The Definitive Guide to Living in the Capital , Cairo , Egypt

كل فترة بنحب نروح مكان جديد نهدي فيه أعصابنا ونستريح علشان نشحن ونقدر نرجع شغلنا ثاني.. قرية تونس فى الفيوم مش بس بتوفر لك ده، لأ دي تعتبر من أكثر الأماكن اللي بتلهم المبدعين والفنانين في جميع مجالات الفن، وكمان فيها مكان مميز بيعلم فن صناعة الخزف والفخار.. والقرية رغم بساطتها إلا أنها آيه في الجمال.

 

تعتبر قرية تونس من أكثر الأماكن الجميلة اللي مش واخدة حقها زي ذهب أو نويبع، صحيح ما عندهمش بحر بس عندهم بحيرة قارون الساحرة، كمان فيها شلالات وادي الريان اللي في قلب الصحراء.

مبدأيًا كده، قرية تونس مكان تتأمل فيه براحتك وتفصل فيه عن العالم الخارجي، وتراقب الطيور على بحيرة قارون، وبالنسبة للفنانين قرية تونس تعتبر حاضنة لكل أنواع الفنون وبالأخص فن الخزف والفخار.

من أجمل الأماكن اللي ممكن تقيم فيها هناك، فندق زاد المسافر اللي في أول طريقك للقرية، واللي له مدخل خاص به على الطريق، ومدخل داخلي من جوه القرية بس بتدخله وأنت ماشي على رجلك مش بالعربية، أول ما بتوصل بتلاقي أمامك حقل مليان زرع وورود جميلة.

الفندق ديكوراته جميلة وبسيطة، والمكان كبير وفيه مكان خاص بإشعال النار لو حابين تعيشوا جو الحياة البسيطة بكل تفاصيله، وحوله مجموعة خيم جواها قعدات على الطراز العربي.

الغرف على شكل بيوت بيضاوية لونها بني، بدائية الصنع، ما أنت في تجربة روح المسافر بقى، والشبابيك بتاعتها عليها قماش ألوان قوس القزح، بس أجمل حاجة صوت العصافير اللي بتصحى عليه، والهدوء النفسي اللي في المكان، ده غير أن الأشجار هناك مبهجة مع المدخل اللي مليان طوب صغير وترابيزات لو حابب تقعد، غير الفرن البلدي اللي بتخبز فيه العيش ست فلاحة أمام عينيك وريحته تهبل من جماله، وكان فيه حمام سباحة بس مش مجهز للشتاء، في الصيف وعليكم خير بقى، كمان الأكل هناك مميز جدًا، بالذات الفطير بالعسل والجبنة لازم تجربوه.

لو نفسك تتعلم فن الخزف وصناعة الفخار!

وأنت في قرية تونس اسأل على معرض إبراهيم سمير للخزف، مكان جميل وبعيد عن ضوضاء القاهرة، المسؤول عن المكان هو صانع الفخار الفنان إبراهيم سمير. بيقدم “سمير” ورش عمل بشكل مستمر في المكان بأسعار بسيطة، وممكن تطلبوا منه ورشة قصيرة مدتها أقل من ساعة، هيعلمكن فيها مبادئ تشكيل الطين وتحويله لقطعة خزفية، وهيعلمكم كمان أساسيات اللون وتزيين الخزف.

تقدروا تعرفوا تفاصيل أكثر وتتواصلوا مع المكان من هنا.

 

الحقيقة أن الفيوم بصفة عامة مكان ملهم لأى فنان بسبب جمال الطبيعة، ومناسبة لأي حد عاوز يريح أعصابه من دوشة القاهرة وتعبها. لازم تجربوا يومين في قرية تونس الممتعة مع أحبابكم وأصحابكم، وتعيشوا بروح المسافر اللي بيعشق يشوف الجمال ولو ليومين بس.