The Definitive Guide to Living in the Capital , Cairo , Egypt

 كل سنة في 31 أكتوبر بنلاقي العالم كله لبس ماسكات وملابس وأزياء مرعبة، وممكن كمان يتعمل حفلات تنكرية كبيرة أو صغيرة، كل واحد وإمكانياته، لكن المهم إنهم لازم يكونوا مرعبين ومخيفين في اليوم ده، ويشوفوا تأثير ده على اللي حواليهم، ولما بنسأل عن السبب بتكون الإجابة دايمًا “الهالوين” أو عيد الرعب.

طيب يا ترى إيه حكاية عيد الرعب أو “الهالوين” ده؟ وفكرته جت منين؟ وهل لازم اللي هيحتفل يلبس زي مرعب؟ وإيه علاقة ثمرة القرع بالموضوع؟ تعالوا نقولكم.

في الحقيقة تكاثرت الأقاويل حولين حكاية نشأته من الأساس، فمثلًا واحدة من الحكايات دي بتقول إن كان في اعتقاد شائع بأن دي تقاليد كلتية (أو سلتية) قديمة، والكلت (أو السلت) أو اللي هما أجداد الشعب الأيرلندي والاسكتلندي.

وكانت الاحتفالات دي مرتبطة بمواسم حصاد المحاصيل، وكان في ربط أو علاقة بين المواسم الزراعية والطقوس المرتبطة بالقوى الخارقة اللي كانت فكرة سائدة وطبيعية جدًا على أيامهم، وطبعًا لإن في قوى خارقة، فده معناه إن الاحتفالات بتتضمن “التنبؤ بالمستقبل” سواء بقى في اللي بيتعلق بالموت أو في الجواز.

وفي تفسير تاني بيقول إن الموضوع ليه علاقة بعيد كلتي قديم اسمه “سامهاين” على اسم إله الموت، وده مرتبط ببداية البرد والضلمة في الشتاء لإن إله الشمس وقع في أسر الموت والظلام يوم 31 أكتوبر، وعلشان كده في الليلة دي أرواح الأموات بتلف وتدور في ملكوتها، وتحاول ترجع للدنيا من تاني.

في الليلة دي الكهنة بيعملوا عيد كبير لإنهم كانوا معتقدين إن “سامهاين” بيجمع كل الأرواح الشريرة اللي ماتت خلال السنة، واللي كان عقابها إنها ترجع للحياة تاني بس في أجسام حيوانات، وطبعًا كانت الفكرة دي كفيلة بإنها ترعب الناس.

مع الوقت والأيام، وتبادل الثقافات والهجرة والسفر حوالين العالم خد الهالوين شكله الحالي في أمريكا من أول القرن الـ19 مع هجرة الأيرلنديين ليها بعاداتهم وتقاليدهم وقصصهم، وبدأت الفكرة بإن الساحرات والأرواح بتبفى في كل مكان في الهالوين، ده غير مظاهره المختلفة من مكان لمكان في العالم، لكن بشكلٍ ما ارتبط الهالوين في كتير من الثقافات بثمار القرع.

ثمرة القرع في الهالوين ليها حكاية ظريفة بتقول إن كان في شخص اسمه “جاك” وكان كسول مش بيشتغل، وبيسكر ويقطع الطريق، وكان عارف إن كل ده بسبب وسوسة الشيطان، لكن ذكاء جاك خلاه يفكر في فكرة تخليه يتوب، فقرر يستدرج الشيطان ويقنعه يطلع لقمة شجرة، ولما طلع الشيطان لقمة الشجرة حفر جاك صليب في جذع الشجرة، فخاف الشيطان ينزل وفضل على قمة الشجرة.

لما مات “جاك” مدخلش الجنة بسبب أعماله، وفي نفس الوقت مالوش مكان في جهنم، فحكم عليه بالتشرد الأبدي، وعلشان ماتفضلش روحه ماشيه في الظلمة، خد نور من جهنم، وبعد كده في ذكرى الأسطورة اللي بتستوحي قصة جاك، بقى في مكان النار “جزرة” وبعد كده طورها الأمريكان بثمرة القرع، وبكده نشأ مصباح القرع وبقى رمز مهم في ذكرى الهالوين.

بالنسبة للأزياء، ففي اعتقاد بإن الأزياء المرعبة اللي بنشوفها حاليًا في احتفالات الهالوين شبه الأزياء الشعبية للشعوب الأيرلندية والاسكتلندية القديمة، اللي كانت بتحتفل في نهاية المواسم الزراعية باللبس ده.