قانون انتظار السيارات في الشوارع.. جدل على السوشيل ميديا وتوضيح من “التنمية المحلية”
أخبار القاهرة الحكومة المصرية انتظار السيارات في الشوارع قانون السايس قانون انتظار المركبات في الشوارع قانون ركن السيارات
Cairo 360
تسبب قرار بدء التطبيق التجريبي لقانون انتظار العربيات في الشوارع في القاهرة والجيزة في جدل واسع على وسائل التواصل الاجتماعي المصرية، وأدى الجدل على بدء تطبيق القانون لإصدار وزارة التنمية المحلية لبيان رسمي يوم الثلاثاء 24 أغسطس الجاري، وضحت فيه أن القانون اللي صدر السنة اللي فاتت هدفه “استعادة الانضباط المروري”.
وقالت الوزارة في البيان إن القانون بدأ تطبيقه بشكل تجريبي في 6 أحياء في القاهرة وهي: الوايلي وبولاق أبو العلا وعابدين ووسط القاهرة وغرب القاهرة والسيدة زينب، بإجمالي 8 شوارع و3 ساحات، وفي الجيزة بدأ التطبيق في حي الدقي بعدد 4 شوارع هي (مكة – الثمار – الثورة – سليمان أباظة)، لكن الوزارة أكدت إن التطبيق التجريبي بيهدف لدراسة أي سلبيات ممكن تحصل بسبب التطبيق، وعلشان يبان “مدى ملائمته مع اللائحة التنفيذية للقانون واتخاذ الإجراءات اللازمة لتصويب أي سلبيات بما في ذلك محاسبة المسؤولين عن التطبيق الخاطئ للقانون”.
ليه فيه حالة جدل؟
بيقول المعترضين إن القانون الجديد بينص على رسوم انتظار شهرية بتصل إلى 300 جنيه للحصول على أماكن لسياراتهم حتى في الشوارع اللي بيسكنوا فيها، وده بالنسبة لهم أمر مش منطقي، واعتبروا أن رسوم انتظار السيارات مبالغ فيها، وإن الأمر ده بيضيف أعباء إضافية لتكلفة المعيشة المرتفعة بالفعل، بحسب وصفهم.
الحكومة بتقول إيه؟
الحكومة بتقول إنه مافيش داعي للقلق، وإنها مجرد تجربة أولية، وبتشرح إن القائمة الجديدة لرسوم انتظار العربيات في الشوارع أولية ولسة خاضعة للمراجعة، وبتؤكد الحكومة إنها لسة بتختبر الإجراءات وبتعيد تقييمها وبتشوف لو كان بعضها محتاج للتعديل، وده بحسب تصريحات المتحدث باسم وزارة التنمية المحلية خالد قاسم لبرنامج “الحياة اليوم” يوم الثلاثاء.
إيه تفاصيل القانون؟
بموجب مشروع القانون، هتنشأ لجان في المحافظات المصرية المختلفة لتنظيم أماكن إنتظار العربيات في الشوارع، وتحديد أسعار التذاكر بناء على مستويات الدخل في كل منطقة، وكمان اختيار الشوارع اللي هيتم السماح فيها بانتظار العربيات، وهيتم كمان إنشاء شركة متخصصة لتوظيف عمال مواقف السيارات في الشوارع.
مقترح
الحياة في كايرو
شارع الألفي.. باريس في قلب القاهرة
أهم مباني شارع الألفي تاريخ شارع الألفي +3
الحياة في كايرو
