The Definitive Guide to Living in the Capital , Cairo , Egypt

إنجازات كتير اتكلمنا عنها وهنتكلم عنها بتحصل في القاهرة، ممكن تلاقي منها اللي مش هتحس بيه، وممكن تلاقي منها اللي مالوش علاقة بأسلوب حياتك أو هتفيدك، لكن الأكيد إنها هتفضل إنجازات باسم “مصر”، وتهم كل مصري حتى لو مش بشكل شخصي، والإنجاز الجديد اللي هنتكلم عنه النهارده هو إنجاز يهمنا كلنا فعلًا في مجال النقل، وأبطاله مصريين، وبينضم لأسطول هيئة النقل العام في القاهرة.

يمكن اتكلمنا قبل كده عن الأتوبيس اللي بدورين اللي تواجد بشكل محدود في شوارع القاهرة، لكن أبناء مصنع “قسطور  KASTOUR” في المدينة الصناعية في العاشر من رمضان، نجحوا في صنع أتوبيس بدورين Double-decker Cairo’s bus بإيديهم.

أتوبيس القاهرة الجديد اللي بدورين صنع في مصر بنسبة تصنيع محلي وصلت لـ 65٪ وبيشيل 73 راكب، ومزود ب “واي فاي WiFi “ومكيف، وفيه كاميرات للمراقبة وشاشة لاستعراض الدور العلوي قدام السواق، وممكن توصلوا للدور العلوي بسلمين أمامي وخلفي.

 المرحلة الأولى للعمل تمت بالتعاقد على 12 أتوبيس، وشغالين حاليًا على خطين، الخط الأول بيضم قسم الحدائق، حدائق القبة – الفنجري، وأرض المعارض، والأوتوستراد، ونادي السكة، ومحور الشهيد، والمشير شارع التسعين، والجامعة الأمريكية، أما الخط الثاني فهيضم المرج – الدائري، القاهرة الجديدة، التجمع الثالث، الجامعة الألمانية.

وسعر تذكرة الأتوبيس 10 جنيه.