في حديقة المريلاند.. اعرفوا تفاصيل أول مهرجان للعسل في القاهرة
الميريلاند عسل نحل مهرجان مهرجان العسل المصري مهرجانات القاهرة
Mohamed Talaat
فوائد العسل كتير، ومميزاته أكتر، ولأول مرة في مصر هيتم تنظيم أول مهرجان للعسل واللي هتستضيفه حديقة الميرلاند في مصر الجديدة، يوم الأربعاء 16 أكتوبر وهيستمر لمدة 3 أيام.
منظمين المهرجان واخدين الفكرة من المهرجانات الدولية زي كاليفورنيا في الولايات المتحدة الأمريكية، وستريتسيفل في كندا، ومهرجان روسيا، وفي مصر هيكون ده المهرجان الأول للعسل وهيتم تنظيمه “ترفيهي – سياحي – اقتصادي – بيئي – وصحي”، وبيهدف لرفع الوعي الإجتماعي بأهمية تناول عسل النحل الطبيعي، باعتباره محفز للمناعة الطبيعية، وداعم للصحة العامة للمصريين.
والهدف من المهرجان كمان ورفع كمية استهلاك المواطنين لـ2 كيلو عسل سنويًا بدل 100 جرام، وده متوسط المعدل المستخدم حاليًا في مصر لكل مواطن.
كمان المهرجان بيهدف انه يخلق سوق عمل جديد، من خلال التوزيع الأكتر للعسل وعمل مشروعات تربية النحل، خاصة أن مصر مؤهلة لأنها تكون مربية للنحل وملكاته، وده هيدر استثمار كبير يزيد من فرص الاقتصاد والاستثمار، وينعكس على البيئة، لأن النحلة هي عنصر رئيسي في تلقيح الزهور وزيادة الإنتاج الزراعي، واستعان منظمي المهرجان بمقولة أينشتاين اللي قال فيها “لو أن النحلة اختفت من على الكرة الأرضية، لن تدوم حياة الإنسان على سطحها أكثر من أربع سنوات”، لإثبات وجهة نظرهم.
المهرجان هيكون فيه عدة فقرات للأطفال والكبار، منها برنامج “النحال الصغير” ودا عبارة عن دورة مبسطة خلال اليوم هيتم فيها شرح أساسيات تربية النحل وإنتاج العسل للأطفال، في منحل صغير مخصص لكده، وهيتعرف فيه المشارك على الفرق بين الملكة والشغالات، وإزاي يلبسوا الملابس الخاصة بالعمل مع النحل، وكل ده تحت إشراف مدربين محترفين ومعتمدين من اتحاد النحالين العرب، وهيتم إعطاءهم شهادات معتمدة من الاتحاد.
كمان هيكون فيه برنامج التمويل اللي هيكون عن طريق البنوك اللي هتقدم قروض ميسرة للشباب اللي عاوزين يشتغلوا في قطاع النحل، كنوع من الدعم وضمان لاستمرارية النشاط الاقتصادي لقطاع النحل بدخول شباب قادر على التسويق والانتشار.
المهرجان كمان هيكون فيه معارض من الدول العربية وخصومات خاصة بالمهرجان وعروض وحملات تذوق، وقطار ألعاب وأنشطة متعددة للأطفال، وهيشمل كمان مسابقات وسحب يومي على جوائز من منتجات النحل، وعروض فنية وموسيقية على مسرح المهرجان، ومعرض مستلزمات تربية النحل وإنتاج وتعبئة العسل، وتدريبات وورش عمل على أسس تربية العسل.
وعلشان تعرفوا تفاصيل أكتر تقدروا تتواصلوا معاهم من خلال: صفحة الفيسبوك من هنا، ورقم التليفون: 01032558867، والموقع الإلكتروني من هنا.
مقترح
فن وثقافة
في الويك إند.. دليلك للسفر في رحلة بصرية مبهرة مع توت عنخ آمون
الجيزة المتحف المصري الكبير +5
معالم وسياحة
