The Definitive Guide to Living in the Capital , Cairo , Egypt

الحياة في كايرو

“طيبة روز بلازا”.. حديقة حيوان مصغرة مفتوحة في القاهرة الجديدة

أسعار تذاكر حديقة الحيوان حديقة الحيوان زيارة حديقة الحيوان
“طيبة روز بلازا”.. حديقة حيوان مصغرة مفتوحة في القاهرة الجديدة
بواسطة
Mohamed Talaat

حديقة الحيوان في الجيزة من الأماكن اللي مرتبطة بطفولتنا وبنحبها، ومافيش طفل في القاهرة أو حتى من بره مايعرفهاش، وهي مشهورة بتاريخها وحيوانتها المميزة والنادرة، وحاليًا كمان في خطة لتطويرها وهتتقفل سنتين بحالهم، علشان كده فكرنا نعرفكم على بديل ممكن يكون مناسب، وهو حديقة حيوان فندق Tiba Rose Plaza، واللي هنقول لكم على كل التفاصيل اللي محتاجين تعرفوها عنهم في السطور الجاية.

دخول الفندق نفسه بيكون بـ40 جنيه للفرد، ودخول حديقة الحيوانات مجانًا، وجوا الفندق هتلاقوا لاند سكيب مدرج، كله زرع وشجر ونخل، وده مكان الكافيه اللي الشاي فيه بـ6 جنيه، والقهوة بـ10 جنيه، والحواوشي 25 جنيه، والبيتزا 35 جنيه، والمدرج ده مناسب جدًا للتصوير.

أما حديقة الحيوان نقدر نقول عليها ميني حديقة، لأن الحيوانات والطيور اللي فيها قليلة وأليفة فقط، لكن الميزة اللي عندهم أنكم تقدروا تأكلوا الحيوانات بنفسكم وتتصوروا معاها كمان من خلال شراء باسكت أكل سعره 10 جنيه.

حديقة الحيوان هتلاقوا فيها “بط – نعام – طاووس – نسناس – دجاج وبط فرعوني – بجع – لاما – ايل أوروبي – حمام – كبش – ماعز” وكمان فيه عصافير وبغبغانات تقدروا تتصوروا معاها بـ10 جنيه بس، أما التصوير مع النسر 50 جنيه.

وعندهم بوني “الحصان الصغير” وده متاح ركوبه بـ20 جنيه للفرد، ده غير ألعاب كتير بداية من 15 جنيه زي الفيديو جيم والقطر والطيارة والحصان، وملاهي صغيرة.

المكان مميز بالمناظر الطبيعية والديكورات المميزة وفيه أنشطة كتير وداي يوز في الشاليهات اللي مصممة على الطراز اليوناني، وبيسين وغيرهم، وتقدروا تزروا المكان اللي مفتوح من 10 صاحًا، حتى 11 مساءُ، ولو معاكم عربية هيكون الدخول بـ20 جنيه بس طول اليوم، ورغم أننا رحنا علشان ناخد فكرة مش أكتر ولكننا انبسطنا جدًا بتجربتنا، وكمان الأكل عندهم كان لطيف وسعره مش غالي، وكنا طلبنا فتة موزة ضاني 180 جنيه، وميكس جريل 210 جنيه.

تقدروا تعرفوا أكتر عنهم من خلال صفحة الفيسبوك من هنا.

وهما موجودين في التجمع الخامس – بالقرب من مسجد المشير.

رقم التليفون: 0224481218

مقترح