صوتك: اعرف كل حاجة عن الانتخابات بتطبيق جديد على تليفونك
Waleed Abuarab
تقريبًا
دي أهم انتخابات في تاريخ مصر، برلمان الثورة كما يطلق عليه. ولو زيك زي ناس كثير
متلخبطين ومش فاهمين قوي المفروض يعملوا إيه وإيه هي خطوات العملية الانتخابية وأماكن
التصويت والدوائر الانتخابية، ممكن تعتمد على البرنامج ده.
علشان
الحياة تبقى أسهل وتعرف المعلومات اللازمة للإدلاء بصوتك بسهولة قامت شركة «برايت
كرييشنز – Bright
Creations» بالتعاون مع شركة «اتصالات
– Etisalat» مصر بإطلاق برنامج جديد اسمه «صوتك – Sawtak» ممكن تحمله على تليفونك الذكي وهـ تعرف من خلاله تفاصيل العملية
الانتخابية وكل المعلومات اللي هـ تحتاجها قبل الإدلاء بصوتك. ممكن تحمل التطبيق
من اللينك ده www.sawtak.me وفيه نسخة منه للآي فون وللبلاك بيري ونسخة
للأندرويد. وممكن تتصفحه من خلال خدمة الواب WAP لو لزم الأمر من اللينك ده www.sawtak.me/homewap.
البرنامج
بـ يوفر معلومات شاملة ومحايدة لكل مراحل العملية الانتخابية. «صوتك» فيه معلومات
عن الدوائر الانتخابية وأسماء المرشحين في كل دائرة وكل أسماء الأحزاب والقوائم
وأماكن التصويت. بـ تقوم بإدخال الرقم القومي الخاص بك وبعد كده كل المعلومات بـ
تبقى متاحة أمامك.
فكرة
البرنامج جاءت للمصممين بالشركة بعد إحساسهم بالإحباط لما شافوا كل اللي بـ يحصل
في البلد دلوقتي ووجدوا أن المخرج الوحيد هو برلمان منتخب حقيقي يعبر عن إرادة
الشعب ويخرج بنا بسرعة من المرحلة الغريبة دي فـ حاولوا يساهموا بطريقة فعالة في
إنجاح العملية الانتخابية المرتقبة وطرحوا البرنامج الجديد بهدف التسهيل والترغيب
في المشاركة.
البرنامج
مهم وظهر في الوقت المناسب بالذات مع زيادة الضبابية وانعدام الرؤية بالنسبة
لمستقبل مصر بغير تكوين برلمان. وتحميل البرنامج “مجاني” لأنه ما بـ
يهدفش لتحقيق مكسب أكثر من توعية الناس بقواعد الانتخابات وإزاي تمر بسهولة ويسر.
«صوتك»
موضوعي جدًا ومش بـ يعرض البرنامج الانتخابي لأي مرشح أو حزب، بـ يعرض فقط أسماء
المرشحين والأحزاب من غير تفاصيل وبـ يعرض لينك لموقع المرشح أو الحزب على الإنترنت.
ممكن تضيف مرشحين لقائمة “المفضلين” الموجودة بالبرنامج علشان ترجع لها
مرة ثانية في أي وقت بسهولة، سرية المعلومات الخاصة بالمستخدم محفوظة وما حدش يقدر
يشوفها غير صاحب التليفون.
المعلومات
الموجودة على التطبيق من مصدر موثوق منه وهو وزارة الدولة للتنمية الإدارية ومن
خلال موقع www.elections2011.eg والموقع ده مهم جدًا هو كمان ولازم تلقي عليه نظرة علشان فيه
خرائط من موقع جوجل بـ تعرفك بالضبط مكان لجنتك الانتخابية وفيه فيديوهات توضيحية
بـ تعرفك الخطوات بالترتيب.
مش
مهم هـ تدي صوتك لمين؛ المهم تخرج وتعطي صوتك.. علشان صوتك مهم!
مقترح
معالم وسياحة
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
