The Definitive Guide to Living in the Capital , Cairo , Egypt

في كايرو 360، بيهمنا جدًا نظهر القاهرة وجمالها، ونكون عنيكم اللي بتشوفوا بيها أجمل الأماكن والأنشطة والفعاليات فيها، قررنا مؤخرًا نستكشف مكان حديث نسبيًا، كتير مننا ممكن يكون ما يعرفش عنه معلومات كتير، المكان ده داخل نطاق القاهرة الجديدة (مدخل الرحاب 2- الكيلو 26 طريق القاهرة – السويس الصحراوي) واسمه “حديقة الأسرة” أو “Family Park”.

لو كنت بتدور على منطقة خضراء ومفتوحة سواء علشان تستجم وتسترخي، أو محتاج مساحة تفكر، أو تمارس بعض الأنشطة مع الأولاد أو حتى لوحدك، فحديقة الأسرة فعلًا هتكون المكان المناسب اللي بتدور عليه.. وفي السطور الجاية هنقولك ليه.

المكان عبارة عن مسطحات خضراء بمساحات ضخمة جدًا، فيها بعض المباني اللي بتقدم خدمات ترفيهية للزوار، لكن الميزة إنها مش مشوهة منظر الطبيعة الخضرة اللي حواليك، فبالتالي نقدر نقول إن المكان ترفيهي عائلي على مستوى عالمي، وكمان بيوفر فرص ممتعة للأطفال علشان يتعلموا ويستكشفوا حاجات جديدة، وضرورية لإلهامهم وتعزيز التماسك الأسري وتعزيز الشعور بالمجتمع عندهم.

الحديقة فيها إمكانيات جميلة جدًا ومناسبة لكل الأعمار، وبتوفر تجربة تعليمية جذابة للأطفال والأسرة بشكل عام، وده بيكون من خلال برامج تفاعلية ومعارض وفعاليات خاصة طول أيام الأسبوع، وفي المناسبات والأعياد كمان.

أسعار التذاكر في الحديقة معقولة إلى حد كبير مقارنة بالخدمات الجميلة اللي بتقدمها الحديقة، لكن الأسعار بتختلف في أيام الجمعه والسبت والأعياد، والأطفال أقل من 4 سنوات دخولهم مجانًا، وسعر التذكرة بيشمل ( دخول الحديقة – حديقة الحيوان والسفاري – المتحف المفتوح – ثلاث مناطق ألعاب ثابتة اللي هي زي المراجيح كده ومناسبة لجميع الأعمار من سن 3 سنين لحد 16 سنة، وفيه ألعاب للكبار كمان). ولو فيه أيام فيها ماتشات كورة، ممكن تتفرج عليها أنت وأصحابك على الشاشات العملاقة اللي بيوفرها المكان، بالإشتراك مع أكبر وأهم القنوات الرياضية العادية والمشفرة كمان، يعني من الآخر مفيش ماتش ولادوري هيفوتك.

المكان فيه متحف حربي بيضم أسلحة من حرب أكتوبر، وحديقة حيوان كمان، يعني مكان متكامل من كل حاجة. وبالنسبة للكبار، فيه ملاهي في الحديقة فيها ألعاب مناسبة لكل الأعمار، وليها تذاكر دخول خاصة. وبالنسبة للأطفال فيه أنشطة تعليمية في الحديقة، ده غير ورش بتتقدم للأطفال.

مواعيد عمل الحديقة بتكون يوميًا من 9 صباحاً لـ 11 مساءً.

علشان تعرفوا أكتر عن المكان والأنشطة اللي بيقدمها والأسعار، ممكن تتواصلوا معاهم من خلال صفحتهم على الفيس بوك: Family Park-New Cairo.