The Definitive Guide to Living in the Capital , Cairo , Egypt

“الموضة كانت بتنزل القاهرة قبل باريس”، جملة مشهورة وسط المصريين من زمان، وقول الزمان إرجع يا زمان، وفي عصر الخديو إسماعيل بالتحديد حصلت طفرة معمارية في القاهرة، اللي اعتمدت في بناها على أشهر المصممين المعماريين في العالم لبناء أجمل المباني في وسط البلد، واللي حاليًا بتصنف من أجمل المباني، والأكيد أنكم هتحبوها بتفاصيلها الكتير ودقة كل حجر فيها. خلال السطور الجاية هنقول لكم على أجمل 5 عمارات في وسط القاهرة تقدروا تستمتعوا بيهم وتركزوا في تفاصيلهم المبهرة واللي بالتأكيد هتخليكم مبسوطين.

 

تيرنج

بتتميز عمارة تيرنج أنها فريدة في تصميمها وموجود منها 3 تصميمات في العالم كله، وهي موجودة في ميدان العتبة، ويمكن مش هتلاحظوها في الفترة الحالية ولكنها من أجمل المباني لو دققتوا في تفاصيلها، والتصميم كان من نصيب المهندس النمساوي “أوسكار هورويتز”، ومبنية على طراز “النيوباروك” بنقوش وقبة مميزين، وفي أعلى المبنى كرة كبيرة تحملها 4 تماثيل، والمبنى شيد عام 1910.

 

تريستا

من تصميم المهندس المعماري انطونيو لاشياك، وهو موجود في شارع علوي وسط البلد، وهو على الطراز الكلاسيكي المستحدث في وقت بناءه سنة 1911، ولو دققتوا في تفاصيله هتشوفوا زخارف وفتحات كانت مصر مشهورة بيها في مبانيها المحلية، وكمان هتلقوا علاقة الكتل المشهورة في عصر النهضة في أوروبا، وهو أول مبنى يجمع بين العمارة المحلية والأوربية في القاهرة، وحاليًا يسمى “مبنى البنك المركزي”.

 

جروبي

اتبنت عام 1924، وهي من الأماكن التاريخية المميزة والشهيرة في محيط وسط القاهرة، لأن كان فيها كافيه جروبي اللي كان رواده من صفوة المجتمع، واتصور فيه أفلام كتير أشهرهم “العتبة الخضراء” لاسماعيل يس، وهي من تصميم المهندس المعماري جوزيبي مازا، على الطراز الأوروبي الممزوج بالروح المصرية، وبتتمتع بتفاصيل كتير في كل دور وبتتميز أنها على شكل “كيرف” وحاليًا فيها “النادي اليوناني”.

 

يعقوبيان

“احنا في زمن المسخ”.. جملة اتقالت في فيلم عمارة يعقوبيان اللي متاخد من رواية الأديب علاء الأسواني، كانت تفاصيله كلها بتدور جوا العمارة “مع العلم أن الفيلم لم يصور داخل العمارة”، وهي اتبنت على يد هاغوب يعقوبيان سنة 1937، وهي مبنية على الطراز الفني الزخرفي واللي اسمه “الآرت ديكو”، واللي صممها المهندس المعماري جارو باليان.

 

بهلر

كلنا عارفين ممر بهلر الشهير في وسط البلد اللي بيفصل ما بين شارعي طلعت حرب وقصر النيل، ولكن في الحقيقة الأهم من الممر هو عمارة بهلر اللي بناها السويسري “تشارلز بهلر”، سنة 1924، واللي صممها المهندس الفرنسي ليو نافليان، وهي بتتكون من 6 مباني تصميم واحد ويعتبر منفصلين ولك واحد منهم مدخل خاص، وهو نسخة طبق الأصل من شارع “رو دي ريفولي” في باريس ولكن على أصغر.

بالتأكيد في مباني تانية كتير في وسط البلد من أجمل العمارات في العالم، وطبعًا هنتكلم عنهم في مقالات تانية، وتقدروا تعرفونا ايه العمارات اللي بتحبوها في وسط القاهرة واحنا هنتكلم عنها.