استمتع بعيد الأضحى في حدائق القاهرة
العيد 2023 حدائق القاهرة خروجات في القاهرة عيد الاضحى
Cairo 360
رنا شرف
الخضرة والزهور من الحاجات الأساسية اللي بتغير موود الإنسان للأفضل، علشان كدة بنحب نروح حدائق في العيد. في عيد الاضحى 2023 عندنا فرصة نخرج ونستمتع بالجو الصيفي وبالشمس الجميلة.
تعالوا نتعرف على أفضل الحدائق المفتوحة في القاهرة اللي هتستمتع فيها بالعيد.
حديقة الأسرة (فاميلي بارك)
من الحدائق الحلوة واللي فعلًا بتناسب كل أفراد الأسرة، وفيها مساحة جميلة وملاهي وقطار بيلف الحديقة كلها وملاهي مائية ممتعة. الحديقة فعلًا مبهجة وكمان فيها مطاعم متنوعة، يعني ممكن تقضي اليوم كله في الحديقة وماتحسش بملل كمان لو بتحب الطيور والحيوانات هتسمتع أوي بالبجع والنعام والطاووس والغزلان.
حديقة الدراجات
حديقة جميلة ومعمولة مخصوص للناس إللي بتحب الرياضة وركوب العجل، الحديقة مبهجة لأنها بتجمع بين ركوب العجل ومساحة جميلة من الخضرة، كمان فيها ملاعب للكرة تقدر تلعب فيها يعني الحديقة دي رياضية بامتياز، وطبعًا بما أننا خارجين من رمضان والعزومات والحلويات فمحتاجين نغير ونلعب شوية رياضة.
حديقة الفنون
لو عايز تروح مكان بيجمع بين الخضرة والنيل يبقي حديقة الفنون هتبسطك قوي، بسبب موقعها المميز على النيل في شارع عبد العزيز أل سعود، وهناك ممكن تشرب قهوة أو شاي في الحديقة، وسعر التذكرة رخيص.
حديقة الفنون هتعجب أكيد كل أفراد الأسرة.
الأزهر بارك
من الحدائق المميزة في القاهرة، واللي تعتبر مكان محافظ علي شكله من سنين، وكمان الحديقة هتقدر تعمل فيها فوتوسيشن حلو لأنها جميلة والخضرة فيها مميزة ومبهجة.
الحديقة كبيرة وفيها مطاعم كمان، يعني هتستمع بجو حلو وتستمتع بأكل جميل.
حديقة الأورمان
لو بتحب الزهور والأشجار يبقى أكيد هتلاقي نفسك في الأورمان، اللي فيها كمية نباتات جميلة ونادرة، وفيها كمان مساحة كبيرة خضرا للناس إللي بتحب الطبيعة والتأمل، كمان التصوير هناك ممتع، ولو بتحب الرياضة وركوب العجل يبقي خد العجلة معاك ولف بيها في جو الخضرة الممتع ده.
وكل سنة وأنتم بخير وسعادة وفرح يا أهل القاهرة الكرام!
مقترح
الحياة في كايرو
شارع الألفي.. باريس في قلب القاهرة
أهم مباني شارع الألفي تاريخ شارع الألفي +3
الحياة في كايرو
