The Definitive Guide to Living in the Capital , Cairo , Egypt

اللغة العربية من أجمل اللغات في العالم، بتتميز بإبداع خطي في كتابتها، والخطاطين العرب أبدعوا في نقش ورسم حروف لغة الضاد وده اللي خلى اللغة العربية فن عريق وجمي بكل أنواعها سواء ثلث، نسخ، رقعة، فارسي، أو ديواني. قال ياقوت المستعصمي في جمال الخط العربي: “الخط هندسة روحانية ظهرت بآلة جسمانية تقوى بالإدمان وتضعف بالترك”، وعلشان كده هنعرفكم على 3 أماكن في القاهرة تقدروا تتعلموا فيهم فن الخط العربي.

مدارس الخط العربي

مدارس الخط العربي التابعة لوزارة التربية والتعليم موجودة في مناطق كتير، وهي من أهم الأماكن اللي بتتعلموا فيها الخط العربي وقواعده والزخارف الإسلامية، وفيه منها بنظام الدورات الصيفية في المدارس، أو بنظام الدراسة الكاملة واللي بتكون زيها زي الدراسة العادية وبتقبل من شهادة الإعدادية فأعلى، ورسوم الدراسة 250 جنيه غير شاملة الدمغات، والدراسة فترة مسائية وبدون حد أقصى للسن، وأشهرهم مدرسة باب اللوق ومدرسة خليل أغا بباب الشعرية.

 

الحلقة

من أفضل أماكن إحياء التراث والتنمية المحلية، وممكن تتعلموا فيها الخط العربي، وبيدوا شهادة في نوع الخط اللي بتتعلموه، والدراسة عندهم 3 أيام في الأسبوع وفيه صباحي ومسائي، والدراسة عندهم مجانية، ومتاح الدراسة من سن 15 حتى 40 سنة، ومكانهم في شارع أم الغلام بحي الجمالية.

ساقية الصاوي

تقدروا تشتركوا في دورات دراسة الخط العربي في ساقية الصاوي واللي بتوفرها بشكل مستمر، ولكن بيشترطوا أنكم تكونوا أعضاء في الساقية، وبيكون فيه دراسة مخصصة للأطفال وأخرى للكبار، وبيدوا حصة واحدة أسبوعيًا بتكون يوم الجمعة.