The Definitive Guide to Living in the Capital , Cairo , Egypt

محافظة القاهرة بتعتبر أول محافظة مصرية تستخدم وسائل النقل العام في طرقها، وبدأت الفكرة دي قبل أكثر من 120 سنة. في الموضوع ده هنعرفكم على حكاية أول أتوبيس نقل عام في القاهرة من خلال 7 معلومات.

 

1 – ظهر أول أتوبيس نقل عام فى مصر في بداية القرن العشرين، وكان مملوك وقتها لشركة الأتومبيل والأمنيبوس بالقاهرة.

2 – البداية بترجع لسنة 1897، لما أسس بعض الرأسماليين في العاصمة المصرية شركة “التياترات المصرية” اللي كانت متخصصة في عمل مسارح وكازينوهات في القاهرة، ووقتها أدرك رجال الأعمال اللي عملوا الشركة دي إن المنشآت اللي ليها طابع فني بتحتاج لبنية تحتية بتخدم المنشآت الفنية دي، فأسسوا شركة “النور والقوة الكهربائية” سنة 1906 في حي الظاهر.

3 – تم مد خطوط الكهرباء في حي الظاهر، وفي الوقت ده شهدت الظاهر والمناطق المحيطة بها لأول مرة أكبر تجمع لدور العرض المسرحي والكازينوهات.

4 – طبعًا المسارح دي كانت محتاجة جمهور، وبسبب صعوبة التنقل وقتها، اتشاركت عائلتين يهود هما “قطاوي وسوارس” في إنشاء شركة الأتومبيل والأمنيبوس بالقاهرة لخدمة المنطقة و التياترات المصرية.

5 – وسيلة النقل دي حملت اسم عائلة “السوارس”، وكانت أول وسيلة نقل عام بالعاصمة وظهرت سنة 1907.

6 – الخط كان مخصص لمناطق الظاهر والدراسة بس.

7 – كانت  وسائل مواصلات الشركة دي عبارة عن عربيات “أتومبيل” وعربيات تانية بتجرها الخيول، وبدأت تتوسع في بعض أحياء وشوارع القاهرة، وربطت حي الظاهر اللي أصبح مركز لدور العرض الفني مع باقي أحياء القاهرة لتنشيط المشروع الجديد ومن هنا ظهرت فكرة النقل العام بالقاهرة، ومع تطور الوقت نفذت الدولة مشروع أتوبيسات القاهرة.