The Definitive Guide to Living in the Capital , Cairo , Egypt

يمنى أحمد

شغف! كلمة بندور بها على نفسنا، على الحاجات اللي بنعملها كل يوم، على وجودنا في الشوارع وفي الشغل وفي المدارس والجامعات، وبتبقى أيام صعبة أوي اللي بنفقد فيها شغفنا تجاه كل حاجة كنا بنحبها، بس بنرجع ندور عليه تاني.. في نفس الوقت ده إحنا في كايرو 360 بندور على كل حاجة في القاهرة بشغف، وبنكتب السطور دي بشغف، علشان يوصل لكم كل حاجة في العاصمة تقدر تغير ولو جزء بسيط من حياتكم أو تعيشوا يوم واحد فيها برضه بشغف!

النهاردة بنكتب لكم عن مكان جديد، في مصر الجديدة، تحديدًا في الكوربة، واسمه «شغف»! يلا بينا نستكشف مع بعض المكان..

شغف هو Co-working space في مصر الجديدة، بس الفرق أنها مش مساحة عمل مشتركة عادية، المختلف فيها مش بس مكانها المميز ولا سعرها المعقول ولا الهدوء اللي فيها، كل دي مميزات بس أكتر حاجة بتميزها هيا الروح الحلوة اللي في المكان. المكان فيه أنشطة كتير وكلها متنوعة، وتقدر تحتويك بكل حالاتك وكل مشاعرك، سواء كنت لوحدك أو معاك شريك حياتك أو معاك صحابك، سواء كنت مشغول أو فاضي، وأخيرًا سواء قررت تقضي يومك كله هناك ولا تقعد ساعات بسيطة بس، وكله بسعر مناسب.

المكان مقسم لغرف كتيرة، فيه غرفة للعب، وفيها ألعاب فردية كتير وألعاب جماعية منها البلايستيشن و Pes و Fifa، ده غير إن فيه netflix  و Watch it، فهتلاقي هناك كل عوامل الراحة والإنبساط، وكمان فيه غرفة للمذاكرة والعمل، وده هيديك مساحة إنك تقدر تنجح أكتر، لأن استايل المكان مريح والألوان مبهجة ومريحة للعين، غير الإضاءة القوية والهدوء هناك، فهتحس بالسكينة وإنك مقبل على المذاكرة أكتر أو بالإنجاز لو عندك تاسكات كتير مطلوبة منك في الشغل.

ده كله طبعًا غير غرفة الاجتماعات، لو عايز تتناقش في موضوع مهم مع صحابك، أو لو فريق عمل وحبيتوا تغيروا من اجتماعات المكتب وغيره، أو لو حتى العلاقة اتوترت بينك وبين اخواتك وحبيتوا تقعدوا تتناقشوا بعيد عن البيت شوية، هتقدروا تنبسطوا في المكان مع طلب مشروب مفضل أو ممكن غدا كمان، الفكرة في المكان مش إنه بس حلو، ولكن هتحس هناك وفي وسط الأجواء دي إنك هتجدد شغفك تجاه الحاجات اللي بتحبها.

الخروج هناك على قد الإيد، أول ساعة بـ 15 جنيه بس، وبدءً من الساعة الثانية تقدر تدفع 10 جنيه، وده طبعًا في الأيام كلها، بس فيه أيام فيه عروض بتميزها، زي يوم الأربعاء اللي لو وصلت فيه الساعة 7 مساءً هتلاقي قعدة غنى ورغي ومزيكا وحاجات حلوة كتير ترجعك للزمن القديم، أما أيام السبت والإثنين والأربع، فتقدر تشرب قهوتك هناك ببلاش من الساعة 6 الصبح لحد الساعة 3 العصر، وفي كل الأيام وبكل الحالات تقدر تاخد صور كتير حلوة سواء كنت لوحدك أو مع صحابك، هتلاقي هناك طعم الونس والعيلة واللمة، وهتلاقي برضو نفسك بشغف جديد!

تفاصيل أكثر؟

العنوان: 8 عثمان بن عفان، صلاح الدين، مصر الجديدة.

تقدروا تتعرف عليهم أكثر من هنا.