Omar Abd-elmaqsoud
القاهرة .. اتقال عنها كلام كتير، عن سحرها وعن جمالها، عن أصالتها وحضارتها، عن زحمتها وجوها، وبكمالة اللي اتقال عنها، إنها “على قد الإيد”.
ده اللي قالته مجموعة كبيرة من المواقع الأجنبية المهتمة بمواضيع السياحة والسفر، واللي كان منهم “ديلي إكسبريس” الإنجليزية. اللي اعتبرت القاهرة أفضل وجهة سياحية في العالم، وعلى قد الإيد. هتلاقوا فيها كل اللي بتدوروا عليه من معالم حضارية مفيش زيها في العالم، وشواطئ ملهاش منافس.
كمان موقع حجز السفر على الإنترنت (lastminute.com) قال إن القاهرة تصدرت قائمة أفضل ثلاث مدن اقتصادية على مستوى العالم، ده غير إنك هتلاقي فيها الأمان والترفيه والراحة. بعدها مكسيكو سيتي في المكسيك، وأنطاليا في تركيا. وده طبعًا بعد تقييم الموقع لأسعار الوجبات، وتكاليف الإقامة، ورسوم التنقل.
بحسبة بسيطة من lastminute لقى إن السايح ممكن يستمتع بيوم واحد في مصر بمبلغ إجمالي 42.38 جنيه استرليني، يعني حوالي 955 جنيه مصري. وإن ممكن بالرقم ده تزور الأهرامات، وتتسوق في خان الخليلي.
نرجع تاني لـ “ديلي إكسبريس” اللي عملت مقارنة بين القاهرة ومدينة لاس فيجاس الأمريكية. وللي كانت نتيجتها إن السايح في القاهرة هيلاقي تاريخ عريق، وراحة وهدوء واستجمام. بسعرٍ أقل من لاس فيجاس، مناسب لميزانية أي سايح. وده معناه كمان إن السايح هيلاقي مزايا في القاهرة، أكبر وأكتر من اللي هيلاقيها في لاس فيجاس. اللي مشهورة بس بفنادقها وملاهيها الليلية. ومفيهاش أي آثار تاريخية أو تراث أو آثار زي مصر.