The Definitive Guide to Living in the Capital , Cairo , Egypt

كثير من المصريين المسلمين اتجهوا في السنوات الأخيرة لشراء “صك الأضحية” قبل عيد الأضحى، لأسباب كتير، ممكن يكون منها عدم قدرة البعض على شراء ذبيحة كاملة، أو علشان يضمنوا جودة ممتازة وسعر منخفض للحوم، وحتى كمان علشان توزيعها يكون في محله.

وعلشان كده في الموضوع ده اسمحوا لنا نقول لكم على كل الأماكن الموثوقة اللي ممكن تشتروا من عندهم “صك الأضحية”، وكمان هنشرح لكم طرق الشراء.

بنك الطعام المصري

هو صاحب الفكرة الأساسية وأول من أسس “صك الأضحية”، والسنة دي “صك الأضحية” عندهم يبدأ من 200 جنيه للحوم الصدقات “3 كيلو”، والصك المستورد بـ1900 جنيه، والصك البلدي بـ3300 جنيه.

ويمكن الدفع بأكتر من طريقة أهمها التحويل على الحساب البنكي رقم 888777 أو الدفع من خلال شبكات “فوري – مصاري – أمان – بي – فودافون كاش – jumia pay”، أو الكريديت كارد، وعلشان تعرفوا أكتر وتشتروا “صك الأضحية” تقدروا تزوروا موقعهم الإلكتروني من هنا.

جمعية الأورمان

عندهم السنة دي الأسعار لـ “صك الأضحية” بتبدأ من 200 جنيه للحوم الصدقة، والمستورد الصغير سعر الصك 1950 جنيه، وكمان صك المستورد الكبير بـ2550 جنيه، وده غير الصك البلدي سعره 3100 جنيه.

وتقدروا تتبرعوا من خلال الاتصال برقم 19455 أو عن طريق الكريديت كارد من هنا.

مصر الخير

هما عندهم “صك أضحية” واحد فقط بوزن 27 كيلو، وسعره 3500 جنيه، والميزة عندهم أنهم بيوزعوا لكل أنحاء الجمهورية ومش مرتبطين بتواجد جغرافي محدد، وتقدروا تتبرعوا أو تشتروا “صك الأضحية” من خلال الاتصال على رقم 16140 لطلب مندوب تحصيل، أو إلكترونيًا عن طريق بوابة البنك الأهلي، وعلشان تعرفوا أكتر عن “صك الأضحية” عندهم، زوروا موقعهم الإلكتروني من هنا.

صناع الحياة

عندهم  نظام الأسهم لـ “صك الأضحية” بسعر 400 جنيه، ويوجد “صك أضحية” للخروف 3500 جنيه، وسعر صك الأضحية الجاموسي بـ3600 جنيه، وسعر الصك البقري 3800 جنيه، ويمكن شراء صك الأضحية من خلال الاتصال على رقم 16563، أو من خلال الدفع الإلكتروني من هنا.

وزارة الأوقاف

الوزارة حددت سعر “صك الأضحية” السنة دي من خلالها بـ1800 جنيه وتقدروا تطلبوا شراء الصك بالاتصال أو إرسال رسالة “واتس آب” يكتب بها “طلب صك” وتتضمن الإسم والعنوان ورقم التليفون وعدد الصكوك، على الأرقام (01008806466 – 01120857330 – 01202527258)، وكمان من خلال حساباتهم البنكية وخدمة فوري ومديريات الوزارة، أو من خلال ملئ طلب على موقعهم الإلكتروني من هنا.

رسالة

جمعية رسالة من أقدم الجمعيات اللي بتقدم “صك أضحيةط عيد الأضحى، والسنة دي عندهم لحوم الصدقات وسعرها 100 جنيه، وكمان عندهم سبع عجل برازيلي بمساهمة 1850 جنيه، ده غير صك العجل 350 كيلو وسعره 12950.

وتقدروا تشتروا “صك الأضحية” من خلال الاتصال برقم 16450 أو من خلال منافذ فوري وأمان ومصاري، وكمان تقدروا تشتروا “صك الأضحية” من خلال موقعهم الإلكتروني من هنا.