The Definitive Guide to Living in the Capital , Cairo , Egypt

رغم مطالبات المساواة اللي منتشرة ما بين الشعب المصري لأنه مافيش فرق بين الراجل والست ولازم المساواة في كل حاجة إلا أنه التمييز الإيجابي في أوقات كتير بيكون مهم ومفيد لأسباب كتيرة جدًا، ومن ضمن أهم المميزات الإيجابية الموجودة في القاهرة هي مترو الأنفاق اللي مخصص عربيتين للسيدات، ودلوقتي ظهرت أول أكوا بوول للسيدات علشان يبقى فيه حرية لهن في التحرك والاستمتاع بدون خوف أو قلق من نظرات أو حركات، وخلال السطور الجاية هنقول لكم على كل اللي محتاجين تعرفوه عن Aqua Ladies Pool.

 

الفكرة في Aqua Ladies Pool واللي موجود في الشيخ زايد أنه بيوفر أكوا بوول متكاملة وحمامات سباحة للسيدات فقط، وهو مسموح فيه بدخول الأطفال بأقصى سن 7 سنوات، وده لتوفير الخصوصية لكل العضوات اللي محتاجين يكونوا على راحتهن.

والمكان هو عبارة عن أكوا بوول مغلق وهو بيكون مفتوح يوميًا من 10 صباحًا وحتى 7 مساءً، والأسعار للكبار 450 جنيه لكل أيام الأسبوع ما عدا الويك إند اللي سعر التذكرة فيه 500 جنيه، وللأطفال من سن سنة حتى 7 سنوات 250 جنيه طوال أيام الأسبوع والويك إند بـ300 جنيه، والدادة بيكون سعر الدخول لها 75 جنيه.

المكان بيقدم خدمات كتير مختلفة زي الأكل والشرب، والسبا واليوجا والرياضة وكمان فيه أماكن استجمام وتقدروا تلعبوا ألعاب كتير زي الطاولة والضمنة والشطرنج، ولو أنتم من محبي القهوة تقدروا تعملوها على السبرتاية بنفسكم أو تشربوا مشروبات مميزة زي الماتشا، وغيرها من الفعاليات اللي هتحسسكن بالراحة والروقان.

المكان موجود في ذا ستريب مول – طريق الشيخ زايد – وصلة دهشور – داخل نادي رؤية.

وتقدروا تتعرفوا عليهم أكثر عنهم من خلال صفحة الفيسبوك هنا.