The Definitive Guide to Living in the Capital , Cairo , Egypt

كثير مننا من كتر ما اتعود أن شغله ده شيء مسلم بيه، ما بقاش عنده طاقة أنه يخلصه، أو شغف وحب للي هو يعمله، فحبينا نعرض عليكم شوية أفكار ممكن تساعدكم تنتجوا أكثر في الشغل، رغم كل الصعوبات.

 

 

 

اسمع مزيكا حلوة

لو أنت من الناس اللي بتزهق بسرعة، جرب تعمل لنفسك كذا play list على soundcloud، سماعات في ودانك واسمع مزيكا وانت بتشتغل وأكيد مش هتحس باليوم.

 

اوعى تبدأ يومك بالأخبار

ابتعد واحذر ارتفاع ضغط الدم، بمجرد ما تبدأ يومك على خبر سياسي من بتوع اليومين دول، هتبدأ تاخد مهدئات ومش هتبقى مستحمل حد يكلمك، لأنك عندك ضغوط كافية في حياتك، فمش طالبة سياسة خالص على الصبح بالذات.

 

جرب تشتغل من مكان مفتوح

حتى لو يوم واحد في الأسبوع جرب تشتغل من بره المكتب، وسط الخضرة أو في كافيه مفتوح، شعورك هيختلف تمامًا عن شورك في المكتب، وهتنتج أكثر بدون مشتتات أو دوشة.

 

خليك طموح

 بصوت الفنان رشدي المهدي اللي قام بدور والد محمد هنيدي في فيلم جائنا البيان التالي، خلي دائمًا أمامك هدف عاوز توصل له، ومهما تقف قدامك عوائق أو ناس هدامة ما تسمعش كلامهم وابني مستقبلك بإصرار.

 

خلي عندك هواية ثابتة جنب الشغل

كتير من الناس الموهوبة بيهملوا موهبتهم بمجرد ما الحياة تسرقهم ويشتغلوا ويتجوزوا، برغم أن تنمية الموهبة دي جزء منهم، ولما بيهملوها حتة من روحهم بتنطفي، وما بيبقوش بيعملوا شغلهم بحماس، مش شرط تكون الموهبة هي الشغل، بس لو أنت من المحظوظين دول يبقى لازم تتفنن فيها وتبدع.

 

التوازن هو سر الوصول للنجاح

حاول توازن بين شغلك وأهلك وصحابك وصحتك علشان توصل صح من غير ما تكون مدمن شغل أو مهمل ليه، مافيش إنسان سوي بيكون مبسوط لو وصل لأعلى مكانة في شغله وعيلته مدمرة أو وحيد، والعكس صحيح.

 

خد لك وقت للراحة

خلي عندك وقت راحة في اليوم يا إما ساعة  على بعضها أو كل ساعة شغل مثلًا 5 دقائق راحة علشان ما تزهقش وممكن تعمل فيهم تمرينات رياضية مفيدة جدًا وبسيطة تقوي عضلات ضهرك لو بتقعد أدام المكتب كتير.

 

 رفقاء الرحلة اللي بيهونوا اليوم

القهوة الحلوة قادرة أنها تخلي يومك يبدأ بورود أو يبدأ بعنين مقفولة مش شايفة قدامها، كمان الشاي الأخضر أو الأعشاب بشكل عام بتخليك تننتج أكثر، وحاول تتنجب الأكل السريع غير الصحي، لأن في الآخر أنت اللي هتضر، وجسمك مش هيتحمل.

 

نام كويس

لازم توازن بين عدد ساعات نومك وشغلك وحياتك، لكن مهما تشرب قهوة لو ما نمتش كويس، هتتحول لزومبي مش عارف يركز أو ينتج أي حاجة.

 

خلي بالك من حرامية الوقت

حدد وقت معين تخلص فيه المهام المطلوبة وتبقى عامل حسابك أنه يبقى بدري يومين على الأقل عن معاد التسليم، لأن أنت عارف الحاجات اللي بتطلع فجأة علشان تعطلك، والمشاكل اللي بتحصل فجأة فبتاخدك من الشغل، وارفض الاجتماعات اللي بتضيع وقت، ولو لازم تعمل اجتماع يبقى فيه نقط محددة تتكلموا فيها ولازم تخلصوها فيه. وبلاش تكون مثالي قوي في تخريج الشغل لدرجة الهوس، بلاش حنتفة بس اتقن عملك.

 

وأخيرًا.. خليك عارف ان أهم حاجة أنك تبعد عن المشتتات والحاجات اللي بتمتص طاقتك بدون داعي، زي زميلك أو زميلتك اللي بيجيبوا في سيرة كل الناس، ومعندهمش قضية حقيقية تشغلهم.