The Definitive Guide to Living in the Capital , Cairo , Egypt

صلاة العيد من الأساسيات اللي بيحرص عليها المسلمين في عيد الفطر والأضحى، وكل صلاة عيد بتعلن وزارة الأوقاف الساحات المسموح لها بالصلاة في أول أيام عيد الأضحى المبارك، وعلشان كده هنقولك في السطور الجاية أهم ساحات الصلاة في القاهرة علشان تعرف أقرب مكان ليك ممكن تصلي فيه صلاة العيد.

زي كل عيد بننصحكم في كايرو 360 انكم تاخدوا معاكم مصلية علشان الدنيا هتبقى زحمة، وكتير مننا ممكن ميلقاش مكان، وخلي بالك انك لازم يكون معاك سوائل علشان حرارة الجو والرطوبة العالية جدًا في أغسطس، ومتنسوش أن صلاة العيد هتكون الساعة 5:45 صباحًا، “وعلى السادة المقيمن خارجها مراعاة فروق التوقيت”.

قائمة المساجد والساحات المعلنة من وزارة الأوقاف شملت مصطفى محمود في جامعة الدول العربية، المهندسين، وأسد بن الفرات في شارع التحرير، الدقى، وخالد بن الوليد في منطقة الكيت كات، إمبابة، وشارع السكرى في منطقة بين السرايات، وعمر بن الخطاب في إمبابة، والبدر في شارع البوهى.

كمان فيه ساحات تابعة لحي الهرم ومنطقة فيصل، منها مسجد التقوى في شارع المشابك، والتيسير والتوحيد في محطة التعاون، وأبو العباس في طريق كفر طهرمس، والصالحين في شارع أبو الهول، وأبو بكر الصديق في زنين، والرحمن في شارع سباق خليل.

ومش هننسى مسجد الاستقامة الشهير في ميدان الجيزة، ومسجد النور في طريق الكنيسة، والحرمين، وعكاشة في منطقة الطالبية، والشهيد زكريا في منطقة أرض العمدة، وعباد الرحمن في شارع فضل السيسي، وذى النون، وأسرة السلام، وأبو هريرة، وقباء في المنيب، وساحات مختلفة في شوارع زي العدل، وترسا، والمدبح، في المنيب.

ووزارة الأوقاف خصصت ساحات لصلاة العيد في مدينة 6 أكتوبر، بتضم مساجد زي الحصري، والنور والأبرار في الحي السادس، وعماد راغب، وعباد الرحمن في الحى المتميز، والصفا والمروة، وخليل الرحمن في الشيخ زايد.

وكمان فيه ساحات مخصصة في أنحاء متفرقة من القاهرة زي مسجد الفتح في رمسيس، والرحمن الرحيم في شارع صلاح سالم في العباسية، وعمرو بن العاص في منطقة مصر القديمة، وماسبيرو في منطقة بولاق أبو العلا في شارع ساحل الغلال، وشعبان في منطقة وراق العرب في الوراق.

وزي كل عيد شملت قائمة المساجد المخصصة لصلاة عيد الأضحى، ساحة مسجد عمر بن الخطاب في الزهراء، جنوب القاهرة، وساحة مسجد الجمعية الشرعية في البساتين، وساحة عثمان بن عفان في منطقة النزهة الجديدة، وساحة الرحمن في مدينة نصر، ومسجد النور في العباسية، ومسجد عمر مكرم في ميدان التحرير، وحي الأسمرات في المقطم، ومسجد زين العابدين في البساتين.

بالنسبة لسكان المعادي ومدينة نصر، فصلاة العيد هتقام في ساحة مسجد الرحمن في شارع أحمد ذكي في المعادي، وساحة مسجد الخلفاء الراشدين شرق القاهرة، وساحة مسجد خاتم المرسلين على طريق الأوتوستراد، وساحة مسجد الشهداء في الحي السادس في منطقة غرب مدينة نصر، وساحة مسجد الإيمان في مدينة نصر، وساحة مسجد الصيد في شيراتون مصر الجديدة، وساحة مسجد السلام في مدينة نصر، وساحة سوق السيارات في الحي العاشر في مدينة نصر، وساحة مسجد العزيز بالله في حلمية الزيتون، ومسجد فاطمة الشربتلي في التجمع الخامس.

أما المساجد التاريخية والأثرية زي مسجد سيدنا الحسين، والأزهر الشريف، والسيدة نفسية، والسيدة زينب، ومسجد الرفاعي، فمفيش خلاف على تخصيص الساحات التابعة ليها لصلاة عيد الأضحى زي ما أكدت وزارة الأوقاف في بيان ليها، ده غير ساحتين مسجد السلطان حسن في القلعة، ومسجد محمد علي باشا في الخليفة.

 

عيد أضحى سعيد يا أهل القاهرة!