The Definitive Guide to Living in the Capital , Cairo , Egypt

ثقافة تدوير المخلفات وإعادة استخدامها مرة تانية، والمعروفه عالميًا بإسم “Recycling” بدأنا نهتم بيها عندنا في مصر مؤخراً صحيح، لكن مش الإهتمام المطلوب اللي معظم دول العالم بتقوم بيه، ويمكن ده اللي خلى فنانة شابة، زي “سارة عبدالرحمن” تلفت النظر أكتر من مرة للثقافة دي من خلال رسالة بسيطة في لبسها في مهرجانات مختلفة.

سارة ما كنتش مضطرة إنها تحكي قصة فساتينها علشان ما تعملش قلق، خصوصًا إنها هتظهر بيهم في مهرجانات سينمائية مش قليلة عالميًا زي مهرجان القاهرة السينمائي الدولي، ومهرجان الجونة السينمائي كمان، لكن “سارة” فضلت تحكي عن فساتينها علشان توصل رسالتها المرتبطة بثقافة غايبة عن كتير مننا، وهي ثقافة “إعادة التدوير”.

في أول مرة، وتحديدًا في مهرجان الجونة السينمائي، سارة لبست فستان متفصل من 30 كيس بلاستك، وكانت رسالتها من خلال لبس الفستان ده زي ما قالت في أكتر من لقاء صحفي وبرنامج تلفزيوني وحتى على صفحتها الشخصية على الفيس بوك، إن الهدف هو التوعية بـ” تقليل الاستهلاك من الحاجات الشخصية اللي الواحد يقدر يعملها عشان يحافظ على البيئة كمان”.

المرة التانية كان القلق اللي حصل أكبر شوية كمان من المرة الأولانية، يمكن لإن الحدث كان مهرجان القاهرة السينمائي الدولي، ولبست فيه سارة فستان عادي من القماش، لكن اللي مش عادي هو الرسالة اللي وصلتها سارة للناس لما قالت إن الفستان من “وكالة البلح” يعني مستعمل، مش بس كده، سارة قالت على صفحتها الشخصية على الفيس بوك إنها اختارت الفستان ده تحديدًا لحفلة ختام مهرجان القاهرة لأنها اشتريته من وكالة البلح بـ ٣٧٠ جنيه.

و قالت كمان إنها بـ “توزع” اللي مش باستخدمه، ومابتشتريش غير اللي محتاجاه، ولو اشترت بتشتري مستعمل، مش حاجة متصنعة جديد، اتصرف عليها فلوس كتير وصنّعها عمال في ظروف غير آدمية.

سارة قالت كمان إن “فيه فكرة كدة إن ممكن يُعتبر “عيب” مثلًا إن الواحد يلبس حاجة مستعملة، بس انا حبيت اثبت (لنفسي أولًا) إن من السهل إني ألاقي حاجة مستعملة ولايقة للمناسبة، وفي نفس الوقت مستدامة وصديقة للبيئة”.

يمكن تعجبك فكرة سارة ويمكن لأ، يمكن نختلف أو نتفق على إنه ينفع أو ماينفعش، لكن غالباً مش هنختلف على عظمة الرسالة اللي وصلت لنا من سارة بفساتينها المختلفة، الفكرة هي المحافظة على البيئة وإعادة التدوير، فكرة من أهم الأفكار اللي ممكن نطبقها في حياتنا بمنتهى السهولة، وهيكون تأثيرها عظيم جدًا على كوكبنا.