عيش تجربة قطف الفراولة بنفسك في مزارع شجيع.. خروجة مختلفة لكل العيلة!
تجربة قطف الفراولة حصاد الفراولة خروجات عائلية داي يوز سياحة بيئية فطار فلاحي مزارع شجيع مزرعة في الإسماعيلية
Mohamed Talaat
الخروجات المميزة في مصر كتير، ودايمًا الناس بتدور على الجديد والمختلف علشان يغيروا المود ويظبطوا النفسية، سواء مع الأسرة أو الأصحاب. وده بالظبط اللي بتقدمه مزارع شجيع، اللي كانت قبل كده بتنظم مهرجان لحصاد المانجو، ودلوقتي شغالة على موسم حصاد الفراولة. من خلال زيارتكم للمزرعة، هتعيشوا تجربة فريدة تشمل حاجات كتير، وأهمها حصاد الفراولة بنفسكم! وهنقولكم في السطور الجاية كل التفاصيل اللي محتاجين تعرفوها.
مزارع شجيع اتأسست سنة 1985 في محافظة الإسماعيلية، وهي من أوائل المزارع اللي شجعت السياحة البيئية بإطلاق فكرة مهرجان المانجو، واللي كان بيسمح للزوار بقطف المانجو بنفسهم. ودلوقتي، خلال موسم حصاد الفراولة، المزرعة بتقدملكم تجربة جديدة من خلال مهرجان الفراولة، وعندهم أكتر من باكيدج تناسب كل الاحتياجات.
البداية مع باكيدج الإفطار وهو متاح طوال أيام الأسبوع وبيكون من 9 صباحًا، وبتبدأوا اليوم بقهوة عربي وبعدها فطار من الأوبن بوفيه، وممكن الزوار يقوموا بتسوية العيش الفلاحي بنفسهم وهو عبارة عن أجود أنواع القمح وخليط الزعتر والشمر والذرة المصرية، وكمان تقدروا تخبزوا الفطير المشلتت بالسمن البلدي بمساعدة متخصصين من المزرعة، والإفطار بيكون متاح فيه مع اللي هتخبزوه لطاطس وفلفل وباذنجان وجبنة قديمة وقريش وطماطم وخيار وجرجير وهريسة وليمون معصفر وزيتون مخلل ومشروبات بتتعمل على الحطب.
ومن ضمن الجولة بيكون لكل فرد الحق في أنه يحصد الفراولة من المزرعة وحلب الأبقار وصيد السمك في البحيرة الخاصة بيهم لو معاكم أدوات الصيد وركوب الحمار “زيكو” وكمان استخدام ملعب الكرة الطائرة وسعر باكيدج الافطار 600 جنبه للفرد المصري.
أما لو هتاخدوا باكيدج الغداء فبتبدأوا يومكم من الساعة 2 ظهرًا، وبتاخدوا جولة داخل المزرعة تشوفوا فيها حديقة المواشي والفراخ وزيارة البط في البحيرة وإسطبل الخيول مع مرشد زراعي متخصص، وبتقوموا بتسوية العيش الفلاحي بنفسكم، والغداء بيبدأ الساعة 4 عصرًا، وبيكون أوبن بوفيه فيه مندي وأرز بسمتي ومحشي بأنواع مختلفة وسلطات ومخللات ومشروبات، مع استخدام ملعب الكرة الطائرة وركوب الحمار “زيكو” وصيد السمك في البحيرة، وحصاد الفراولة وبيكون سعر الفرد المصري 1000 جنيه.
وهما كمان عندهم داي يوز من الساعة 9 صباحًا، وتبدأوا يومكم بالقهوة العربي وتسوية العيش الفلاحي والفطير المشلتت وتجهيز الفطار بكل تفاصيله اللي قولناها فوق، وكمان بتستخدموا ملعب الكرة الطائرة وصيد الأسماك وركوب الحمار “زيكو” وبتشاركوا في حصاد الفراولة، والساعة 1 بتبدأوا تجهزوا الغداء زي التفاصيل اللي في باكيدج الغداء واليوم بينتهي الساعة 6 مساءً، وسعر الفرد المصري 1400 جنيه، وعندهم ركوب خيل أو حجز خيمة خاصة مكيفة أو ليموزين من القاهرة ذهاب وعودة بتكلفة إضافية.
المكان بيحتاج حجز من خلال أرقام تليفوناتهم أو صفحتهم على الفيسبوك وبتبلغوهم بالعدد وتاريخ الحجز وهتحتاجوا لدفع عربون قبل الحجز.
العنوان: الكيلو 15 طريق الإسماعيلية فايد الصحراوي.
رقم التليفون: 01033330950.
وتقدروا تعرفوا أكتر عنهم من خلال صفحة الفيسبوك من هنا.
مقترح
صحة ولياقة
اسكيت X.. أول أكاديمية في مصر بتعلم التزلج لأبطالنا من أصحاب الهمم!
أصحاب الهمم أكاديمية سكيت X +12
معالم وسياحة
