The Definitive Guide to Living in the Capital , Cairo , Egypt

زي النهارده لكن سنة 1936 اتولد في قرية بسيطة في دمياط طفل عادي، زيه زي أي طفل مصري، لكن بعد سنوات الطفل ده أصبح متميز، بعد ما وقع في غرام اللغة العربية، واتحول بعد كده لشخصية مهمة كل مصر بتفخر بيها، الشخصية دي هي.. فاروق شوشة.

اللغة العربية من أرقى وأعظم لغات العالم، وبتدي مساحة كبيرة للإبداع لكل اللي بيتعلمها، ومن ضمن الشعراء المبدعين الشاعر الراحل فاروق شوشة، اللي خرج من قرية في دمياط اتسمت بعد كده باسم قرية الشعراء، علشان يبدع في بحور اللغة العربية وينتج قصائد ملهمة لأجيال كاملة بعد حفظه للقرآن ودراسته في كليتين مختلفين.

والنهارده موقع البحث الأشهر في العالم جوجل وضع صورة الشاعر فاروق شوشة على صفحته الرسمية في ذكرى ميلاده، في السطور الجاية هنعرفكم أكتر على واحد من أهم الشخصيات المصرية اللي عشقت اللغة العربية.

 

فاروق الشاعر والمذيع

“أنا إليك مبتدأي، حاضري ونهايتي

اشعلت أيامي فصارت نارها حقيقتي

فإن سألت عن هواي هذه حكايتي”

بعد تخرج فاروق شوشة من كلية دار علوم سنة 1956 وكلية التربية عين شمس 1957، جمع بين حبه للغة العربية ومجال دراسته واشتغل مدرس في نفس السنة اللي اتخرج فيها، وبعد كده اشتغل في الإذاعة سنة 1958 علشان يمتعنا ببرنامج “لغتنا الجميلة” اللي عرض لنا من خلاله جمال الشعر.

 

كمان فاروق شوشة ما اكتفاش بالإذاعة وقدم لنا برنامج تليفزيوني راقي جدًا بعنوان “أمسية ثقافية” كان بيستضيف فيه الشعراء ويناقشهم في أعمالهم، أو يحكي لنا عن أعمال شعراء زمان.

تقدروا تشوفوا هنا حلقة مميزة من البرنامج عن الشاعر الكبير أمل دنقل مع الأبنودي:

 

 

مؤلفات وجوائز فاروق شوشة

اهتمام الشاعر الكبير فاروق شوشة باللغة والشعر ماكنش كلام في الهواء كان بيترجم لقصائد ملهمة وسعي حقيقي للتغيير وده كان سبب أنه حصل على جائزة الدولة في الشعر سنة 1986 وجائزة كفافيس العالمية سنة 1991 وجائزة الدولة التقديرية في الآداب سنة 1997 وقبل وفاته في 2016 حصل على وسام النيل واللي بيعد أعلى جائزة بيتم منحها للأدباء في مصر.

 

مش بس كده الشاعر فاروق شوشة بقى رئيس الإذاعة المصرية سنة 1994 وبقى عضو في  مجمع اللغة العربية في القاهرة، ده غير أنه عمل في عدد من اللجان الثقافية وبقى رئيس بعضها زي لجنة النصوص في الإذاعة والتليفزيون ولجنة المؤلفين والملحنين.

توفى الشاعر الكبير فاروق شوشة يوم الجمعة 14 أكتوبر 2016 في القرية اللي اتولد فيها “قرية الشعراء” في دمياط بعد ما ساب تراث كبير ودواوين مميزة في الشعر زي “في انتظار ما لا يجيء” و”إلى مسافرة” ومجموعة شعرية للأطفال وهي “حبيبة والقمر”، و”أحلى 20 قصيدة حب في الشعر العربي” وأحلى 20 قصيدة في الحب الإلهي.

“سيشرق الصباح حبيبتي سيشرق الصباح

فليسكت الأسى الذي أظلنا ولتسكت الجراح

اليوم لا مكان للدموع في عيوننا ولا نواح

إنا معًا على المدى يظلنا معا جناح

مادمت ملء خافقي فألف أهلا يا رياح “.