The Definitive Guide to Living in the Capital , Cairo , Egypt

كتير مننا بيحب يشتري الورد علشان يزين به البيت أو المكتب. ويدي شكل وديكور حلو للمكان. لكن مش كل الناس بتفهم في الورد. وإزاي يختاروه ويعتنوا به كويس. وعلشان كده إحنا جبنا لكم شوية نصائح مهمة، لازم تاخدوا بالكم منها قبل ما تشتروا الورد. يلا نعرفهم بالتفصيل:

1- فحص البتلات

مهم جدًا وإحنا بنشتري الورد ناخد بالنا كويس من البتلات. ونتأكد إن مفيهاش نهايات سوداء جافة، أو عليها علامات لونها بني. لأن النهايات الجافة معناها إن الورد عدى مرحلة الشباب (الإزهار). يعني مش هيكون مفتح بالشكل المطلوب. والعلامات اللي لونها بني، معناها إن الورد اتقطف بشكل غير صحيح.

2- فحص السيقان والجذور

السيقان لازم تكون رطبة. وده معناه إنها اتحفظت في المياه بشكل سليم. وكمان لازم تدور على الورود اللي لسه ما فتحتش. الورد اللي فتح معناه إنه مركون بقاله فترة، وده مش هيقعد معاك لفترة طويلة مجرد ما تنقله للبيت. أما الجذور اللي مقفولة على بعضها، بتبين إن الورد اتقطف بدري ولسه ماوصلش لذروته.

3- ماتشتريش الورد لمجرد إن لونه حلو

أكبر غلط ممكن تعمله إنك تشتري ورد علشان لونه عجبك. في أوقات بتكون الورود الحمرا في المحل جميلة، والزهور الكوبية البيضاء (نوع من أنواع الزهور) بتكون مليانة بقع لونها بني على بتلاتها. علشان كده المفروض تشيل فكرة اللون من دماغك، وتختار أحسن حاجة بغض النظر عن لونها. لأن في الآخر كل الورود حلوة في أي لون.

4- ورد الموسم هو أفضل اختيار

اختيارك للورد في الموسم بتاعه، مش بس هيديك أفضل زهور الموسم. ده كمان هيخلي قدامك تشكيلة كبيرة من أنواع مختلفة خاصة بالموسم ده. تقدر تشتري منها اللي أنت عايزه.

5- اهتم دايمًا بالفازة “Vase”

تنسيق الزهور بيتطلب درجة من التخطيط. يعني لما تختار الورد لمناسبة معينة، لازم تحط في اعتبارك الفازة اللي هيتحط فيها. شكلها، حجمها، لونها.. إلخ، كلها عناصر أساسية في قرارك لاختيار الورد. علشان في أشكال تناسب زهور معينة، وماتناسبش زهور تانية. وكله في الآخر بيبان في شكلها النهائي.

أكيد بعد النصائح دي اختياركم للورود المرة الجاية هيختلف.

المعلومات اللي في المقال عن موقع “redefiningdomestics”بتصرف.