The Definitive Guide to Living in the Capital , Cairo , Egypt

في يوم المرأة العالمي.. 5 مصريات وصلن للعالمية
بواسطة
Cairo 360

حقيقي كان صعب جدًا إننا نختار خمسة سيدات مصريات بس باعتبارهم الأكثر تميزًا وشهره في مصر والعالم كله، وده لإن تقريبًا مفيش ست مصرية مش مميزة، ولإن فيه آلاف القصص المميزة في عالمنا.. في الموضوع ده هنتكلم معاكم عن 5 نماذج العالم كله يعرفهم بسبب تميزهم.

نور الشربيني:

لاعبة اسكواش مصرية محترفة، وهي المصنفة الأولى على مستوى العالم دلوقتي، وبتعتبر أول لاعبة مصرية تحقق لقب بطولة إنجلترا المفتوحة للاسكواش تحت سن 13 وده كان سنة 2009، بعد ما كسبت نوران جوهر بنت بلدها برده في نهائي البطولة.

نور فازت ببطولة العالم للإسكواش اللي استضافتها مدينة شيكاغو الأمريكية 2019، للمرة الثالثة في تاريخها، وبرده بعد ما كسبت بنت بلدها نور الطيب بـ3 أشواط مقابل شوط واحد، وكانت بطلة العالم سنة 2015 و 2016 على التوالي.

هدى قطب:

يمكن يكون الإسم مش معروف عند أغلبية المصريين، إلا إنها واحدة من أشهر الإعلاميات فى الولايات المتحدة الأمريكية، هي من أصول مصرية، أبوها وأمها مصريين وهاجروا بيها بعد ولادتها فى القاهرة بسنة واحدة للولايات المتحدة، وكانت والدتها في الوقت ده بتشتغل فى مكتبة الكونجرس الأمريكى.

هدى قطب بتقدم البرنامج الصباحى “Today Show”، على شبكة “NBC” الأمريكية، من سنة 2007، وكانت بتشتغل مراسلة لبرنامج “Dateline” على نفس القناة من سنة 1998.

فريدة عثمان:

في سنة 2018 فازت بطلة السباحة المصرية فريدة عثمان بـ 3 ميداليات، اثنين منهم ذهبية، فى دورة ألعاب البحر المتوسط في إسبانيا، واللي أسعدت قلوب ملايين المصريين من جمهور رياضة السباحة أو حتى اللي مش من جمهورها.

فريدة دخلت جامعة كالفورنيا، واللي ساعدتها بشكل كبير في التفوق الرياضي زي ما قالت.

أهداف سويف:

أديبة، وروائية، ومحللة سياسية واجتماعية مصرية بامتياز، كتبها وروايتها اترجمت لأكثر من لغة، عايشة بين القاهرة ولندن، وهى تبقى بنت أستاذ علم النفس الدكتور مصطفى سويف، وأستاذة اللغة الإنجليزية فاطمة موسى.

اتخرجت من كلية الآداب – جامعة القاهرة سنة 1971 من قسم الأدب الإنجليزى، وخدت الدكتوراه سنة 1978 والدكتوراه الفخرية من جامعتين بريطانيتين.

ومن أحدث مؤلفاتها: “فى مواجهة المدافع.. رحلة فلسطينية” وهى مجموعة من المقالات الأدبية.

هداية ملاك:

لاعبة التايكوندو المصرية في منتخبنا الوطني، وأول لاعبة عربية وإفريقية تتأهل لأولمبياد ريو دي جانيرو 2016 وفازت ببرونزية في الأولمبياد دي.

هداية فازت كمان بذهبية في بطولة فرنسا المفتوحة للتايكوندو، وكمان فازت بذهبية بطولة روسيا المفتوحة للتايكوندو لوزن ٦٧.

بدأت هداية ملاك، لعب التايكوندو وهي عندها 10 سنين، وانضمت بعد كده لمنتخب الناشئين وبعدين منتخب الكبار، وخدت المركز الأول في بطولة الجيزة اللي أهلتها لبطولة الجمهورية وكانت أول بطولة ليها وخدت فيها المركز الأول وهي عندها14سنة.

في #يوم_المرأة_العالمي بنقول لكل ست: كل سنة وأنت بخير وناجحة.

مقترح