The Definitive Guide to Living in the Capital , Cairo , Egypt

القاهرة فيها أهم وأقدم متاحف، مش بس في مصر، لكن كمان في الشرق الأوسط كله، ومن المتاحف العريقة في العاصمة المصرية، المتحف الزراعي المصري، اللي بيعتبر من أهم وأكبر المتاحف المتخصصة فى المقتنيات الأثرية الزراعية في العالم كله، واللي تم افتتاحه زي النهارده، 16 يناير من عام 1938م، في سراي الأميرة فاطمة إسماعيل.

في الموضوع ده هنعرفكم على 15 معلومة عن المتحف المهم ده، واللي للأسف هو مغلق بسبب عمليات التطوير لكن هيتم إعادة افتتاحه قريبًا.

 

ــ المتحف الزراعي المصري موجود في سراي الأميرة فاطمة إسماعيل، بنت الخديوي إسماعيل، في حي الدقي.

 

ــ المتحف كان اسمه في البداية متحف فؤاد الأول الزراعي.

 

ــ بتبلغ مساحة المتحف الزراعي المصري 125 ألف متر مربع، بتشغل منها مباني المتحف حوالى 20 ألف متر مربع.

 

ــ باقي مساحة المتحف عبارة عن حديقة بتضم أنواع متعددة من الأشجار والنباتات النادرة والمسطحات الخضراء، بالإضافة إلى حديقتين على الطراز الفرعوني.

 

ــ  بيتكون المتحف من ثلاثة مباني، المبنى الأول للمملكة النباتية، والمبنى الثاني لمعروضات المملكة الحيوانية، أما المبنى الثالث فمتخصص في تاريخ الزراعة المصرية من عهد ما قبل التاريخ لحد النهارده.

 

ــ المتحف فيه مكتبة وقاعات للسينما والمحاضرات وكمان بيعرض مجموعة كبيرة من الحشرات.

ــ ييحتوي المتحف الزراعي المصري على 6 من أهم أنواع المتاحف المتخصصة، منهم متحف بيضم المقتنيات الأثرية القديمة ومتحف بيضم مقتنيات من العصر اليوناني والروماني، ومتحف للمقتنيات الأثرية، ومتحف للمجموعات العلمية، ومتحف المملكة النباتية، ومتحف القطن.

 

ــ الهدف من إنشاء المتحف هو توثيق تاريخ مصر الزراعي، وإنه يكون نافذة تطل منها كل الأجيال على حضارة مصر الزراعية.

 

ــ بيضم المتحف آلاف المعروضات والمقتنيات اللي بتقدم قراءة تاريخية للزراعة وتطورها فى مصر منذ عصر الفراعنة.

 

ــ بيعتبر المتحف كمان مركز للعلماء والباحثين فى مجال الأبحاث والدراسات الزراعية والبيطرية والتاريخية.

ــ المتحف فيه مقتنيات ونباتات نادرة بعضها انقرض من الوجود زي نبات “البرساء” اللي كان مقدس عند قدماء المصريين.

 

ــ كمان بيحتوي المتحف على نماذج لآلات زراعية تاريخية زي المجرش أو آلة طحن الحبوب اللي بيعود تاريخها إلى 15 ألف سنة.

 

ــ بيضم المتحف كثير من الصور الفوتوغرافية والأعمال الفنية الزيتية اللي بتوثق لتطور الأساليب الزراعية عند الفلاح المصري وأشكال الحياة القروية عبر التاريخ.

 

عنوان المتحف: الجيزة، الدقي، شارع وزارة الزراعة بالقرب من وزارة الزراعة المصرية عند مطلع 6 أكتوبر وقبل شارع البطل أحمد عبد العزيز.

تليفون: 33372933