدة عائشة بطول 3 كيلو متر، وفيه 292 فتحة بتبدأ من برج المأخذ اللي بيمثل الجزء الأول للساقية، وبيتكون من برج سدادسي صنع من الحجر، وعلى السطح فيه 6 سواقي بيتم الوصول ليهم من الجانب الشرقي بطريق منحدر.

برج المأخذ بيتوسطه من أعلى حوض كبير سداسي من الطوب الأحمر وده لمنع تسريب المياه، والسواقي الـ6 اللي في سطح البرج بترفع المياه له علشان تصب في الأحواض الصغيرة وبتوصل لحوض الوسط الكبير عن طريق ممرات صغيرة عبارة عن عقود مدببة، وهي تاريخيًا ترجع لعصر السلطان الغوري، وكانت بتستخدم بالفعل حتى سنة 1872.

تم انشاء قناطر مياه مجري العيون في عهد صلاح الدين الأيوبي وكان الهدف منها تزويد القلعة بالمياه، وتم تجديدها بالكامل في عهد السلطان الناصر محمد بن قلاوون، وأسس السلطان الغوري خلال حكمه مأخذ مياه للقناطر فيه 6 سواقي بالقرب من مسجد السيدة عائشة، ومش فاضل من قناطر صلاح الدين الأيوبي غير بقايا في بداية المجرى من ناحية القلعة والمواجهة لمسجد السيدة عائشة.

ومن ضمن التطوير اللي عمله محمد بن قلاوون هو بناءها كاملة على مرحلتين فيهم 4 سواقي على النيل بفم الخليج علشان ترفع المياه من خليج صغير عند حائط الصد واللي اسمه “اسطبل عنتر” وهو قريب من مسجد أثر النبي، وبتتكون القناطر من سور ضخم من فم الخليج حتى ميدان السيدة عائشة، رغم أن أصلها كان ممتد لحد القلعة، وتم بناء السور من حجر النحيت، وبتجري عليه مجراة فوق مجموعة القناطر، وكانت بتنتهي أنها بتصب المياه في آبار القلعة.

أما السلطان الغوري بنا مأخذ مياه جديد فيه 6 سواقي وكانت قريبة من السيدة نفيسة علشان يقوي وصول تيار المياه لآبار القلعة، وخلال العصر العثماني تم إصلاح سقاية فم الخليج أكتر من مرة، واستخدمتها الحملة الفرنسية حصن للمراقبة، وعملوا فتحات لمدافعهم، وفي عصر محمد علي باشا اتعمل تفريعة علشان المياه توصل لمدافن العائلة المالكة وقبة الإمام الشافعي.

ومن ضمن مشروع إحياء القاهرة التاريخية نجحت الحكومة في تطوير وترميم السواقي الخشبية لقناطر مجرى العيون، وإزالة التعديات بالكامل ومعالجة وتنظيف الأحجار، وإزالة طبقات السناج المتراكم من المياه والاتساخ، وكمان اتعمل صيانة لكل الأرضسات والأشغال الخشبية وتأهيل السلالم والفتحات ورفع كفاءة المنطقة المحيطة بيها.