The Definitive Guide to Living in the Capital , Cairo , Egypt

عمرنا فكرنا نسأل “جوجل” عن حاجة تخصه؟ يعني دايمًا بنسأل جوجل على الحاجة اللي تهمنا، لكن عمرنا ما سألناه هوه عن الحاجة تهمه ! .. علشان كده هو قرر يبوح ويتكلم بكل أسراره اللي كان مخبيها طول 2018 ويقولنا على أكتر حاجة “المصريين” كانوا بيدوروا عليها عنده، وبيسألوه عليها.

جوجل طلع بيان بمناسبة نهاية 2018 وكل سنة وإحنا طيبيين، وحكى فيه عن أكتر الحاجات اللي المصريين كانوا بيعملوا بحث أو “Search” عليها، الحاجات دي في منها أشخاص وأحداث ونجوم الرياضة وعروض وأغاني وبرامج تليفزيونية ومسلسلات، وجمعها جوجل من وسط تريليونات البيانات من عمليات البحث في العالم أو الأسئلة على جوجل السنة دي.

خد عندك يا سيدي، نبتدي بالشخصيات بشكل عام:

• محمد صلاح:

اللاعب المصري العالمي “محمد صلاح” المحترف في صفوف “ليفربول” الإنجليزي، كان أكتر شخصية المصريين عملوا Search عليها في سنة 2018.

• هيفاء وهبي:

الفنانة اللبنانية “هيفاء وهبي” تاني أكتر شخصية اتعمل Search على جوجل بإسمها في 2018.

• كوليندا غرابار كيتاروفيتش:

رئيسة “كرواتيا” واللي نجمها لمع في 2018 بعد ماظهرت جنب فريقها في كاس العالم وكانت تالت أكتر شخصية المصريين عملوا Search  بإسمها في 2018.

كمان ظهرت أسماء كتير في المراتب العشرة الأولى من الشخصيات الأكتر بحثًا على جوجل منها مثلًا الهضبه عمرو دياب، المذيعة رضوى الشربيني، والفنان محمد رمضان اللي كان رقم 10.

وبالنسبة للشخصيات الرياضية، فتصدر القائمة المرشح الجديد لتدريب النادي الأهلي المصري الأرجنتيني”رامون دياز” ، وبعديه جه “عبدالله السعيد” .

بالنسبة للأحداث اللي كانت مستحوذه على أعلى بحث في قايمة جوجل لسنة 2018 فكانت:

• كاس العالم:

كأس العالم في روسيا كان الحدث الأكثر بحثًا على جوجل خلال 2018، خاصةً بعد مشاركة مصر للمرة الأولى من سنين في المونديال.

• نتيجة الثانوية العامة:

الإقبال كان تاريخي يا فاندم على نتيجة الثانوية العامة على جوجل.

• مهرجان الجونة السينمائي:

النسخة الثانية لمهرجان الجونة السينمائي اللي اتعملت السنة دي، كانت من ضمن أكثر الأحداث ظهور وبحثً على جوجل، خاصة التغطية الإعلامية الواسعة اللي كانت مرافقة للمهرجان، والتركيز على أهم وأدق التفاصيل والأحداث المتعلقة بنجوم الفن والسينما ومشاركة أفلام كتير فيه.

وطبعًا من أهم الموضوعات اللي المصريين دوروا عليها على جوجل كانت مجموعة من الأغاني والمهرجانات الشعبية زي مهرجان “لألأ” وأغنية “أنا جدع”، وأغنية “ديسباسيتو”، ومهرجان “هات سجارة”، و”العب يلا” وأغنية “3 دقات” و”نسر الصعيد”.