The Definitive Guide to Living in the Capital , Cairo , Egypt

رحلة وتصوير: عمر مراد

أنت في خان الخليلي! كل حاجة حواليك بتجذبك وبتناديك، المباني الآثرية والتاريخية اللي بُنيت من زمن فات، روائح كتيرة وجميلة ما بين بخور وعطور، و سيمفونية جميلة هتسمعها مصدرها بائعي العرقسوس والعناب، وأصوات البائعين بتنادي على كل زوار الخان وبتقول “مصر نورت” واللي “مايشتري يتفرج”، حاسس أنك في حلم جميل في زمن قديم وحابب الحلم يكمل! الحقيقة إنه مش حلم، أنت بالفعل في خان الخليلي.

اعرف 5 أنشطة ممتعة تقدر تعملها هناك.. في الخان الجميل!

 

التمشية بدون هدف

أول حاجة تقدر تعملها أول ما تزور خان الخليلي تتمشى فيه، خلال تمشيتك هتحس أنك في زمن فات وأنك ملك، هتشوف بضائع من كل صنف ولون وتحف أثرية، وأماكن لبيع البخور والعطور، التمشية فقط كفيلة أنها تعدل مزاجك، وأنت ماشي هتشوف مشربيات من زمن فات وأسبلة مختلفة كانت بترحب بالكل الكل. هتحس خلال المشي إن البضاعة والتحف وكل حاجة ملك للمكان مش لأشخاص، لأن البضائع بتشكل مع المكان لوحة فنية متكاملة، يعني هي جزء حقيقي من المكان، لوحة الكل اتفق على جمال ألوانها بس مش كله اتفق على أسعارها! لأنك هتلاقي أسعار معروضة مختلفة من مكان لمكان.

تقدر تشتري كل حاجة حبيتها

بعد التمشية واكتشاف المكان، أنت دلوقتي حابب تشتري كل حاجة عجبتك، فلما تقرر تشتري هتلاقي زي ما بيقولوا “على كل لون يا باتيستا”، هتلاقي تحف وأنتيكات من زمن فات، وملابس وإكسسوارات تاريخية، ولو بتحب الفضة والذهب هتلاقي كل دا في المحلات الموجودة هناك، وشنط جلد، ولوحات فنية وشنط مصنوعة من القماش مكتوب عليها عبارات مختلفة وكله على ذوقك، ولو بتحب التوابل والعطور هتلاقي، العطور الأصلية والبخور، تقدر تجيب كل حاجة نفسك فيها ومتنساش تأخد هدية لحبايبك.

 

الأكل على أصوله في خان الخليلي

أكيد تعبت من التمشية والتسوق جه وقت الأكل، كل الأكل المصري الأصلي هتلاقيه، أماكن كتير بتقدم الأكل بأشكاله المختلفة، ولو محتاج تحلي هتلاقي محلات منتشرة بتقدم الحلو الشرقي والغربي.

وقت مشروبك المفضل

بعد الأكل والتحلية محتاج تحبس زي ما بيقولوا، ومافيش أفضل من قهوة العظماء والأدباء، “قهوة الفيشاوي” قعد عليها فنانين وأدباء كتير زي حافظ إبراهيم، سيد درويش، سلامة حجازي، نجيب محفوظ. في القهوة هتلاقي صور لكل حد عظيم قعد على القهوة، وكل مشاربيك المفضلة، وننصحك تطلب شاي بنعناع سكر خفيف.

 

زيارة الأماكن التاريخية الموجودة

طبعًا خان الخليلي قريب من أماكن كتير حلوة، بعد الأكل والتحلية والتسوق تقدر تختم بزيارة لمسجد الحسين أو شارع المعز بكل الأماكن التاريخية الموجودة فيه، أو حتى الأزهر الموجود على بعد دقائق. هتلاقي الروحانيات الجميلة اللي هتخليك تروح مبسوط.

خلصت الرحلة؟ الحمد لله على السلامة!