The Definitive Guide to Living in the Capital , Cairo , Egypt

الجو الفترة دي لا هو حر وشمس سخنة، ولا ممطر ورعد وسقعة، وده أفضل وقت للخروجات في أماكن مفتوحة للاستمتاع بالأجواء، ومن أجمل الخروجات اللي مش واخدة حقها هي المحميات في القاهرة، واللي موجودة حوالينا وزيارتنا لها قليلة. تعالوا نتعرف على 3 محميات مهم أنكم تزوروهم وتستمتعوا بأجواءهم.

وادي دجلة

من أشهر المحميات المعروفة في القاهرة، وبتمتد بطول 30 كيلو متر، وفيها صخور حجر جيري وغنية بالحفريات وتاريخها يعود لـ60 مليون سنة، وفيها هتلاقوا كائنات حية متحجرة زي الغزلان والأرانب والثعالب وغيرهم، وكمان مسجل فيها 18 نوع من الزواحف.

العنوان: طريق الأوتوستراد – زهراء المعادي.

 

الغابة المتحجرة

من أهم وأشهر المحميات في القاهرة وهتلاقوا فيها بقايا لجزوع وسيقان أشجار ضخمة متحجرة وواخدة شكل الصخور وهتلاقوها بكل المقاسات بداية من سم حتى عدة أمتار، وكلها بتتجمع مع بعض علشان كده سموها الغابة المتحجرة، وهي اتكونت بسبب أن مكانها كان فرع لنهر النيل زمان.

العنوان: التجمع الخامس – طريق المعادي القاهرة الجديدة.

محمية قبة الحسنة

يمكن كتير مايعرفوش عنها حاجة، رغم أنها بتعتبر متحف جيولوجي مفتوح ومعهد لعلوم الأرض والتراكيب الجيولوجية، وتكونت من 40 مليون سنة، وفيها حفريات مرجانية متميزة. والمحمية شاهد على العصر الطباشيري الأول من 100 مليون سنة، وعلى التكوينات الجيولوجية والصخور من 60 مليون سنة، ده غير النباتات النادرة اللي فيها.

العنوان: 6 أكتوبر – طريق القاهرة الإسكندرية – بالقرب من منطقة الأهرامات.